Ti Paraiso saanto a kas iti lubong a pagtataengantayo ita. Pulos a di kayat ti Dios a mapno ti daga iti riribuk ken ladingit, rigat ken panagsagaba. Iti masanguanan, ti Dios pagbalinennanto ti daga a paraiso. Anianto ti kaasping ti Paraiso? Kitaentayo no ania ti kunaen ti Biblia:

Naimbag a tattao. Ti Paraiso isunto ti pagtaengan dagiti gagayyem ti Dios. Naimbagdanto iti maysa ken maysa. Agbiagdanto a maitunos iti nalinteg a daldalan ti Dios.​—Proverbio 2:21.

Nawadwad a taraon. Idiay Paraiso, awanton ti bisin. Kuna ti Biblia: “Addanto kinaruay ti bukel [wenno, taraon] iti daga.”​—Salmo 72:16.

Napipintas a balbalay ken makaparagsak a trabaho. Iti Paraiso a daga, tunggal pamilia addaandanto iti bukodda a pagtaengan. Tunggal maysa agtrabahonto nga agpaay iti pudno a pagragsakan.​—Isaias 65:21-23.

 Sangalubongan a talna. Dagiti tattao saandanton nga agdadangadang ken matay iti gubat. Kuna ti Sao ti Dios: “[Ti Dios] pagsardengenna dagiti gubgubat.”​—Salmo 46:8, 9.

Naimbag a salun-at. Ikari ti Biblia: “Ti agtaeng [iti Paraiso] dinanto kunaen, Masakitak.” (Isaias 33:24) Kasta met, awanton ti pilay wenno bulsek wenno tuleng wenno di makasao.​—Isaias 35:5, 6.

Agpatingganton ti ut-ot, leddaang, ken ipapatay. Kuna ti Sao ti Dios: “Awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”​—Apocalipsis 21:4.

Awanton dagiti dakes a tattao. Ikari ni Jehova: “Dagiti nadangkes . . . magudasdanto ditoy daga; ket dagiti nagulib maparutdanto kenkuana.”​—Proverbio 2:22.

Agiinnayat ken agririnnaemto dagiti tattao. Agarinton ti hustisia, awanton ti panangirurumen, kinaagum, ken guranggura. Agkaykaysanton dagiti tattao ken agbiagda a maitunos iti nalinteg a daldalan ti Dios.​—Isaias 26:9.