Naragsakan ti 12 nga apostol iti panangasabada iti intero a Galilea, ket impadamagda ken Jesus ti “amin nga inaramidda ken insuroda.” Talaga a makabannog ti inaramidda. Saanda payen masango ti mangan ta nakaad-adu a tattao ti um-umay. Gapuna, kinuna ni Jesus: “Intayo iti awan matataona a lugar ta aginanatayo biit.”​—Marcos 6:​30, 31.

Nagluganda iti bangka, a mabalin nga iti asideg ti Capernaum, ket napanda iti awan matataona a lugar iti daya ti Karayan Jordan iti labes ti Betsaida. Ngem adu ti nakakita iti ipapanawda, ken naammuan dayta ti dadduma. Nagtatarayda amin iti igid ti baybay ket immun-unada pay a nakadanon ngem iti bangka.

Idi dimsaag ni Jesus iti bangka, nakitana ti adu a tattao ket naasian, ta kaslada karnero nga awanan pastor. Gapuna, “insurona ida iti adu a banag” maipapan iti Pagarian. (Marcos 6:34) Kasta met, “pinaimbagna dagiti masakit.” (Lucas 9:11) Idi mumalemen, kinuna dagiti adalan kenkuana: “Awan ti matatao ditoy ken sumipngeten. Ibagam kadagiti tattao a mapanda gumatang iti kanenda kadagiti purok.”​—Mateo 14:15.

Kinuna ni Jesus: “Saan a kasapulan a pumanawda. Pakanenyo ida.” (Mateo 14:16) Nupay ammon ni Jesus ti aramidenna, sinubokna ni Felipe: “Panggatangantayo ngata iti tinapay a kanen dagitoy a tattao?” Ni Felipe ti napagsaludsodan ta taga-Betsaida. Ngem saan a ti pananggatang iti tinapay ti solusion. Agarup 5,000 a lallaki ti adda sadiay. Mabalin nga agdoble pay ti bilang no mairaman dagiti babbai ken ubbing! Insungbat ni Felipe: “Saan nga umanay ti 200 a denario [maysa a denario ti sueldo iti maysa nga aldaw] nga igatang iti tinapay a kanenda uray saggabassitda laeng.”​—Juan 6:​5-7.

Mabalin a tapno ipakita ni Andres nga imposible a mapakanda amin ida, kinunana: “Adda ubing a lalaki ditoy nga addaan iti lima a tinapay a sebada ken dua a babassit nga ikan. Ngem kasano a makaanay dagitoy iti kastoy kaadu a tattao?”​—Juan 6:9.

Primavera idin, sakbay la unay ti Paskua ti 32 C.E., ket naraber ti karuotan iti turturod. Imbaga ni Jesus kadagiti adalanna a pagtugawenda dagiti tattao iti karuotan iti sag-50 ken sag-100 iti tunggal grupo. Innalana ti lima a tinapay ken dua nga ikan ket nagkararag iti Dios. Kalpasanna, pinispisina dagiti tinapay ken ikan. Inted ni Jesus daytoy kadagiti adalanna tapno iwarasda kadagiti tattao. Nakaskasdaaw ta nakapanganda amin ken nabsogda!

Idi agangay, kinuna ni Jesus kadagiti adalanna: “Urnongenyo dagiti natedda, tapno awan ti masayang.” (Juan 6:12) Idi naurnongda dagiti natedda, napno ti 12 a basket!