No kayatmo ti makigayyem iti Dios, masapul nga annurotem ti relihion nga anamongan ti Dios. Kinuna ni Jesus a “dagiti pudno nga agdaydayaw” agdayawdanto a maitunos iti “kinapudno.” (Juan 4:23, 24) Adda laeng maymaysa nga umiso a pamay-an ti panagdayaw iti Dios. (Efeso 4:4-6) Ti pudno a relihion agturong iti biag nga agnanayon, ket ti ulbod a relihion agturong iti pannakadadael.​—Mateo 7:13, 14.

Mailasinmo ti pudno a relihion babaen ti panangpaliiw kadagiti tattao a mangan-annurot iti dayta. Tangay naimbag ni Jehova, dagidiay pudno nga agdaydayaw kenkuana masapul a naimbagda a tattao. No kasano a ti nasayaat a kayo ti kahel pataudenna dagiti nasayaat a kahel, patauden ti pudno a relihion dagiti nasayaat a tattao.​—Mateo 7:15-20.

Dagiti gagayyem ni Jehova adda nauneg a panagraemda iti Biblia. Ammoda a ti Biblia naggapu iti Dios. Palubosanda ti ibagbagana a mangiturong iti biagda, mangsolbar kadagiti problemada, ken tumulong kadakuada a mangammo iti Dios. (2 Timoteo 3:16) Ikagumaanda nga annuroten ti ikaskasabada.

 Dagiti gagayyem ni Jehova agiinnayatda. Babaen ti panangisurona kadakuada, panangagasna kadagidiay masakit, impakita ni Jesus ti ayatna kadagiti tattao. Dagidiay mangan-annurot iti pudno a relihion ipakitada met ti ayatda kadagiti sabsabali. Kas ken Jesus, saanda a laisen dagiti napanglaw wenno dagiti naiduma a puli. Kinuna ni Jesus a maammuan dagiti tattao dagiti adalanna babaen iti ipakitada nga ayat iti maysa ken maysa.​—Juan 13:35.

Idayaw dagiti gagayyem ti Dios ti naganna a Jehova. No adda tao a madi a mangaramat iti naganmo, agbalin kadi a nasinged a gayyemmo dayta a tao? Saan la ketdi! No adda gayyemtayo, awagantay iti naganna ken ibagatayo kadagiti sabsabali dagiti naimbag a bambanag maipapan iti dayta a gayyem. Isu a dagidiay agtarigagay a gayyem ti Dios aramatenda ti naganna ken saritaenda ti maipapan kenkuana kadagiti sabsabali. Kayat ni Jehova a kasta ti aramidentayo.​—Mateo 6:9; Roma 10:13, 14.

Kas ken Jesus, dagiti gagayyem ti Dios isuroda dagiti tattao maipapan iti Pagarian ti Dios. Ti Pagarian ti Dios ti nailangitan a gobierno a mamagbalinto iti daga a paraiso. Dagiti gagayyem ti Dios iranudda daytoy a naimbag a damag ti Pagarian ti Dios kadagiti sabsabali.​— Mateo 24:14.

Ikagkagumaan dagiti Saksi ni Jehova ti agbalin a gagayyem ti Dios. Raemenda ti Biblia ken agiinnayatda. Aramaten ken dayawenda met ti nagan ti Dios ken isuroda dagiti sabsabali maipapan iti Pagarian ti Dios. Dagiti Saksi ni Jehova ti mangan-annurot iti pudno a relihion ditoy daga itatta.