PINADPADAS manen ni Saul a tiliwen ni David. Innalana ti 3,000 kadagiti kasayaatan a soldadona ket isut’ napandan a binirbirok. Idi naammuan ni David daytoy, naammuanna no sadino ti nagkampuan ni Saul ken ti buybuyotna iti rabii. Ket ni David ken Abisai, ti anak a lalaki ti babai a kabsat ni David a ni Sarvia, napanda sadiay.

Nagar-arudok da David ken Abisai idiay kampo ni Saul bayat a matmaturogda amin. Pinidutda ti gayang ken gorgorita ni Saul, nga adda idiay uluanan ni Saul. Awan asinoman a nakakita kadakuada, ta nakaturogda amin.

Kitaenyo itan da David ken Abisai. Sitatalged nga addada idiayen tapaw ti turod. Nagpukkaw ni David iti pangulo ti buyot ti Israel: ‘Abner, apay a dika salsalakniban ti ari? Adtoy! Sadino ti ayan ti gayang ken ti gorgoritana?’

Nakariing ni Saul ket nailasinna ti timek ni David. Insaludsodna: ‘Sika kadi dayta, David?’ Makitayo kadi ni Saul ken ni Abner idiay baba?

‘Wen, apok nga ari,’ insungbat ni David. Sana kuna: ‘Apay a kayatnak a tiliwen? Aniat’ dakes nga inaramidko?’

‘Siak ti nagaramid ti dakes,’ kuna ni Saul. Kalpasanna nagawiden ni Saul. Ngem agamak ni David di la ket ta iti maysa nga aldaw isunto ti patayen ni Saul. Gapuna naikeddengna nga isut’ agkamang idiay daga dagiti Filisteo. Pinamatina dagiti Filisteo nga isut’ addan iti dasigda.

Iti maud-udi a tiempo, simmang-at dagiti Filisteo a maibusor iti Israel. Idiay paggugubatan, ni Saul ken Jonatan ti natayda. Daytoy ti nangpaleddaang unay ken ni David.

Kalpasan daytoy, nagsublin ni David idiay siudad ti Hebron. Dadduma kayatda ti anak ni Saul a ni Isboset nga agbalin nga ari, ngem dadduma kayatda ni David. Naggugubat dagiti dua a grupo, ngem iti kamaudiananna nangabak ti tattao ni David. Isut’ 30 tawen idi nagbalin nga ari. Isut’ nagturay ti pito ket kagudua a tawtawen idiay Hebron. Dadduma kadagiti annakna a lallaki a naiyanak sadiay isuda da Amnon, Absalom ken Adonia.

Immayen ti tiempo idi naparmek ni David ken ti buybuyotna ti siudad ti Jerusalem. Ni Joab, sabali manen nga anak a lalaki ni Sarvia a kabsat a babai ni David, ti nangidaulo iti pannakigubat. Isut’ ginunggonaan ni David babaen ti panangaramidna kenkuana a pangulo ti buybuyot. Itan nangrugin nga agturay ni David idiay siudad ti Jerusalem.