LEKSION 2
Kayat ni Rebecca a Paragsaken ni Jehova
Ay-ayaten unay ni Rebecca ni Jehova. Isaac ti nagan ni lakayna. Ay-ayatenna met ni Jehova. Kasano a naam-ammo ni Rebecca ni Isaac? Ania ti inaramid ni Rebecca tapno maragsakan ni Jehova? Ammuenta ti ad-adu pay maipapan kenkuana.
Da Abraham ken Sara ti tatang ken nanang ni Isaac. Aggigianda idiay Canaan. Dayta ti ayan dagiti tattao a saan nga agdaydayaw ken Jehova. Kayat idin ni Abraham a mangasawa ni Isaac, ngem daydiay koma agdaydayaw ken Jehova. Imbaonna ngarud ni Eliezer nga adipenna idiay Haran tapno agbirok iti asawa ni Isaac. Idiay nga aggigian dagiti kabagian ni Abraham.
Nakagaggaget ni Rebecca a nagsakdo iti danum para kadagiti kamelio
Kadua ni Eliezer a napan idiay Haran ti dadduma pay nga adipen ni Abraham. Nabayag ti biaheda. Nangikuyogda iti sangapulo a kamelio a nangilugananda iti makan ken regalo. Kasano nga ammo ni Eliezer no asino ti balasang a pilienna para ken Isaac? Idi simmangpet da Eliezer idiay Haran, nagsardengda iti maysa a bubon. Ngamin ammo ni Eliezer nga umay agsakdo dagiti tattao, isu a nagkararag ken Jehova. Kunana, ‘No ti balasang mangted kaniak iti danum ken ikkanna met dagiti kameliok, isu dayta ti pinilim.’
Idin, sumungaden ni Rebecca. Ibaga ti Biblia nga isu ket nakapimpintas. Dimmawat ni Eliezer iti danum ket imbaga ni Rebecca: ‘Sige apo, mangalaak iti danum para kenka ken painumek met dagiti kameliom.’ Agasem dayta! Adu ti inumen dagiti mawaw a kamelio. Isu a nagsublisubli ni Rebecca iti bubon. Makitam kadi iti ladawan no kasano karigat ti ar-aramidenna?— Kasla saan a mamati ni Eliezer iti sungbat ni Jehova iti kararagna.
Inikkan ni Eliezer ni Rebecca iti adu a napipintas a regalo. Inawis met ni Rebecca ni Eliezer ken ti kakaduana nga adipen iti balayda. Imbaga ni Eliezer no apay nga imbaon ni Abraham sadiay. Imbagana pay a sinungbatan ni Jehova ti kararagna. Maragsakan ti pamilia ni Rebecca nga isu ket agbalin nga asawa ni Isaac.
Kimmuyog ni Rebecca ken ni Eliezer idiay Canaan ket nakiasawa ken Isaac
Ngem kayat ngata ni Rebecca ti makiasawa ken Isaac?— Ammo ni Rebecca nga imbaon ni Jehova ni Eliezer. Ngarud, idi dinamag da tatang ken nanangna no kayatna ti mapan idiay Canaan, insungbatna: ‘Wen, kayatko.’ Dagus a kimmuyog ken Eliezer. Idi nakasangpetdan idiay Canaan, nagasawadan ken Isaac.
Nabendisionan ni Rebecca gapu ta inaramidna ti pagayatan ni Jehova. Kalpasan ti adu a tawen, nayanak ni Jesus iti linia ti pamiliana! No tuladem ni Rebecca, maparagsakmo ni Jehova ken bendisionannaka.
