Kanayon kadi a nalaka ti agtulnog kada tatang ken nanangmo?— Mabalin a narigat dayta no dadduma. Ngem ammom kadi a kanayon a nagtulnog ni Jesus ken Jehova ken kada tatang ken nanangna?— No tuladem ti inaramid ni Jesus, nalaklaka nga agtulnogka kada tatang ken nanangmo uray no kasla narigat kenka. Ammuenta ti ad-adu pay maipapan iti daytoy.

Sakbay nga immay ni Jesus ditoy daga, kaduana idi idiay langit ni Jehova nga Amana. Ngem adda met nagannak ni Jesus ditoy daga. Jose ken Maria ti naganda. Ammom kadi no kasanoda a nagbalin a nagannak ni Jesus?—

Ti biag ni Jesus idiay langit ket inyakar ni Jehova iti tian ni Maria tapno mayanak ken agbiag ditoy daga. Maysa daytoy a milagro! Kas kadagiti dadduma a maladaga iti tian ni nanangda, dimmakkel ni Jesus iti tian ni Maria. Kalpasan ti siam a bulan, nayanak ni Jesus. Daytoy ti makagapu a nagbalin da Maria ken Jose a nagannak ni Jesus ditoy daga.

Idi 12 ti tawen ni Jesus, adda inaramidna a mangipakita nga ay-ayatenna unay ti Amana a ni Jehova. Napasamak daytoy idi napan ti pamiliana idiay Jerusalem para iti Paskua. Idi agawiddan, saan a mabirokan da Maria ken Jose ni Jesus. Ammom kadi ti ayanna?—

Nagsubli a dagus da Jose ken Maria idiay Jerusalem tapno birokenda ni Jesus. Madanaganda unayen ta saanda a makita. Ngem kalpasan ti tallo nga aldaw, nasarakanda idiay templo. Ammom kadi no apay nga adda idiay ni Jesus?— Gapu ta adu ti masursurona idiay maipapan ken Jehova nga Amana. Ay-ayatenna ni Jehova ken kayatna a maammuan no kasanona a maparagsak. Uray idi nataenganen ni Jesus, kanayon a nagtulnog ken Jehova. Nagtulnog ni Jesus uray narigat para kenkuana ken kaipapanan dayta ti panagsagabana. Nagtulnog kadi met ni Jesus kada Jose ken Maria?— Wen, ibaga ti Biblia a nagtulnog ni Jesus.

Ania ti masursurom ken Jesus?— Masapul nga agtulnogka kada tatang ken nanangmo uray narigat dayta no dadduma. Aramidem kadi dayta?—