Nagpaamiananen ni Jesus ken dagiti adalanna a mapan idiay Galilea. Primavera idin, ket nagdawan dagiti trigo iti talon. Mabisin dagiti adalan isu a nangrurosda iti dawa a kinnanda. Ngem aldaw idi ti Sabbath, ket nakita dagiti Fariseo ti inaramidda.

Laglagipem nga idiay Jerusalem, kayat idi dagiti Judio a papatayen ni Jesus ta imbagada a linabsingna ti Sabbath. Ita, inakusaran met dagiti Fariseo dagiti adalanna gapu iti inaramidda. Kinunada: “Kitaem dagiti adalam, ar-aramidenda ti saan a maipalubos iti Sabbath!”—Mateo 12:2.

Kuna dagiti Judio a ti panagruros iti dawa ken pananglidlid iti dayta iti dakulap ket panagani ken panagirik. (Exodo 34:21) Ti nainget a panangipatarusda no ania a trabaho ti maiparit ti mamagbalin a nadagsen ti Sabbath, nupay nairanta koma dayta a maysa nga aldaw a naragsak ken makaparegta iti naespirituan. Kinontra ni Jesus ti di umiso nga interpretasionda babaen kadagiti pagarigan tapno ipakitana a saan nga inranta ni Apo Jehova a kasta ti pannakaipatungpal ti lintegna a Sabbath.

Ti maysa a pagarigan nga inted ni Jesus ket ti maipapan ken David ken dagiti tattaona. Idi nagbisinda, napanda iti tabernakulo ket nanganda kadagiti tinapay a naidaton. Dagidiay a tinapay, a naikkaten manipud iti imatang ni Jehova ken nasukatanen iti baro, ket gagangay a mailasin tapno kanen dagiti padi. Ngem iti dayta a kasasaad, saan a nakabasol ni David ken dagiti tattaona idi kinnanda dagiti tinapay.—Levitico 24:5-9; 1 Samuel 21:1-6.

Kas maikadua a pagarigan, kinuna ni Jesus: “Diyo kadi nabasa iti Linteg nga agtrabtrabaho latta  dagiti papadi bayat ti Sabbath ngem saanda a makabasol?” Ti kayatna a sawen ket uray iti Sabbath, partien dagiti padi dagiti animal a maidaton ken aramidenda ti dadduma pay a trabaho iti templo. “Ibagak kadakayo,” kinuna ni Jesus, “adda ditoy ti napatpateg ngem iti templo.”—Mateo 12:5, 6; Numeros 28:9.

Nagkotar manen ni Jesus manipud iti Kasuratan tapno ipaganetgetna ti puntona: “No naawatanyo koma ti kaipapanan daytoy, ‘Asi ti kalikagumak, saan a daton,’ saanyo koma nga inukom dagiti awanan basol.” Kinunana pay: “Ta ti Anak ti tao ket Apo ti Sabbath.” Tuktukoyen ni Jesus ti um-umayen a natalna a panangiturayna iti Pagarian iti sangaribu a tawen.—Mateo 12:7, 8; Oseas 6:6.

Nabayagen nga agrigrigat ti sangatauan iti nadagsen a panangadipen ni Satanas babaen iti adu a kinaranggas ken gubat. Talaga a naidumanto ti kasasaad iti sidong ti panangituray ni Kristo iti dakkel a Sabbath, a mangipaay iti panaginana a nabayagen a kasapulan ken segseggaantayo!