Idi mangaskasaba ni Jesus kadagiti tattao idiay Cesarea Filipos, nga agarup 25 a kilometro manipud Bantay Hermon, adda imbagana a nakakigtotan dagiti apostolna. Kinunana: “Ipasiguradok kadakayo nga adda sumagmamano a nakatakder ditoy a saanto pay a matay agingga a makitada nga umuna ti Anak ti tao nga umay iti Pagarianna.”​—Mateo 16:28.

Masmasdaaw dagiti adalan no ania ti kayat a sawen ni Jesus. Agarup makalawas kalpasanna, inkuyogna a napan iti nangato a bantay ti tallo nga apostol—da Pedro, Santiago, ken Juan. Mabalin a rabii idin, ta makaturturogen dagiti kakaduana. Bayat nga agkarkararag ni Jesus, nagbalbaliw ti langana iti sanguananda. Nakita dagiti apostol a rimmaniag ti rupana a kas iti init ken rimmangrang ti kawesna a kas iti nakaranraniag a lawag.

Kalpasanna, adda nagparang a dua a lallaki—da “Moises ken Elias.” Kasarsaritada ni Jesus maipapan iti ‘ipapanawna a mapasamak idiay Jerusalem.’ (Lucas 9:​30, 31) Nalawag a ti ipapanaw ni Jesus ket ti ipapatay ken panagungarnanto, a nabiit pay nga imbagana. (Mateo 16:21) Daytoy a panagsarita ti mangpaneknek a saan a maliklikan ni Jesus ti nakababain nga ipapatay, a naiduma iti kinuna ni Pedro nga aramiden ni Jesus.

Namurmurayanen ti tallo nga apostol ket masmasdaawda iti nakita ken nangngegda. Daytoy ket maysa a sirmata, ngem agparang a kasla agpaypayso ta adda reaksion nga inaramid ni Pedro iti nakitana. Kinunana: “Mannursuro, nagsayaat ta addakami ditoy. Ibangonandakayo ngarud iti tallo a tolda, maysa para kenka, maysa para ken Moises, ken maysa para ken Elias.” (Marcos 9:5) Kayat kadi ni Pedro nga ibangon dagiti tolda tapno agpaut pay ti sirmata?

Idi agsasao pay laeng ni Pedro, adda naraniag nga ulep a nanglinong kadakuada ken adda nagsao iti ulep: “Daytoy ti Anakko a dungdungnguek, a pakaragsakak. Dumngegkayo kenkuana.” Idi nangngeg dagiti adalan ti timek ti Dios, nagpaklebda ken kasta unay ti butengda. Ngem imbaga ni Jesus kadakuada: “Tumakderkayo. Dikay agbuteng.” (Mateo 17:​5-7) Idi timmakderda, awan sabali a nakita dagiti tallo nga apostol malaksid ken Jesus. Nalpasen ti sirmata. Idi aldawen ken sumalsalogdan iti bantay, imbilin ni Jesus: “Saanyo nga ibagbaga iti asinoman ti nakitayo a sirmata agingga a mapagungar ti Anak ti tao.”​—Mateo 17:9.

Adda insaludsod dagiti apostol maipapan iti panagparang ni Elias iti sirmata. Kinunada: “Apay . . . nga ibagbaga dagiti eskriba a masapul nga umay nga umuna ni Elias?” Insungbat ni Jesus: “Immayen ni Elias ngem saanda a nailasin.” (Mateo 17:​10-12) Ibagbaga ni Jesus ti maipapan ken Juan a Mammautisar, a nangtungpal iti akem a kaasping ti akem ni Elias. Insagana ni Elias ti dalan para ken Eliseo, ket inaramid ni Juan dayta para ken Kristo.

Talaga a makapabileg daytoy a sirmata para ken Jesus ken kadagiti apostol! Panangipakita laeng dayta iti dayag ni Kristo iti Pagarianna. Gapuna, nakita dagiti adalan “ti Anak ti tao nga umay iti Pagarianna,” kas inkari ni Jesus. (Mateo 16:28) Bayat nga addada iti bantay, ‘nasaksianda ti kinatan-okna.’ Nupay sapsapulen dagiti Fariseo ti pagilasinan a mangpaneknek a ni Jesus ti pinili ti Dios nga Ari, saan a nangted kadakuada iti pagilasinan. Ngem nakita dagiti nasinged nga adalan ni Jesus ti panagbalbaliw ti langana, a mangpatalged kadagiti padto maipapan iti Pagarian. Gapuna, insurat ni Pedro idi agangay: “Addaankami iti naipadto a sao nga ad-adda a naipasigurado.”​—2 Pedro 1:​16-19.