Ni Jesu-Kristo ti Anak ni Jehova ken ti kasingedan, ingungotenna unay a gayyem. Sakbay a nagbiag kas tao ditoy daga, nagbiag ni Jesus idiay langit kas mannakabalin nga espiritu a parsua. (Juan 17:5) Kalpasanna, immay ditoy daga tapno isurona kadagiti tattao ti kinapudno maipapan iti Dios. (Juan 18:37) Intedna met ti natauan a biagna tapno maispal dagiti natulnog a tattao manipud iti basol ken ipapatay. (Roma 6:23) Ita, ni Jesus ti Ari ti Pagarian ti Dios, maysa a nailangitan a gobierno a mangyegto iti Paraiso ditoy daga.​—Apocalipsis 19:16.

Gagayyem met ti Dios dagiti anghel. Dagiti anghel saanda a nagbiag a kas tattao ditoy daga. Naparsuada idiay langit sakbay nga inaramid ti Dios ti daga. (Job 38:4-7) Adda minilion nga anghel. (Daniel 7:10) Kayat dagitoy a nailangitan a gagayyem ti Dios a maammuan dagiti tattao ti kinapudno maipapan ken Jehova.​—Apocalipsis 14:6, 7.

Adda met gagayyem ti Dios ditoy daga; awaganna ida a dagiti saksina. Ti saksi iti korte ibagana ti ammona maipapan iti maysa a tao wenno maysa a banag. Ibaga dagiti Saksi ni Jehova kadagiti sabsabali ti ammoda maipapan ken Jehova ken ti panggepna. (Isaias 43:10) Kas kadagiti anghel, dagiti Saksi kayatdakayo a tulongan a mangammo ti kinapudno maipapan ken Jehova. Kayatda nga agbalinkayo met a gayyem ti Dios.