Iti makindaya nga igid ti Baybay ti Galilea, pinakan ni Jesus ti rinibu babaen ti milagro sa pimmanaw idi kayatda a pagbalinen nga ari. Iti dayta a rabii, nagna iti rabaw ti nadawel a baybay ken insalakanna ni Pedro, a nagna met iti danum ngem nangrugi a limned idi kimmapuy ti pammatina. Pinagtalna met ni Jesus ti angin, mabalin a tapno saan a malmes dagiti adalanna no madadael ti bangka.

Nakasublin ni Jesus iti makinlaud nga igid ti baybay, idiay Capernaum. Nasarakan dagidiay pinakanna babaen ti milagro ket dinamagda: “Kaano a nakadanonka ditoy?” Tinubngarna ida ket kinuna ni Jesus kadakuada nga isu ket birbirokenda ta namnamaenda a pakanenna manen ida. Imbagana kadakuada: “Agtrabahokayo, saan a maipaay iti madadael a taraon, no di ket maipaay iti agpaut a taraon a mangted iti biag nga agnanayon.” Gapuna, insaludsodda: “Ania ti masapul nga aramidenmi tapno maitungpalmi ti ipapaaramid ti Dios?”​—Juan 6:​25-28.

Mabalin a pampanunotenda dagiti aramid a naisurat iti Linteg, ngem imbaga ni Jesus ti kapatgan nga aramid: “Daytoy ti ipapaaramid ti Dios, nga ipakitayo ti pammati iti daydiay imbaonna.” Ngem saan nga impakita dagiti tattao a mamatida ken Jesus, uray adun ti naaramidanna. Imbagada a mangipakita iti pagilasinan tapno mamatida kenkuana. “Ania ti aramidem?” dinamagda. “Nangan dagidi ammatayo iti manna idiay let-ang, kas naisurat: ‘Inikkanna ida iti tinapay manipud langit.’”​—Juan 6:​29-31; Salmo 78:24.

No maipapan iti kidkiddawenda a pagilasinan, inturong ida ni Jesus iti pudpudno a Gubuayan ti taraon: “Kinapudnona, saan a ni Moises ti nangted kadakayo iti tinapay manipud langit, no di ket ni Amak. Ta ti tinapay nga inted ti Dios ket daydiay bimmaba manipud langit ken mangted iti biag iti lubong.” Gapu ta saanda a naawatan ti kayatna a sawen, kinunada: “Apo, ikkannakami koma a kanayon iti kastoy a tinapay.” (Juan 6:​32-34) Ngem ania a “tinapay” ti tuktukoyen ni Jesus?

Inlawlawagna: “Siak ti tinapay ti biag. Ti umay kaniak saanton nga agbisin, ket ti mangipakita iti pammati kaniak saanton a mawaw. Ibagak kadakayo, nakitadak a mismo ngem saankayo a mamati. . . . Bimmabaak manipud langit tapno aramidek ti pagayatan daydiay nangibaon kaniak, saan ket a ti pagayatak. Daytoy ti pagayatan daydiay nangibaon kaniak, nga awan koma ti mapukawko iti amin nga intedna kaniak no di ket pagungarek ida iti maudi nga aldaw. Ta daytoy ti pagayatan ni Amak, nga asinoman nga umawat iti Anak ken mangipakita iti pammati kenkuana ket maaddaan koma iti biag nga agnanayon.”​—Juan 6:​35-40.

Nagrurod dagiti tattao, ken nangrugi nga agtanabutob dagiti Judio kenkuana. Kasano a maibagana nga isu ti “tinapay a bimmaba manipud langit”? (Juan 6:41) Para kadakuada, isu ket anak laeng ti tao manipud Nazaret a siudad ti Galilea. Dinamag dagiti tattao: “Saan aya a daytoy ni Jesus nga anak ni Jose, nga am-ammotayo ti ama ken inana?”​—Juan 6:42.

“Isardengyon ti agtanabutob,” kinuna ni Jesus. “Awan ti tao a makaumay kaniak malaksid no iyasideg ti Ama, a nangibaon kaniak, ket pagungarekto iti maudi nga aldaw. Insurat dagiti propeta: ‘Sursuruanto amin ida ni Jehova.’ Umay kaniak ti asinoman a dumngeg iti Ama ken agpaisuro kenkuana. Awan ti tao a nakakita iti Ama, no di laeng daydiay naggapu iti Dios ti nakakita iti Ama. Ipasiguradok kadakayo, ti mamati ket maaddaan iti biag nga agnanayon.”​—Juan 6:​43-47; Isaias 54:13.

Idi nakisarita ni Jesus ken Nicodemo, dinakamatna ti biag nga agnanayon ken innaigna dayta iti panamati iti Anak ti tao. Kinunana: “Saan a madadael ti asinoman a mangipakita iti pammati [iti  bugbugtong nga Anak ti Dios] no di ket maaddaan iti biag nga agnanayon.” (Juan 3:​15, 16) Ngem ita, ad-adun a tattao ti kasarsaritana. Ibagbagana kadakuada nga adda akemna iti pananggun-odda iti biag nga agnanayon a saan a maipaay ti manna wenno ti tinapay a gagangay a magun-odan idiay Galilea. Kasano ngarud a magun-odan ti biag nga agnanayon? Inulit manen ni Jesus ti imbagana: “Siak ti tinapay ti biag.”​—Juan 6:48.

Nagtultuloy daytoy a panagsasarita maipapan iti tinapay manipud langit, a nagpatingga idi nangisuro ni Jesus iti sinagoga idiay Capernaum.