APAY agkarkararag daytoy a tao ken Jehova? Ania dagidiay sursurat nga inkabilna iti sanguanan ti altar ni Jehova? Ti tao ket isu ni Ezekias. Isut’ ari ti umabagatan a dua a tribo ti Israel. Ket isut’ adda iti dakkel a pakarigatan.

Dagiti buybuyot ti Asiria ket dinadaeldan ti umamianan a 10 a tribo. Impalubos daytoy ni Jehova ta dagidiay a tattao ti dakesda. Itan immayen dagiti buybuyot ti Asiria a mangraut iti dua-tribo a pagarian.

Ti ari ti Asiria ti kaipatpatulodna pay laeng dagiti sursurat ken Ari Ezekias. Kadagitoy a sursurat kinatkatawaanna ni Jehova ket imbagana ken Ezekias nga isut’ sumukon. Dagitoy dagiti sursurat nga insango ni Ezekias iti altar ni Jehova. Agkarkararag ni Ezekias: ‘O Jehova, isalakannakami manipud ari ti Asiria.’

Nasayaat nga ari ni Ezekias. Nagtulnog kadagiti linlinteg ni Jehova. Gapuna, kalpasan ti panagkararag ni Ezekias, pinatulodan ni mammadto nga Isaias ti mensahe a naggapu ken Jehova: ‘Ti ari ti Asiria dinto umay iti Jerusalem. Uray dagiti buybuyotna didanto mangibiat uray maysa a pana iti siudad.’

Kitaenyo ti retrato iti daytoy a panid. Dagiti natay a soldado isuda dagiti Asirio. Iti maysa a rabii, pinapatay ti anghel ni Jehova ti 185,000 kadakuada. Isu a ti ari ti Asiria nagawiden.

Ti dua-tribo a pagarian ti naisalakan, ket immay iti apagbiit ti talna kadagiti tattao. Ngem kalpasan ipapatay ni Ezekias, dagiti simmaruno a dua nga ar-ari ti dakesda ket ti daga napunno iti kinadakes. Kalpasanna ni Josias nga apoko-ti-tumeng ni Ezekias, ti napagbalin nga ari.