No dadduma, katawaan wenno makaunget kadatayo dagiti tattao no ibagatayo ti maipapan ken Jehova. Isu a no dadduma, ditay kayaten ti agsao maipapan ken Jehova. Napadasam kadin dayta?— Ibaga ti Biblia ti maipapan iti agtutubo a mangay-ayat ken Jehova. Ngem dandani simmardeng a nagsao maipapan kenkuana. Jeremias ti naganna. Ammuenta ti ad-adu pay maipapan kenkuana.

Idi ubing pay ni Jeremias, binilin ni Jehova nga ibagana kadagiti tattao nga isardengda ti agaramid iti dakes. Marigatan ken mabuteng ni Jeremias a mangaramid iti dayta. Imbagana ken Jehova: ‘Diak ammo ti ibagak ta ubingak pay.’ Ngem kuna ni Jehova: ‘Dika agbuteng ta tulonganka.’

 Imbaga ngarud ni Jeremias kadagiti tattao a madusada no dida agbalbaliw. Inaramid ngata dagiti tattao ti imbaga ni Jeremias?— Saan. Kinatawaan ken nakaungetda kenkuana. Ania ngata ti narikna ni Jeremias?— Nagbuteng ket imbagana: ‘Diak kayaten ti agsao maipapan ken Jehova.’ Ngem talaga kadi a saanen a nagsao?— Saan. Ay-ayatenna unay ni Jehova isu nga intultuloyna ti nagsao maipapan ken Jehova. Gapu ta saan a simmuko ni Jeremias, insalakan ni Jehova.

Kas pagarigan, ni Jeremias ket intapuak idi dagiti dakes a lallaki iti bubon a napunno iti pitak. Awan ti makan ken mainumna. Kayat dagitoy a lallaki a matay ni Jeremias idiay. Ngem naisalakan ni Jeremias gapu ta tinulongan ni Jehova!

Ania ti maadalmo iti estoria maipapan ken Jeremias?— Uray mabuteng no dadduma, intultuloyna ti nagsao maipapan ken Jehova. No ibagam ti maipapan ken Jehova, mabalin a katawaandaka wenno makaungetda kenka. Mabalin a mabainanka wenno mabutengka. Ngem dika agsardeng nga agsao maipapan ken Jehova. Kanayon a tulongannaka ni Jehova kas iti panangtulongna ken Jeremias.