1, 2. Ania ti aramidentayo tapno agtalinaedtayo iti ayat ti Dios?

 KAYATTAYO amin ti agbalin a nakired ken nasalun-at, isu nga ikagkagumaantayo ti mangan iti nasustansia, regular nga agehersisio, ken mangaywan iti bagitayo. Nupay masapul ti panagregget, matagiragsaktayo dagiti resultana, isu a kanayon nga aramidentayo dayta. Ngem masapul met a nakired ken nasalun-attayo iti sabali pay a pamay-an.

² Uray no nairugitayon nga am-ammuen ni Jehova, masapul nga itultuloytayo a patibkeren ti relasiontayo kenkuana. Idi pinaregta ni Judas dagiti Kristiano nga ‘agtalinaedda iti ayat ti Dios,’ inlawlawagna no kasano nga aramidenda dayta. Kinunana: “Pabilgenyo ti nasantuan a pammatiyo.” (Judas 20, 21) Kasanotayo ngarud a mapabileg ti pammatitayo?

3-5. (a) Ania ti kayat ni Satanas a mariknam maipapan kadagiti pagalagadan ni Jehova? (b) Ania ti makunam maipapan kadagiti linteg ken prinsipio ni Jehova?

³ Nagpateg a kombinsidoka a mismo a dagiti dalan ni Jehova ti kasayaatan. Kayat ni Satanas a panunotem a nakarigrigat a suroten dagiti pagalagadan ti Dios ken naragragsakka no sika a mismo ti mangikeddeng no ania ti naimbag ken dakes. Nanipud pay idiay hardin ti Eden, ikagkagumaanen ni Satanas a patien dayta dagiti  tattao. (Genesis 3:1-6) Kasta pay laeng ti ar-aramidenna ita.

⁴ Husto kadi ni Satanas? Nagrigat kadi a suroten dagiti pagalagadan ni Jehova? Saan. Kas pagarigan, panunotem a magmagnaka iti napintas a parke. Nakitam nga adda pasetna a naaladan iti nangato. Baka panunotem, ‘Apay a naaladan?’ Idi kuan, nakangngegka iti ngumerngernger a leon iti bangir ti alad. Ania ti mariknam itan maipapan iti alad? Agyamanka ta adda dayta nga alad a mangprotektar kenka tapno saannaka a kanen ti leon! Dagiti prinsipio ni Jehova ket kas iti dayta nga alad, ken ti Diablo ket kas iti dayta a leon. Ipakdaar ti Sao ti Dios: “Usarenyo ti abilidadyo nga agpanunot, agbantaykayo! Ti kabusoryo, ti Diablo, ket agsursursor a kasla leon a ngumerngernger, nga agsapsapul iti alun-onenna.”​—1 Pedro 5:8.

⁵ Kayat ni Jehova a masagraptayo ti kasayaatan a biag. Dina kayat a maallilawnatayo ni Satanas. Isu nga inikkannatayo kadagiti linteg ken prinsipio a mangprotektar ken mangparagsak kadatayo. (Efeso 6:11) Insurat ni Santiago: “Ti mangsukimat iti perpekto a linteg a mangiturong iti wayawaya ken agtultuloy iti dayta . . . naragsakto iti aramidenna.”​—Santiago 1:25.

6. Kasanotayo nga agbalin a kombinsido a dagiti dalan ti Dios ti kasayaatan?

⁶ No surotentayo dagiti bilin ni Jehova, sumayaat ti biagtayo ken tumibker ti pannakigayyemtayo kenkuana. Kas pagarigan, magunggonaantayo no awatentayo ti awisna a kanayon nga agkararagtayo kenkuana. (Mateo 6:5-8; 1 Tesalonica 5:17) Naragsaktayo no tungpalentayo ti bilinna nga agtataripnong tapno agdaydayaw kenkuana ken agpipinnaregta ken naan-anay a makiraman iti  panangasaba ken panangisuro. (Mateo 28:19, 20; Galacia 6:2; Hebreo 10:24, 25) No panunotentayo no kasano a bimmileg ti pammatitayo gapu kadagita, ad-adda a kombinsidotayo a dagiti dalan ni Jehova ti kasayaatan.

7, 8. Ania ti makatulong kadatayo tapno ditay madanagan kadagiti pannubok a mabalin a dumtengto?

⁷ Mabalin a madanagantayo a baka maipasangotayto kadagiti nakarigrigat a pannubok iti pammati. No kasta ti mariknam, laglagipem ti imbaga ni Jehova: “Siak, ni Jehova a Diosyo, Daydiay mangisursuro kadakayo tapno magunggonaankayo, Daydiay mangiturturong iti dalan a rumbeng a pagnaanyo. No laeng koma tungpalenyo dagiti bilinko! Iti kasta, agbalin ti talnayo a kas iti karayan, ken ti kinalintegyo a kas kadagiti dalluyon ti baybay.”​—Isaias 48:17, 18.

 ⁸ No agtulnogtayo ken Jehova, ti talnatayo ket kas iti karayan a saan a maatianan, ken ti kinalintegtayo ket kas kadagiti dalluyon ti baybay a kanayon a dumanon iti igid ti baybay. Aniaman ti mapasamak iti biagtayo, kabaelantayo ti agbalin a matalek. Ikarkari ti Biblia: “Ipalladawmo ken Jehova ti dadagsenmo, ket saranayennakanto. Dinanto pulos ipalubos a matumba ti nalinteg.”​—Salmo 55:22.

9, 10. Ania ti kaipapanan ti panagbalin a nataengan?

⁹ Bayat a patpatibkerem ti relasionmo ken Jehova, ‘agtultuloy ti panagrang-aymo iti kinanataengan.’ (Hebreo 6:1) Ania ti kaipapanan ti panagbalin a nataengan?

¹⁰ Saantayo nga agbalin a nataengan a Kristiano gapu laeng ta manaynayonan ti edadtayo. Tapno agbalintayo a nataengan, masapul a pagbalinentayo ni Jehova a kasayaatan a Gayyemtayo ken ikagumaantayo a tuladen ti panangmatmatna kadagiti bambanag. (Juan 4:23) Insurat ni Pablo: “Ti bambanag iti lasag ti pampanunoten dagidiay agbibiag maitunos iti lasag, ngem ti bambanag iti espiritu ti pampanunoten dagidiay agbibiag maitunos iti espiritu.” (Roma 8:5) Ti nakaipamaysaan ti panunot ti nataengan a tao ket saan a dagiti ragragsak ken material a bambanag no di ket ti panagserbi ken Jehova ken panangaramid kadagiti nainsiriban a desision. (Proverbio 27:11; basaen ti Santiago 1:2, 3.) Saan nga agpaimpluensia nga agaramid iti dakes. Ammo ti nataengan a tao ti umiso ket determinado a mangaramid iti dayta.

11, 12. (a) Ania ti kuna ni Pablo maipapan iti ‘abilidad ti maysa a Kristiano nga agpanunot’? (b) Kasano a ti panagbalin a nataengan a Kristiano ket kas iti panagbalin nga atleta?

¹¹ Kasapulan ti panagregget tapno agbalintayo a  nataengan. Insurat ni apostol Pablo: “Ti natangken a makan ket para kadagiti nataengan a tattao, a gapu iti kanayon a panangusarda iti abilidadda nga agpanunot, nasursurodan nga ilasin ti umiso ken di umiso.” (Hebreo 5:14) Ti sao a “nasursurodan” mabalin nga ipalagipna kadatayo ti panagsanay ti maysa nga atleta.

¹² No makabuyatayo iti nalaing nga atleta a madama nga agay-ayam, ammotayo nga adu a tiempo ken panagsanay ti binusbosna tapno agbalin a nalaing. Saan a nayanak nga atleta. No mayanak ti ubing, dina pay ammo nga usaren dagiti ima ken sakana. Ngem inton agangay, masursurona ti mangiggem iti bambanag ken magna. Babaen ti panagsanay, makapagbalin nga atleta. Kasapulantayo met ti tiempo ken panagsanay tapno agbalintayo kas nataengan a Kristiano.

13. Ania ti makatulong kadatayo tapno masursurotayo a tuladen ti panagpampanunot ni Jehova?

¹³ Iti daytoy a libro, naadaltayo no kasano ti agpanunot a kas iti panagpanunot ni Jehova ken ti panangtulad iti panangmatmatna. Nasursurotayo nga apresiaren ken ipateg dagiti pagalagadan ni Jehova. No agaramidtayo kadagiti desision, isaludsodtayo iti bagitayo: ‘Ania dagiti linteg wenno prinsipio ti Biblia nga agaplikar iti daytoy a situasion? Kasanok nga iyaplikar dagita? Ania ti kayat ni Jehova nga aramidek?’​—Basaen ti Proverbio 3:5, 6; Santiago 1:5.

14. Ania ti masapul nga aramidentayo tapno bumileg ti pammatitayo?

¹⁴ Saantayo a pulos nga agsardeng a mangpabileg iti pammatitayo ken Jehova. No kasano a makatulong ti pannangan iti nasustansia tapno kumired ti bagitayo, makatulong met ti panagsursuro maipapan ken Jehova tapno bumileg ti pammatitayo. Idi nangrugitayo nga agadal iti  Biblia, naammuantayo dagiti kangrunaan a kinapudno maipapan ken Jehova ken kadagiti dalanna. Ngem bayat nga aglabas ti panawen, masapul a maawatantayo dagiti naun-uneg a bambanag. Dayta ti kayat a sawen ni Pablo idi imbagana: “Ti natangken a makan ket para kadagiti nataengan a tattao.” Agbalintayo a masirib bayat nga iyaplikartayo dagiti nasursurotayo. Ibaga kadatayo ti Biblia: “Ti sirib ti kapatgan.”​—Proverbio 4:5-7; 1 Pedro 2:2.

15. Kasano kapateg ti napudno a panagayattayo ken Jehova ken kadagiti kakabsattayo?

¹⁵ Mabalin a nakired ken nasalun-at ti maysa a tao ngem tapno kanayon a kasta, ammona a masapul nga agtultuloy nga aywananna ti bagina. Iti umasping a pamay-an, ammo ti nataengan a tao a masapul nga ikagumaanna a pagtalinaeden a natibker ti relasionna ken Jehova. Ipalagip kadatayo ni Pablo: “Itultuloyyo a suboken no agbibiagkayo maitunos iti pammati; itultuloyyo a paneknekan no aniakayo.” (2 Corinto 13:5) Ngem saan la a ti nabileg a pammati ti kasapulan. Masapul nga agtultuloy a dumakkel ti panagayattayo ken Jehova ken kadagiti kakabsattayo. Kinuna ni Pablo: ‘No addaanak iti pannakaammo, ken no addaanak iti pammati tapno mayakarko dagiti bantay, ngem awan ayatko, awan serserbik.’​—1 Corinto 13:1-3.

16. Ania ti kayat ni Satanas a mariknatayo?

¹⁶ Kayat ni Satanas a panunotentayo a ditay pulos naan-anay a maparagsak ni Jehova. Kayatna a maupaytayo ken panunotentayo nga awan ti solusion dagiti problematayo. Dina kayat nga agtalektayo kadagiti padatayo a Kristiano, ken dina kayat a naragsaktayo. (Efeso 2:2) Ammo ni Satanas a ti negatibo a panagpampanunot ket  makadangran kadatayo ken mangdadael iti relasiontayo iti Dios. Ngem inikkannatayo ni Jehova iti panglabantayo iti negatibo a panagpampanunot​—ti namnamatayo.

17. Kasano kapateg ti namnama?

¹⁷ Iti 1 Tesalonica 5:8, impada ti Biblia ti namnamatayo iti helmet a mangprotektar iti ulo ti soldado iti paggugubatan. Inawaganna dayta a helmet kas “ti namnama ti pannakaisalakan.” Ti panangnamnama kadagiti kari ni Jehova ti mangprotektar iti isiptayo ken tumulong a manglaban kadagiti negatibo a pampanunotentayo.

18, 19. Kasano a nakatulong ken Jesus ti namnama?

¹⁸ Bimmileg ni Jesus gapu iti namnamana. Iti maudi a rabii ti biagna ditoy daga, sinangona ti nagsasaruno a narigat a situasion. Trinaidor ti maysa a nasinged a gayyemna. Ti met sabali inlibakna nga am-ammona ni Jesus. Binaybay-an ken pinanawan pay ti dadduma. Binusor dagiti mismo a kailianna ken impapilitda a maparigat  agingga a matay. Ania ti nakatulong kenkuana a mangibtur kadagitoy a nasaem a situasion? “Gapu iti rag-o a naikabil iti sangona, saan a nagbain a nangibtur iti kayo a pagtutuokan, ket nagtugaw iti makannawan ti trono ti Dios.”​—Hebreo 12:2.

¹⁹ Ammo ni Jesus a no agtalinaed a matalek, maipadayagna ni Amana ken mapaneknekanna nga ulbod ni Satanas. Dayta a namnama ti nangyeg kenkuana iti dakkel a rag-o. Ammona met nga asideg idin a makaduana manen ni Amana idiay langit. Dayta a namnama ti nakatulong kenkuana nga agibtur. Kas ken Jesus, masapul a kanayon a panunotentayo ti namnamatayo. Matulongannatayo dayta nga agibtur aniaman ti mapasamak.

20. Ania ti makatulong kenka nga agbalin a positibo?

²⁰ Makitkita ni Jehova ti pammati ken panagibturmo. (Isaias 30:18; basaen ti Malakias 3:10.) Ikarkarina nga “itednanto kenka dagiti tarigagay ti pusom.” (Salmo  37:4) Kanayon ngarud a panunotem ti namnamam. Kayat ni Satanas a mapukawmo ti namnamam ken panunotem a saan a pulos matungpal dagiti kari ni Jehova. Ngem dika agpaabak iti negatibo a panagpampanunot! No madlawmo a kumudkudrepen ti namnamam, agpatulongka ken Jehova. Laglagipem ti kuna ti Filipos 4:6, 7: “Dikay madanagan iti aniaman, no di ket ipakaammoyo koma iti Dios ti amin a kiddawyo babaen ti kararag ken panagpakaasi, agraman panagyaman; ket ti talna ti Dios a mangartap iti amin a pannakaawat salaknibannanto ti puso ken isipyo babaen ken Kristo Jesus.”

21, 22. (a) Ania ti panggep ni Jehova para iti daga? (b) Ania ti ikagumaam nga aramiden?

²¹ Regular nga iwayaam nga utoben ti nagsayaat a masanguanan. Din agbayag, amin a sibibiag a tattao ket agdaydayawton ken Jehova. (Apocalipsis 7:9, 14) Panunotem ti biag iti baro a lubong. Nasaysayaatto dayta ngem iti aniaman a mapanunottayo! Awanton ni Satanas, dagiti demoniona, ken ti amin a kinadakes. Saankanton nga agsakit ken matay. Inaldaw nga agriingka a napigsa ken naragsak. Agtitinnulongto ti amin a mamagbalin iti daga a paraiso. Addanto nasustansia a taraon ken natalged a pagyanan ti amin. Saanton a dakes ken naranggas dagiti tattao no di ket nakaim-imbagdanton iti maysa ken maysa. Inton agangay, matagiragsakto ti amin a tattao ditoy daga ti “nadayag a wayawaya dagiti annak ti Dios.”​—Roma 8:21.

²² Kayat ni Jehova a pagbalinem isuna a kasayaatan a Gayyemmo. Aramidem ngarud ti amin a kabaelam nga agtulnog ken Jehova ken agbalin a nasingsinged kenkuana iti kada aldaw. Wen, sapay koma ta agtalinaedtayo amin iti ayat ti Dios iti agnanayon!​—Judas 21.