KAPITULO 16
Busorenyo ti Diablo
“Busorenyo ti Diablo, ket panawannakayto.”—SANTIAGO 4:7.
1, 2. Ania ti masapul a maawatantayo maipapan ken Satanas ken kadagiti demonio?
NAGSAYAATTO ti biag idiay baro a lubong ni Jehova. Agbiagtayto a kas iti pinanggep ti Dios a panagbiagtayo. Ngem agbibiagtayo ita iti lubong a kontrolado ni Satanas ken dagiti demoniona. (2 Corinto 4:4) Ngem uray no ditay ida makita, addada ken nakabilbilegda.
2 Iti daytoy a kapitulo, adalentayo no kasano a makapagtalinaedtayo a nasinged ken Jehova ken masalakniban ti bagitayo manipud ken Satanas. Ikarkari ni Jehova a tulongannatayo. Ngem masapul a maawatantayo dagiti pamay-an ni Satanas ken dagiti demoniona a mangallilaw ken mangatakar kadatayo.
“KASLA LEON A NGUMERNGERNGER”
3. Ania ti kayat ti Diablo nga aramiden kadatayo?
3 Ibagbaga ni Satanas nga agdaydayaw ken Jehova dagiti tattao gapu kadagiti managimbubukodan a rason ken agsardengtayo nga agserbi Kenkuana no rumigat unay ti bambanag. (Basaen ti Job 2:4, 5.) No ipakpakita ti maysa a kayatna ti agadal maipapan ken Jehova, makitkita dayta ni Satanas ken dagiti demonio ket padasenda a pasardengen. Makapungtotda no agdedikar ken Jehova ken agpabautisar ti maysa. Impada ti Biblia ti Diablo iti “leon a ngumerngernger, nga agsapsapul iti alun-onenna.” (1 Pedro 5:8) Kayat ni Satanas a dadaelen ti relasiontayo ken Jehova.—Salmo 7:1, 2; 2 Timoteo 3:12.
Makapungtot ni Satanas no idedikartayo ti biagtayo ken Jehova
4, 5. (a) Ania ti saan a kabaelan nga aramiden ni Satanas? (b) Ania ti kaipapanan ti “busorenyo ti Diablo”?
4 Ngem saan a masapul nga agbutengtayo ken Satanas ken kadagiti demoniona. Linimitaran ni Jehova ti mabalinda nga aramiden kadatayo. Ikarkari ni Jehova a ti “dakkel a bunggoy” dagiti pudno a Kristiano ket maisalakanto “iti dakkel a rigat.” (Apocalipsis 7:9, 14) Awan ti maaramidan ti Diablo a manglapped iti dayta ta salsalakniban ni Jehova ti ilina.
5 No agtalinaedtayo a nasinged ken Jehova, saan a madadael ni Satanas ti relasiontayo Kenkuana. Ipasigurado ti Sao ti Dios: “Adda kadakayo ni Jehova bayat nga agtalinaedkayo kenkuana.” (2 Cronicas 15:2; basaen ti 1 Corinto 10:13.) Adu a matalek a lallaki ken babbai idi un-unana a kas kada Abel, Enoc, Noe, Sara, ken Moises ti nangbusor iti Diablo babaen ti panagtalinaedda a nasinged ken Jehova. (Hebreo 11:4-40) Kabaelantayo met nga aramiden ti kasta. Ikari ti Sao ti Dios: “Busorenyo ti Diablo, ket panawannakayto.”—Santiago 4:7.
“MAKILABLABANTAYO”
6. Kasano ti panangatakar kadatayo ni Satanas?
6 Nupay ammo ni Satanas a linimitaran ni Jehova ti kabaelanna nga aramiden kadatayo, padpadasenna latta nga aramiden ti aniaman tapno kumapuy ti relasiontayo iti Dios. Adu ken nagduduma ita ti pamay-an ti Diablo a mangatakar, ken us-usarenna dagiti estratehiana iti rinibun a tawen. Ania ti dadduma kadagita?
7. Apay nga at-atakaren ni Satanas ti ili ni Jehova?
7 Insurat ni apostol Juan: “Ti intero a lubong ket adda iti pannakabalin daydiay managdakdakes.” (1 Juan 5:19) Kontrolado ni Satanas daytoy dakes a lubong ken kayatna met a kontrolen ti ili ni Jehova. (Mikias 4:1; Juan 15:19; Apocalipsis 12:12, 17) Ammo ti Diablo a nagbassiten ti nabati a tiempona, isu a nakaro ti panangparigatna iti tunggal maysa kadatayo tapno tallikudantayo ti Dios. No dadduma, us-usaren ti Diablo ti direkta a panangatakar, ngem no dadduma, saan unay a madlaw dagiti panangatakarna.
8. Ania ti masapul a bigbigen ti tunggal Kristiano?
8 Mabasatayo iti Efeso 6:12: “Makilablabantayo [“makigubgubaltayo,” footnote] . . . maibusor kadagiti dakes nga espiritu a puersa kadagiti nailangitan a disso.” Tunggal Kristiano ket makilablaban iti Diablo ken kadagiti demonio. Masapul a bigbigentayo nga amin a nagdedikar ken Jehova ket karaman iti daytoy a gubat. Iti surat ni apostol Pablo kadagiti taga-Efeso, namitlo nga imparegtana kadagiti Kristiano nga ‘agtakderda a sititibker.’—Efeso 6:11, 13, 14.
9. Ania ti padpadasen ni Satanas ken dagiti demonio nga aramiden kadatayo?
9 Padpadasennatayo nga allilawen ni Satanas ken dagiti demonio iti agduduma a pamay-an. Dina kayat a sawen a no nalabanantayo ni Satanas iti naminsan, dinatayon maabak iti sabali a gundaway. Ikagkagumaan ti Diablo a biroken dagiti pagkapuyantayo tapno mapilina dagiti silo a pangtiliwna kadatayo. Ngem saantayo a masapul a masiluan ta isursuro ti Biblia dagiti silo ti Diablo. (2 Corinto 2:11; kitaen ti Endnote 31.) Ti demonismo ti maysa kadagita.
KANAYON NGA ADAYWANYO DAGITI DEMONIO
10. (a) Ania ti demonismo? (b) Ania ti panangmatmat ni Jehova iti demonismo?
10 Ti demonismo ket konektado iti karkarna a bambanag a mangyasideg iti maysa a tao kadagiti demonio babaen ti panagpadles, panagkulam, panagtamay, orasion, wenno panangpadas a makisarita iti natay. Ibaga ti Biblia a ti demonismo ket “kagura” ti Dios isu a saantayo a mabalin a paggiddanen ti pannakiraman iti demonismo ken ti panagdaydayawtayo ken Jehova. (Deuteronomio 18:10-12; Apocalipsis 21:8) Masapul a naan-anay a liklikan dagiti Kristiano ti amin a klase ti demonismo.—Roma 12:9.
11. Ania ti mabalintayo nga aramiden no agusiosotayo kadagiti karkarna a banag?
11 Ammo ni Satanas a no maallukoytayo kadagiti karkarna a banag, nalaklakanatayo a siluan iti demonismo. Aniaman a klase ti demonismo ket mangdadael iti relasiontayo ken Jehova.
PADPADASENNATAYO NGA ALLILAWEN NI SATANAS
12. Kasano ti panangimpluensia ni Satanas iti panagpampanunottayo?
12 Padpadasen a tikawen ni Satanas ti panagpampanunot dagiti tattao. In-inut a mangimula iti panagduadua agingga a panunotenen dagiti tattao a “dakes ti naimbag ken naimbag ti dakes.” (Isaias 5:20) Isaksaknap ti Diablo ti ideya a saanen a makatulong ti balakad ti Biblia ken naragragsaktayo no ditay suroten dagiti pagalagadan ti Dios.
13. Kasano a pinadas ni Satanas ti mangimula kadagiti panagduadua?
13 Ti panangiwaras iti panagduadua ti maysa kadagiti kaepektibuan a pamay-an ni Satanas. Nabayagen nga us-usarenna dayta. Idiay hardin ti Eden, pinadasna ti mangimula iti panagduadua idi insaludsodna ken Eva: “Agpayso kadi nga imbaga ti Dios a saanyo a kankanen ti bunga ti tunggal kayo iti hardin?” (Genesis 3:1) Idi tiempo ni Job, insaludsod ni Satanas ken Jehova iti sango dagiti anghel: “Agbuteng aya ni Job iti Dios nga awan gapgapuna?” (Job 1:9) Kalpasan a nabautisaran ni Jesus, kinarit ni Satanas babaen ti panangibagana: “No sika ket anak ti Dios, ibagam kadagitoy a bato nga agbalinda a tinapay.”—Mateo 4:3.
14. Kasano a pagduaduaen ni Satanas dagiti tattao no napeggad met laeng ti demonismo wenno saan?
14 Itultuloy ita ti Diablo ti mangimula kadagiti panagduadua. Padpadasenna nga allukoyen dagiti tattao a mangkuestionar no talaga met la a dakes ti demonismo babaen ti panamagbalinna a kasla saan a dakes ti dadduma a klase dayta. Uray ti dadduma a Kristiano ket dida nakita dagiti peggadna. (2 Corinto 11:3) Ania ngarud ti aramidentayo tapno masalaknibantayo ti bagitayo? Kasanotay a masigurado a saantayo a maallilaw kadagiti taktika ni Satanas? Sukimatentayo ti dua a pamay-an a mabalin a maallilawnatayo: paglinglingayan ken panagpaagas.
US-USAREN NI SATANAS DAGITI NATURAL A TARIGAGAYTAYO KONTRA KADATAYO
15. Kasano a mabalin a makikadkaduatayo gayamen kadagiti demonio babaen ti paglinglingayantayo?
15 Ita, adu a pelikula, video, pabuya iti TV, computer games, ken Internet site ti mangitampok kadagiti demonio, mahika, ken karkarna a pannakabalin. Para iti adu, di makadangran a pagraragsakan dagita ken dida pampanunoten ti peggad ti panangipalubos iti iseserrek dagiti demonio iti biagda. Mabalin met a makipaset ti maysa a tao iti demonismo babaen kadagiti banag a kas iti horoscope, panagpalad, baraha, ken bola a kristal. Ilemlemmeng ti Diablo ti peggad ken pagbalinenna dagita a kasla misterioso, makaallukoy, ken makaparagsak. Mabalin pay ketdi a panunoten ti maysa a tao a saan a makadangran ti panagbuya iti aniaman nga adda koneksionna kadagiti demonio wenno kadagiti karkarna a pannakabalin no la ket ta saan nga aktual a makipaspaset iti demonismo. Apay a peligroso ti kasta a panagpampanunot?—1 Corinto 10:12.
16. Apay a masapul a saantayo a paglinglingayan dagiti mangitampok iti karkarna a pannakabalin?
16 Saan a mabasa ni Satanas ken dagiti demonio ti isiptayo. Ngem kabaelanda nga ammuen ti tarigagay ken panagpampanunottayo babaen ti panangpaliiwda kadagiti desisiontayo para iti bagitayo ken iti pamiliatayo, a pakairamanan dagiti pilpilientayo a paglinglingayan. No ti kayattayo a paglinglingayan ket dagiti pelikula, musika, wenno libro maipapan kadagiti mannakiuman iti espiritu, orasion a konektado iti mahika, linuganan dagiti demonio, mangkukulam, bampira, wenno ti kapada dagita, ammo ni Satanas ken dagiti demonio nga agusiosotayo maipapan kadagita. Mabalin a padasendatayo pay ketdi nga isungsong tapno lallalo a makipasettayo iti demonismo.—Basaen ti Galacia 6:7.
17. Kasano a mabalin a gundawayan ni Satanas ti tarigagaytayo nga agbalin a nasalun-at?
17 Mabalin met a gundawayan ni Satanas ti tarigagaytayo nga agbalin a nasalun-at. Adu ita ti agsaksakit. Nalabit pinadasen ti maysa ti agduduma a panangagas ngem awan latta. (Marcos 5:25, 26) Nalabit desperadon isu a kayatna a padasen lattan ti aniaman. Ngem kas Kristiano, masapul a ditay pilien dagiti panangagas nga agusar iti “panagsalamangka.”—Isaias 1:13.
Agpannurayka ken Jehova no agsakitka
18. Ania dagiti panangagas a liklikan dagiti Kristiano?
18 Iti nagkauna nga Israel, adda dagiti nagusar iti “panagsalamangka.” Imbaga ni Jehova kadakuada: “No iyukradyo dagiti dakulapyo, saankayo a kitaen. Uray no mamin-adu nga agkararagkayo, saanak a dumngeg; napno dagiti imayo iti dara.” (Isaias 1:15) Panunotem—saan pay ketdi a kayat a denggen ni Jehova dagiti kararagda! Ditay kayat ti mangaramid iti aniaman a mangdadael iti relasiontayo ken Jehova ken mangaramid iti aniaman a panggapuanna a saannatayo a tulongan, nangruna no agsakittayo. (Salmo 41:3) Masapul ngarud nga ammuentayo no ti pampanunotentayo a panangagas ket adda koneksionna iti demonismo wenno karkarna a pannakabalin. (Mateo 6:13) No adda posibilidadna a konektado iti dayta, masapul a liklikantayo!—Kitaen ti Endnote 32.
DAGITI ESTORIA MAIPAPAN KADAGITI DEMONIO
19. Kasano a pinagbalin ti Diablo a mabutbuteng ti adu a tattao?
19 Nupay pagarupen ti dadduma a saan nga agpaypayso ti Diablo ken dagiti demonio, ammo ti dadduma a pudpudnoda gapu kadagiti mismo a kapadasanda. Adu ti mabutbuteng kadagiti dakes nga espiritu ken mamatpati kadagiti inaanito a kostumbre. Iwarwaras ti dadduma ti panagbuteng kadagiti demonio babaen ti panangyestoriada kadagiti dakes nga ar-aramiden dagita a demonio kadagiti tattao. Masansan a masmasdaaw dagiti tattao kadagita nga estoria ken magagaranda a mangyestoria kadagita. Masansan a gapu kadagita nga estoria a kabuteng dagiti tattao ti Diablo.
20. Kasanotay a maiwaras dagiti kinaulbod ni Satanas?
20 Panunotem daytoy—kayat ni Satanas a kabuteng isuna dagiti tattao. (2 Tesalonica 2:9, 10) Isu ket ulbod ken ammona no kasano nga impluensiaan ti isip dagiti naallukoy iti demonismo ken kayatna a patienda dagiti saan a talaga nga agpayso. Mabalin nga iyestoria dagita a tattao dagiti pagarupenda a nakita ken nangngegda. No ulit-ulitenda dagita nga estoria, manaynayonanton. Ditay kayat a tulongan ni Satanas a mangiwaras iti panagbuteng babaen ti panangulit kadagita nga estoria.—Juan 8:44; 2 Timoteo 2:16.
21. Imbes nga iyestoriatayo ti maipapan kadagiti demonio, ania ti pagsasaritaantayo?
21 No ti maysa nga agserserbi ken Jehova ket naaddaan iti kapadasan kadagiti demonio, saanna nga estoriaen dayta tapno malinglingay ti sabsabali. Masapul a saan a kabuteng ti ili ni Jehova ti aniaman a maaramidan ti Diablo ken dagiti demoniona. Masapul ketdi a panunotentayo ni Jesus ken ti pannakabalin nga inted ni Jehova kenkuana. (Hebreo 12:2) Saan a lininglingay ni Jesus dagiti adalanna kadagiti estoria maipapan kadagiti demonio. Impangpangrunana ti mensahe ti Pagarian ken dagiti “nakaskasdaaw nga aramid ti Dios.”—Aramid 2:11; Lucas 8:1; Roma 1:11, 12.
22. Determinadoka a mangaramid iti ania?
22 Ditay liplipatan a panggep ni Satanas a dadaelen ti relasiontayo ken Jehova. Aramidenna ti aniaman tapno maitungpalna dayta. Ngem ammotayo dagiti pamay-an ti Diablo ken determinadotayo a manglaban iti amin a klase ti demonismo. ‘Ditay ikkan ti Diablo iti gundaway’ a mangpakapuy iti determinasiontayo. (Basaen ti Efeso 4:27.) Wen, no busorentayo ti Diablo, saantayo a maan-ano kadagiti silona ken natalgedtayo iti pannalaknib ni Jehova.—Efeso 6:11.