Maam-ammom ni Jehova babaen ti panangbasam iti Biblia. Idi unana nangpili ti Dios kadagiti tattao a nangisurat iti pampanunotna. Maawagan a Biblia dagidiay a sursurat. Maam-ammotayo ti Dios itatta babaen ti panagbasa iti Biblia. Agsipud ta linaon ti Biblia ti sao wenno mensahe ni Jehova, maawagan met dayta a Sao ti Dios. Mamatitayo iti ibagbaga ti Biblia agsipud ta ni Jehova pulos a di agulbod. ‘Di mabalin nga agulbod ti Dios.’ (Hebreo 6:18) Linaon ti Sao ti Dios ti kinapudno.​—Juan 17:17.

Ti Biblia ti maysa kadagiti kapatgan a sagut ti Dios kadatayo. Kaasping dayta ti surat ti naayat nga ama kadagiti annakna. Salaysayenna kadatayo ti kari ti Dios a mamagbalin iti daga a napintas a lugar a pagtaengan​—maysa a paraiso. Salaysayenna kadatayo ti inaramidna idi napalabas, ti madama nga ar-aramidenna, ken ti aramidennanto iti masanguanan nga agpaay kadagiti matalek nga annakna. Tulongannatay met a mangsolbar kadagiti parikuttayo ken mangsapul iti ragsak.​—2 Timoteo 3:16, 17.

 Gagayyem ti Dios dagiti Saksi ni Jehova; tulongandaka a mangtarus kadagiti pannursuro ti Biblia. Ibagam laeng kadakuada a kayatmo ti agadal iti Biblia. Saanda nga agpabayad gapu iti daytoy. (Mateo 10:8) Maysa pay, mabalinmo a tabunuan dagiti Nakristianuan a gimong. Maang-angay dagitoy kadagiti lugar a pagdaydayawan a maawagan iti Kingdom Hall. No tumabunoka kadagiti Nakristianuan a gimong, napartak a rumang-ay ti pannakaammom iti Dios.

Maam-ammom ti Dios babaen kadagiti bambanag nga inaramidna. Kas pagarigan, kunaen ti Biblia: “Ti Dios pinarsuana dagiti langlangit ken ti daga.” (Genesis 1:1) Idi pinarsua ni Jehova “dagiti langlangit,” inaramidna ti init. Ket ania ti ibaga dayta kadatayo maipapan iti Dios? Ibagana kadatayo a ni Jehova addaan iti dakkel a pannakabalin. Isu laeng ti makaaramid iti banag a nakaskasdaaw a kas iti init. Ibagana met kadatayo a masirib ni Jehova, yantangay masapul ti sirib tapno makaaramid iti init, nga agtultuloy a mangted iti pudot ken lawag ken di agpalia.

Dagiti parsua ni Jehova ipamatmatda nga ay-ayatennatayo. Panunotenyo dagiti amin a nadumaduma a kita ti prutas nga adda ditoy daga. Mabalin a maysa laeng koma a kita ti prutas ti impaay ni Jehova kadatayo​—wenno awan pay ketdi. Ngem, inikkannatay ketdi ni Jehova kadagiti adu a kita ti prutas a nadumaduma ti sukog, kadakkel, kolor, ken ramanda. Daytoy ipakitana a ni Jehova ket saan laeng a maysa a Dios a naayat no di ket naparabur unay ken maseknan ken naasi.​—Salmo 104:24.