Ti pannakipagayam naibatay iti ayat. No ad-adu ti maammuam maipapan ken Jehova, napegpeggesto ti panagayatmo kenkuana. Bayat a pumegpegges ti panagayatmo iti Dios, napaspasnek met ti tarigagaymo nga agserbi kenkuana. Daytoy tignayennaka nga agbalin nga adalan ni Jesu-Kristo. (Mateo 28:19) Babaen ti pannakitimpuyogmo iti naragsak a pamilia dagiti Saksi ni Jehova, masagrapmo ti pannakipagayam ti Dios iti agnanayon. Ania ti aramidem?

Ipakitam ti panagayatmo iti Dios babaen ti panangtungpal kadagiti lintegna. “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.”​—1 Juan 5:3.

Iyaplikarmo ti maadalmo. Adda insalaysay ni Jesus a mangyilustrar iti daytoy. Maysa a masirib a tao binangonna ti balayna iti rabaw ti bato. Ti maag a tao binangonna ti balayna iti rabaw ti darat. Idi dimteng ti napigsa a bagyo, saan a narba ti balay a naibangon iti rabaw ti bato, ngem narba ti balay a naibangon iti rabaw ti darat ket nakaro ti pannakadadaelna. Imbaga ni Jesus a dagidiay dumngeg kadagiti pannursurona ket aramidenda dagitoy kaaspingda ti masirib a tao a nagibangon iti rabaw ti bato. Ngem dagidiay immimdeng kadagiti pannursurona ket dida inaramid dagitoy kaaspingda ti maag a tao a nagibangon iti rabaw ti darat. Siasino ti tao a kayatmo a tuladen?​—Mateo 7:24-27.

 Dedikasion. Daytoy kaipapananna nga agkararagka ken Jehova ket ibagam kenkuana a kayatmo nga aramiden ti pagayatanna iti agnanayon. Ti panagaramid iti pagayatan ti Dios ipakitana nga adalannaka ni Jesu-Kristo.​—Mateo 11:29.

Bautismo. “Agpabautisarka ket ugasam dagiti basolmo babaen iti iyaawagmo iti naganna.”​—Aramid 22:16.

Naan-anay a makiramanka iti panagserbi iti Dios. “Aniaman ti ar-aramidenyo, aramidenyo dayta nga amin-kararua a kas maipaay ken Jehova, ket saan a maipaay kadagiti tattao.”​—Colosas 3:23.