Agdaldaliasat pay laeng ni Jesus a lumasat iti Perea a mapan idiay Jerusalem. Maysa a baknang a lalaki ti napan kenkuana ket nagparintumeng iti sanguananna. Ti lalaki ket “maysa kadagiti agtuturay,” nalabit agserserbi kas opisial a mangidadaulo iti sinagoga wenno miembro ti Sanhedrin. “Naimbag a Mannursuro,” kinunana, “ania ti masapul nga aramidek tapno agbiagak nga agnanayon?”​—Lucas 8:41; 18:18; 24:20.

“Apay a saludsodem kaniak no ania ti naimbag?” insungbat ni Jesus. “Awan ti naimbag no di ti Dios.” Mabalin nga inusar ti lalaki ti sao a “naimbag” kas nadayaw a titulo, ta kasta ti ar-aramiden dagiti rabbi. Nupay ni Jesus ket nalaing a mangisuro, impakaammona iti lalaki a ti titulo a “Naimbag” ket agpaay laeng iti Dios.

Imbalakad ni Jesus: “No kayatmo ngarud ti maaddaan iti biag, itultuloymo a tungpalen dagiti bilin.” Kinuna ti lalaki: “Aniada a bilin?” Imbaga ni Jesus ti lima kadagiti Sangapulo a Bilin​—maipapan iti panangpapatay, pannakikamalala, panagtakaw, ulbod a panangsaksi, ken panagraem kadagiti nagannak. Kalpasanna, innayon ni Jesus ti nagpateg a bilin: “Masapul nga ayatem ti kaarrubam a kas iti bagim.”​—Mateo 19:​17-19.

Kinuna ti agtutubo a lalaki: “Tungtungpalek amin dagita; ania pay ti masapul nga aramidek?” (Mateo 19:20) Mabalin a mariknana nga adda pay aramidenna a naisangsangayan a banag tapno maikari iti agnanayon a biag. Gapu ta makita ni Jesus ti panagreggetna, impategna ti lalaki. (Marcos 10:21) Ngem adda makalapped iti lalaki.

Ipatpateg ti lalaki dagiti sanikuana, isu a kinuna ni Jesus: “Adda pay maysa a masapul nga aramidem: Ilakom dagiti bambanag nga adda kenka sa itedmo kadagiti napanglaw, ket maaddaankanto iti kinabaknang idiay langit. Kalpasanna, umayka ket agbalinka a pasurotko.” Wen, mabalin nga ited ti lalaki ti kuartana kadagiti napanglaw, a mabalin a saan a makabayad kenkuana, ket agbalin  nga adalan ni Jesus. Ngem mabalin a maasian ni Jesus idi nakitana a pimmanaw a naliday. Ti panangipateg ti lalaki iti kinabaknang, iti ‘adu a sanikuana,’ ti nangbulsek kenkuana iti pudno a kinabaknang. (Marcos 10:​21, 22) Kinuna ni Jesus: “Nagrigat ketdin a makastrek iti Pagarian ti Dios dagiti adda kuartana!”​—Lucas 18:24.

Nasdaaw dagiti adalan kadagitoy a sasao ken iti simmaruno nga imbaga ni Jesus: “Kinapudnona, nalaklaka pay a lumsot ti kamelio iti abut ti dagum ngem ti baknang a sumrek iti Pagarian ti Dios.” Dayta ti nangtignay kadagiti adalan a nagsaludsod: “Siasino ngaruden ti maisalakan?” Nakarigrigat kadi ti maisalakan a saan a magun-odan dayta ti tao? Miningmingan ni Jesus ida ket kinunana: “Dagiti imposible kadagiti tattao ket posible iti Dios.”​—Lucas 18:​25-27.

Imbaga ni Pedro a pinilida ti banag a naiduma iti pinili ti baknang a lalaki. Kinunana: “Apo, pinanawanmi ti amin a banag ket simmurotkami kenka; anianto ngarud ti magunggonami?” Imbaga ni Jesus ti pagbanagan ti umiso a pilida. Kinunana: “Inton pabaruen ti Dios ti amin a banag ket agtugaw ti Anak ti tao iti nadayag a tronona, dakayo a simmurot kaniak agtugawkayto met iti 12 a trono, a mangukom iti 12 a tribu ti Israel.”​—Mateo 19:​27, 28.

Nalawag a pampanunoten ni Jesus ti masanguanan inton maparsua manen dagiti kasasaad nga adda idi iti hardin ti Eden. Magunggonaanto ni Pedro ken ti dadduma nga adalan inton kaduada ni Jesus a mangituray iti Paraiso a daga, maysa a gunggona a talaga a bunga dagiti sakripisio nga inaramidda!

Ngem saanda laeng a magun-odan dagiti gunggona iti masanguanan. Mapaspasaranen dayta dagiti adalan. Kinuna ni Jesus: “Asinoman a nangpanaw iti balay wenno asawa wenno kakabsat wenno nagannak wenno annak maigapu iti Pagarian ti Dios, umawatto iti ad-adu nga amang ngem kadagita iti daytoy a tiempo, ken iti masanguanan a sistema, biag nga agnanayon.”​—Lucas 18:​29, 30.

Wen, sadinoman ti papanan dagiti adalanna, matagiragsakda ti panagkakabsat a kadua dagiti padada nga agdaydayaw a nasingsinged ken napatpateg pay ngem ti tagtagiragsaken dagiti miembro ti pamilia. Nakalkaldaang ta ti baknang nga agtutubo nga agturay ket mabalin a saanna a magun-odan dagiti bendision agraman ti gunggona a biag iti Pagarian ti Dios idiay langit.

Kinuna pay ni Jesus: “Ngem adunto ti umuna a maudi ken adu ti maudi nga umuna.” (Mateo 19:30) Ania ti kayatna a sawen?

Ti baknang nga agtutubo nga agturay ti “umuna,” ta kameng ti lider dagiti Judio. Kas mangtungtungpal kadagiti bilin ti Dios, adu ti maipaayna ken adu met ti manamnama kenkuana. Nupay kasta, impangpangrunana ti kinabaknang ken ti sanikuana. Ngem dagiti gagangay a tattao makitada kadagiti pannursuro ni Jesus ti kinapudno ken ti dalan iti biag. Dagitoy kayariganda ti “maudi,” ngem agparang nga isudan ti “umuna.” Manamnamada nga agtugawdanto kadagiti trono idiay langit a kaduada ni Jesus, ket iturayanda ti Paraiso a daga.