Dinto ipalubos ni Jehova a dadaelen dagiti dakes a tattao ti Paraiso. Dagiti laeng gagayyemna ti agnaedto sadiay. Anianto ti mapasamak kadagiti dakes a tattao? Tapno maammuam ti sungbat, amirisem ti pudno nga estoria maipapan ken Noe. Nagbiag ni Noe rinibribu a tawenen ti napalabas. Maysa idi a naimbag a tao a kanayon a mangikagkagumaan a mangaramid iti pagayatan ni Jehova. Ngem nagaramid ti dakes dagiti dadduma a tattao ditoy daga. Isu nga imbaga ni Jehova ken Noe a mangyeg iti layus a mangdadael kadagiti amin a nadangkes a tattao. Imbagana ken Noe a mangaramid iti daong tapno isu ken ti pamiliana saanda a matay no dumteng ti Layus.​—Genesis 6:9-18.

Nagaramid ni Noe ken ti pamiliana iti daong. Pinakdaaran ni Noe dagiti tattao a dumtengen ti Layus, ngem saanda a dimngeg kenkuana. Intuloyda ti nagaramid iti dakes. Idi nalpasen ti daong, inserrek ni Noe dagiti animal iti daong, ket isu ken ti pamiliana simrekda metten. Kalpasanna inyeg ni Jehova ti napigsa a bagyo. Nagtudo iti 40 nga aldaw ken 40 a rabii. Linapunos ti danum ti intero a daga.​—Genesis 7:7-12.

 Dagiti nadangkes natayda, ngem ni Noe ken ti pamiliana naispalda. Sitatalged nga inispal ida ni Jehova iti Layus tapno agnaed iti maysa a daga a nadalusan iti kinadakes. (Genesis 7:22, 23) Kuna ti Biblia a dumtengto manen ti tiempo a dadaelen ni Jehova dagidiay madi nga agaramid iti naimbag. Dagiti naimbag a tattao saandanto a madadael. Agbiagdanto nga agnanayon iti Paraiso a daga.​—2 Pedro 2:5, 6, 9.

Adu a tattao itatta ti agaramid iti dakes. Ti lubong napno iti riribuk. Maulit-ulit nga ibaon ni Jehova dagiti Saksina tapno pakdaaranda dagiti tattao, kaskasdi a kaaduan ti saan a dumngeg kadagiti sasao ni Jehova. Dida kayat a balbaliwan ti daldalanda. Dida patien ti ibagbaga ti Dios maipapan ti naimbag ken dakes. Anianto ti mapasamak kadagitoy a tattao? Agbalbaliwdanto aya iti masanguanan? Adu ti saanto a pulos nga agbalbaliw. Umayen ti tiempo a madadaelto dagiti nadangkes ket saandanto a pulos nga agbiagen.​—Salmo 92:7.

Saanto a madadael ti daga; mapagbalinto a paraiso. Dagidiay agbalin a gagayyem ti Dios agbiagdanto nga agnanayon iti Paraiso a daga.​—Salmo 37:29.