Nakita ni Jairo a napaimbag ni Jesus ti agpadpadara a babai. Sigurado a mapaimbag met ni Jesus ti anakna nupay pampanunotenna a ‘mabalin a natayen ti anakna a babai.’ (Mateo 9:18) Matulongan ngata pay ti anakna?

Bayat a makisarsarita ni Jesus iti pinaimbagna a babai, adda lallaki a naggapu iti balay ni Jairo ket imbagada kenkuana: “Natayen ti anakmo!” Kinunada pay: “Saanmon nga istorbuen ti Mannursuro.”—Marcos 5:35.

Makapaladingit dayta a damag! Nagkakapsuten daytoy mararaem a lalaki. Natayen ti kakaisuna nga anakna. Ngem nangngeg ni Jesus ti naipadamag, ket kinunana ken Jairo: “Dika agdanag, papigsaem laeng ti pammatim.”—Marcos 5:36.

Kalpasanna, kimmuyog ni Jesus iti balay ni Jairo. Idi nakadanonda, adu ti nasangpetanda nga agladladingit. Agsasangit, agdungdung-aw, ken saksaktan dagiti tattao ti bagbagida gapu iti ladingit. Simrek ni Jesus ket imbagana daytoy a makapasiddaaw a sasao: “Saan a natay ti ubing. Matmaturog laeng.” (Marcos 5:39) Idi nangngeg dayta dagiti tattao, kinatawaanda ni Jesus ta ammoda a natayen ti ubing. Ngem babaen ti pannakabalin nga inted ti Dios, ipakita ni Jesus a posible nga agungar dagiti tattao manipud iti ipapatay a kas iti panagriing ti maysa a tao a naimas ti turogna.

Pinaruar ni Jesus ti amin malaksid da Pedro, Santiago, Juan, ken ti nagannak ti ubing a babai. Napanda amin iti ayan ti ubing. Iniggaman ni Jesus ti ima ti ubing, ket kinunana: “‘Talʹi·tha cuʹmi,’ a kayatna a sawen: ‘Neneng, bumangonka!’” (Marcos 5:41) Dagus a bimmangon ken nagna ti ubing. Panunotem ti ragsak ni Jairo ken ni baketna idi nakitada dayta! Tapno paneknekanna a talaga a sibibiag manen ti balasitang, imbilin ni Jesus nga ikkanda iti kanenna.

Imbilin idi ni Jesus kadagiti pinaimbagna a saanda nga ibagbaga ti inaramidna kadakuada, ket imbagana manen dayta kadagiti nagannak ti ubing. Nupay kasta, ti maragragsakan a nagannak ken ti dadduma pay impadamagda “iti dayta a lugar.” (Mateo 9:26) Saan kadi a maragsakanka met a mangipadamag no mapagungar ti maysa nga ipatpategmo? Daytoy ti maikadua a nairekord a panangpagungar ni Jesus.