Inawis ni Jesus dagiti uppat nga adalanna a da Pedro, Andres, Santiago, ken Juan nga agbalin a mangngalap iti tattao. Iti aldaw ti Sabbath, napanda amin iti sinagoga idiay Capernaum. Nangisuro ni Jesus iti sinagoga, ket nasdaaw manen dagiti tattao iti panangisurona. Saan a kas kadagiti eskriba, nangisuro ni Jesus nga addaan iti autoridad.

Adda lalaki a naluganan iti demonio iti daytoy nga aldaw ti Sabbath. Ipukpukkaw ti lalaki iti sinagoga: “Apay nga addaka ditoy, Jesus a Nazareno? Umaynakami kadi dadaelen? Ammok no asinoka, sika ti Nasantuan nga Adipen ti Dios!” Inungtan ni Jesus ti demonio a nanglugan iti lalaki: “Agulimekka! Rummuarka kenkuana!”—Marcos 1:24, 25.

Pagammuan ta tinumba ti dakes nga espiritu ti lalaki ket agkuykuyegyeg ken kasta unay ti ikkisna. Ngem rimmuar met laeng ti demonio a “dina inan-ano ti lalaki.” (Lucas 4:35) Nasdaaw ken Jesus dagiti tattao nga adda iti sinagoga! “Ania daytoy?” kinunada. “Adda pannakabalinna a mangparuar kadagiti demonio, ket agtulnogda kenkuana.” (Marcos 1:27) Siempre, nagdinamag iti intero a Galilea daytoy a nakaskasdaaw a pasamak.

Pimmanaw ni Jesus ken dagiti adalanna iti sinagoga sa napanda iti balay ni Simon, wenno Pedro. Adda sadiay ti katugangan a babai ni Pedro a nakaro ti gurigorna. Kiniddawda a paimbagen ni Jesus. Napan ni Jesus iti ayanna, iniggamanna ti imana, ken binangonna. Immimbag a dagus ket pinagserbianna ni Jesus ken dagiti adalan a kaduana, a mabalin a nangisagana iti makan para kadakuada.

Idi lumneken ti init, impan dagiti tattao iti balay da Pedro dagiti masakit. Idi agangay, nakaad-adun nga umili ti naummong iti ridaw ti balayda. Apay? Kayatda ti maagasan. Kinapudnona, “impanda kenkuana dagiti tattao a nagduduma ti sakitda. Imparabawna dagiti imana iti tunggal maysa ket pinaimbagna ida.” (Lucas 4:40) Wen, aniaman ti sakit dagiti tattao, pinaimbag ida ni Jesus kas naipadto. (Isaias 53:4) Nangparuar pay kadagiti demonio. No rummuar dagiti dakes nga espiritu, iyikkisda: “Sika ti Anak ti Dios.” (Lucas 4:41) Ngem ungtan ida ni Jesus ken lapdanna ida nga agsao. Ammoda a ni Jesus ti Kristo, ket saanna a kayat nga agpammarangda nga agserserbida iti pudno a Dios.