KALPASAN ipapanawda iti makingngato a kuarto, napan ni Jesus ken ti apostolesna idiay hardin ti Getsemani. Ita kuna ni Jesus kadakuada nga agsalukagda ken agkararagda. Sa immadayo bassit kadakuada, ket indumogna ti rupana tapno agkararag.

Kalpasanna nagsubli ni Jesus kadagiti apostolesna. Aniat’ kunam nga ar-aramidenda? Matmaturogda! Namitlo a kuna ni Jesus kadakuada nga agsalukagda, ngem tunggal agsubli makitana a matmaturogda. Kalpasanna kuna ni Jesus: ‘Dimtengen ti oras tapno maiyawatak kadagiti kabkabusorko.’

Iti dayta a kanito, maysa a bunggoy dagiti lallaki a nakakampilan ken sipapang-or ti immay! Idi nakaasidegdan, adda rimmuar iti tengnga ti bunggoy ket immasideg ken Jesus ket inagkanna. Ti lalaki ket isu ni Judas Iscariote. Apay nga inagkanna ni Jesus?

Nagimtuod ni Jesus: ‘Judas, liputannak aya babaen iti maysa nga agep?’ Wen, ti agep maysa a pagilasinan. Ipakaammo dayta kadagiti tattao a kakuyog ni Judas a daytoy ni Jesus, ti tao a kayatda. Gapu itoy dimmuklos dagiti kabusor ni Jesus a mangkemmeg kenkuana. Dagus a nanguyos ni Pedro ti kampilan nga itugtugotna ket tinagbatna ti tao nga asideg kenkuana. Naiyabas ti kampilan iti ulo ti lalaki ket napingas ti kannawan a lapayagna. Ngem sinagid ni Jesus ti lapayag ti lalaki ket inagasanna.

Kuna ni Jesus ken Pedro: ‘Isublim ti kampilan iti baina. Dika kadi ammo a mabalinko ti agdawat iti Amak ti rinibo nga anghel a mangisalakan kaniak?’ Wen, mabalinanna dayta! Ngem di nagdawat ni Jesus iti Dios kadagiti anghel, ta ammonan a daytoyen ti oras a panangala dagiti kabusorna kenkuana. Ket impalubosna nga isu ti ipanawda.