Naibagan ni Jesus kadagiti adalanna ti ilustrasion maipapan iti panagtultuloy nga agkararag. (Lucas 11:​5-13) Mabalin nga adda itan idiay Samaria wenno idiay Galilea, ket ipaganetgetna manen ti saan a panagsardeng nga agkararag. Imbagana dayta babaen iti maysa pay nga ilustrasion:

“Iti maysa a siudad, adda hues nga awan panagbutengna iti Dios ken awan panagraemna iti tao. Adda met balo iti dayta a siudad a kanayon a mapan iti hues, a kunkunana, ‘Tulongannak koma tapno magun-odak ti hustisia iti nangidarum kaniak.’ Nabayag a di inkaskaso ti hues ngem kinunana iti bagina, ‘Uray no awan panagbutengko iti Dios wenno awan panagraemko iti asinoman, gapu ta dinak inggaan nga is-istorbuen daytoy a balo, itedko man laengen ti hustisia a dawdawatenna, tapno sardengannakon sakbay a maibus ti anusko.’”​—Lucas 18:​2-5.

Kinuna ni Jesus maipapan iti aplikasion daytoy: “Nangngegyo ti kinuna ti dakes a hues! Saan kadi nga ited met ti Dios ti hustisia kadagidiay pinilina, nga agpakpakaasi kenkuana iti aldaw ken rabii, bayat nga an-anusanna ida?” (Lucas 18:​6, 7) Ania ti ipakpakita ni Jesus maipapan iti Amana?

Saan nga ibagbaga ni Jesus a ni Jehova a Dios ket kas iti dakes a hues. Imbagana ti puntona: Uray no dakes ti hues, sungbatanna ti agtultuloy a panagkiddaw, nangnangruna a kasta ti Dios. Nalinteg ken naimbag ti Dios ket sungbatanna dagiti adipenna nga agtultuloy nga agkararag. Maammuantayo dayta iti kinuna pay ni Jesus: “Ipasiguradok kadakayo nga ited a dagus ti Dios ti hustisia.”​—Lucas 18:8.

Masansan a saan a magun-odan dagiti nanumo ken napanglaw ti kinahustisia, ngem masansan a mapaboran dagiti addaan iti pannakabalin ken dagiti nabaknang. Ngem saan a kasta ti Dios. Dumtengto ti tiempo a siguraduenna a madusa dagiti nadangkes ket awatento dagiti adipenna ti biag nga agnanayon.

Asino ti addaan iti pammati a kas iti balo? Mano ti talaga a mamati a ti Dios ‘dagus nga itedna ti kinahustisia’? Kalkalpas pay laeng nga inyilustrar ni Jesus a kasapulan ti agtultuloy a panagkararag. No maipapan iti panamati iti pannakabalin ti kararag, kinunana: “Inton dumteng ti Anak ti tao, talaga ngata a masarakannanto daytoy a pammati ditoy daga?” (Lucas 18:8) Ipakpakitana a mabalin a manmano ti mangipakita iti kasta a pammati inton umay ti Kristo.

Mabalin a dadduma a dumdumngeg ken Jesus ti siguradon iti pammatida. Agtalekda a nalintegda, ngem babalawenda ti dadduma. Inturong ni Jesus ti atensionna kadagita a tattao. Kinunana:

“Adda dua a lallaki a napan nagkararag idiay templo, maysa a Fariseo ken maysa nga agsingsingir iti buis. Nagtakder ti Fariseo ket inkararagna dagitoy maipapan iti bagina, ‘Agyamanak, O Dios, ta saanak a kas iti dadduma a managkikil, managdakdakes, mannakikamalala, wenno kas iti daytoy nga agsingsingir iti buis. Agayunarak iti mamindua iti kada lawas; itedko ti apagkapullo ti amin a masapulak.’”​—Lucas 18:​10-12.

Pagaammo dagiti Fariseo a sipapanayag nga  ipakpakitada ti kinalintegda. Ar-aramidenda dayta tapno dayawen ida ti sabsabali. Gagangay nga agayunarda no aldaw ti Lunes ken Huebes, al-aldaw nga adu ti mapan iti pagtagilakuan, tapno adu a tao ti makakita kadakuada. Bayadanda met ti apagkapullo uray dagiti babassit a mula. (Lucas 11:42) Sumagmamano a bulan sakbayna, inuy-uyawda dagiti gagangay a tattao, a kunkunada: “Dagitoy a saan a makaammo iti Linteg [sigun iti panangmatmat dagiti Fariseo] ket nailunod a tattao.”​—Juan 7:49.

Intuloy ni Jesus ti ilustrasionna: “Ngem ti agsingsingir iti buis a nakatakder iti adayo dina man la maitured ti tumangad no di ket dandanogenna ti barukongna, a kunkunana, ‘O Dios, paraburannak ta managbasolak.’” Wen, sipapakumbaba a binigbig ti agsingsingir iti buis dagiti pagkapuyanna. Kinuna ni Jesus: “Ibagak kadakayo, nagawid daytoy a tao a nalinlinteg ngem iti Fariseo. Ta asinoman a mangitan-ok iti bagina, maibabainto, ngem asinoman a mangipababa iti bagina, maitan-okto.”​—Lucas 18:​13, 14.

Gapuna, inlawlawag ni Jesus a masapul ti agbalin a napakumbaba. Dayta a balakad ket makagunggona kadagiti adalanna, a napadakkel iti lugar a nakaro ti panangipateg dagiti Fariseo iti posision ken saad. Nagpateg dayta a balakad iti amin a pasurot ni Jesus.