NAIBILIN kadagiti Kristiano a rambakanda ti Panglaglagip iti ipapatay ni Kristo. Maawagan met daytoy nga okasion iti “Pangrabii ti Apo.” (1 Corinto 11:20) Apay a napateg unay daytoy? Kaano ken kasano a marambakan?

Inyussuat ni Jesu-Kristo daytoy nga okasion iti rabii ti Paskua (Passover) dagiti Judio idi 33 K.P. Maminsan laeng iti makatawen a marambakan ti Paskua, iti maika-14 nga aldaw iti bulan ti Nisan iti kalendario dagiti Judio. Tapno makarkulo dayta a petsa, agminar nga urayen dagiti Judio ti spring equinox. Daytoy ti aldaw iti primavera nga addaan iti agarup 12 nga oras ti lawag ken 12 nga oras ti sipnget. Mangrugi ti Nisan iti baro a bulan a kaasitgan iti dayta nga aldaw. Maangay ti Paskua kalpasan ti 14 nga aldaw, no nakalneken ti init.

Rinambakan ni Jesus ti Paskua a kaduana dagiti apostolna, pinapanawna ni Judas Iscariote, sa inyussuatna ti Pangrabii ti Apo. Daytoy a pangrabii ti naisukat iti Paskua dagiti Judio, isu a maminsan laeng ngarud a marambakan iti kada tawen.

Kuna ti Ebanghelio ni Mateo: “Ni Jesus nangala iti tinapay ket, kalpasan ti panangisaona iti pamendision [wenno, kalpasan a nakapagyaman], pinispisina ket, idi intedna kadagiti adalan, kinunana, ‘Alaenyo, kanenyo. Daytoy  kaipapananna ti bagik.’ Kasta met, nangala iti kopa ket, idi nakapagyamanen, intedna kadakuada, a kunkunana: ‘Uminumkayo manipud iti dayta, dakayo amin; ta daytoy kaipapananna ti bukodko a “dara ti tulag,” a maiparukpok maigapu iti adu maipaay iti pannakapakawan dagiti basol.’”—Mateo 26:26-28.

Patien dagiti dadduma a pinagbalin ni Jesus a literal a lasagna ti tinapay ken pinagbalinna a darana ti arak. Nupay kasta, naan-anay pay ti nainlasagan a bagi ni Jesus idi intukonna daytoy a tinapay. Kinnan aya dagiti apostol ni Jesus ti literal a lasagna ken ininumda ti darana? Saan, ta kanibalismo ken maisalungasing dayta iti linteg ti Dios. (Genesis 9:3, 4; Levitico 17:10) Sigun iti Lucas 22:20, kinuna ni Jesus: “Daytoy a kopa kaipapananna ti baro a tulag babaen ti bileg ti darak, a maiparukpok maigapu kadakayo.” Literal aya a nagbalin a “baro a tulag” dayta a kopa? Imposible dayta agsipud ta ti tulag ket banag a nagnumuan, saan a pisikal.

No kasta, agpada a nausar a simbolo laeng ti tinapay ken ti arak. Ti tinapay isimsimbolona ti perpekto a bagi ni Kristo. Nagusar ni Jesus iti natda a tinapay a naidasar iti Paskua. Saan a nalebaduraan ti tinapay. (Exodo 12:8) Iti Biblia, masansan a naaramat ti lebadura a mangisimbolo iti basol wenno kinarugit. No kasta, ti tinapay itakderanna ti perpekto a bagi nga insakripisio ni Jesus. Saan a natulawan daytoy iti basol.—Mateo 16:11, 12; 1 Corinto 5:6, 7; 1 Pedro 2:22; 1 Juan 2:1, 2.

Ti nalabaga nga arak itakderanna ti dara ni Jesus. Dayta a dara ti nangpatalged iti baro a tulag. Kinuna ni Jesus a maiparukpok ti darana “maipaay iti pannakapakawan dagiti basol.” Iti kasta, mabalin a maibilang a nadalus dagiti tattao iti imatang ti Dios ken mabalinda ti maipasidong iti baro a tulag ken ni Jehova. (Hebreo 9:14; 10:16, 17) Gapu iti daytoy a tulag, makapan idiay langit dagiti 144,000 a matalek a Kristiano. Agserbida sadiay kas ar-ari ken papadi a pakabendisionan ti intero a sangatauan.—Genesis 22:18; Jeremias 31:31-33; 1 Pedro 2:9; Apocalipsis 5:9, 10; 14:1-3.

Siasino ti maikari a mangan kadagiti emblema iti Pangrabii ti Apo? Nainkalintegan a dagidiay laeng adda iti baro a tulag—kayatna a sawen, dagidiay addaan namnama a mapan idiay langit—ti maikari a mangan iti tinapay ken uminum iti arak. Ti nasantuan nga espiritu ti Dios ti mangkombinsir kadakuada nga isuda  ti napili nga agbalin nga ar-ari idiay langit. (Roma 8:16) Isuda met ti nangitulagan ni Jesus iti Pagarian.—Lucas 22:29.

Dagidiay ngay mangnamnama nga agbiag nga agnanayon iti Paraiso a daga? Kas panagtulnog iti bilin ni Jesus, sidadayaw a dar-ayanda ti Pangrabii ti Apo, ngem saanda a makipaset. Maminsan iti kada tawen kalpasan ti ilelennek ti init iti Nisan 14, ramrambakan dagiti Saksi ni Jehova ti Pangrabii ti Apo. Nupay sumagmamano laeng a ribu iti intero a lubong ti addaan iti nailangitan a namnama, napateg kadagiti amin a Kristiano daytoy nga okasion. Iti dayta nga okasion, addaantayo amin iti gundaway a mangutob iti kasayaatan nga ebkas ti ayat ni Jehova a Dios ken ni Jesu-Kristo.—Juan 3:16.