Surat ti Bagi a Manarawidwid
Kadakayo a mangay-ayat ken Jehova a Dios ken iti Biblia a Saona:
Imbaga ni Jesus: “Maammuanyonto ti kinapudno, ket ti kinapudno wayawayaannakayto.” (Juan 8:32) Panunotenyo idi damo a naammuanyo ti kinapudno manipud iti Biblia! Makaparagsak a maammuan nga iti lubong a napno iti kinaulbod, mabalintay nga ammuen ti kinapudno.—2 Timoteo 3:1.
Kayat ni Jehova a Dios a maammuantayo ti kinapudno. Ket gapu ta ay-ayatentayo dagiti tattao, kayattayo nga ibaga dayta kadakuada. Ngem adda pay kasapulan iti panagserbi iti Dios. Masapul nga aramidentayo ti amin a kabaelantayo nga agbiag kas Kristiano gapu ta ipatpategtayo unay dagiti prinsipio ni Jehova. Inlawlawag ni Jesus ti maysa a napateg a pamay-an a mapaneknekantayo iti Dios nga ay-ayatentayo isuna. Kinunana: “No tungpalenyo dagiti bilinko, makapagtalinaedkayo iti ayatko, no kasano a tinungpalko dagiti bilin ti Ama ket nagtalinaedak iti ayatna.”—Juan 15:10.
Talaga nga ay-ayaten ni Jesus ni Amana, ken ar-aramidenna ti amin nga ipapaaramid kenkuana ni Amana. No tuladentayo ni Jesus iti panagbiagtayo, ayatennatayo ni Jehova ken agbalintayo a pudpudno a naragsak. Kas iti imbaga ni Jesus, “ita ta ammoyon dagitoy, naragsakkayo no aramidenyo.”—Juan 13:17.
Namnamaenmi a makatulong kadakayo daytoy a libro tapno masursuroyo ti agbiag maitunos iti kinapudno manipud iti Biblia ken agbalinkayo a gayyem ti Dios. Ikarkararagmi a dumakkel ti panagayatyo iti Dios ken agtalinaedkayo “iti ayat ti Dios . . . a mangiturong iti agnanayon a biag.”—Judas 21.
Bagi a Manarawidwid Dagiti Saksi ni Jehova