Ti pannakigayyem iti Dios ti kasayaatan a mapasaram. Isuronaka ti Dios no kasano nga agbalinka a naragsak ken natalged; wayawayaannaka kadagiti adu nga ulbod a pammati ken makadangran nga ar-aramid. Imdenganna dagiti kararagmo. Tulongannaka a mangsagrap iti kinatalingenngen ken panagtalek. (Salmo 71:5; 73:28) Saranayennaka ti Dios iti tiempo ti rigat. (Salmo 18:18) Ken itukon ti Dios kenka ti sagutna a biag nga agnanayon.​—Roma 6:23.

Bayat ti iyaadanim iti Dios, sumingedkanto kadagiti gagayyem ti Dios. Agbalindanto met a gagayyemmo. Kinapudnona, kasladanto kakabsatmo a lallaki ken babbai. Maragsakandanto a mangisuro kenka maipapan iti Dios ken tulongan ken paregtaendakanto.

Saantay a kapada ti Dios. No makipagayamka iti Dios, masapul a maawatam ti napateg a kinapudno. Ti pannakipagayam iti Dios saan a panaggayyem dagiti agpada ti ranggona. Laklakay ken nasirsirib ken ad-adda a mannakabalin ngem datayo. Isu ti nainkalintegan nga Agturay kadatayo. Isu a no kayattay ti makigayyem kenkuana, umimdengtayo kenkuana ken aramidentay ti ibagana kadatayo. Daytoy ket kanayon a pagimbagantayo.​—Isaias 48:18.