Maudin a paset ti tawen 32 C.E., ken agarup tallo a tawenen kalpasan a nagbautisar ni Jesus. Kagapgapu idi ni Jesus ken dagiti adalanna iti Piesta ti Tabernakulo idiay Jerusalem. Mabalin nga addada pay laeng iti asideg ti Jerusalem. (Lucas 10:38; Juan 11:1) Kinapudnona, ti kaaduan iti nabatbati nga innem a bulan ti ministerio ni Jesus ket binusbosna idiay Judea wenno iti ballasiw ti Karayan Jordan, idiay Perea. Masapul met a makasabaan dagitoy a lugar.

Kalpasan ti Paskua ti 30 C.E., sumagmamano a bulan a nangasaba ni Jesus idiay Judea ken nagdaliasat iti Samaria. Idi dandanin ti Paskua ti 31 C.E., dagiti Judio idiay Jerusalem kayatda a papatayen ni Jesus. Iti simmaganad a maysa ket kagudua a tawen, idiay Galilea ti ad-adda a nangisuruanna. Iti dayta a tiempo, adu ti nagbalin a pasurotna. Idiay Galilea, sinanay ni Jesus dagiti apostolna ken kalpasanna, imbaonna ida ket imbilinna: “Inkayo ket ikasabayo: ‘Asidegen ti Pagarian ti langit.’” (Mateo 10:​5-7) Organisarenna ita ti nasaknap a panangasaba idiay Judea.

Tapno adu ti makasabaan, nangpili ni Jesus iti 70 nga adalan ket imbaonna ida a sagdudua. Gapuna, adda 35 a paris dagiti manangikaskasaba iti Pagarian iti lugar nga “adu ti anien ngem bassit ti agani.” (Lucas 10:2) Umunada kadagiti lugar a papananto ni Jesus. Dagiti 70 paimbagenda dagiti masakit ken isaknapda ti mensahe nga ikaskasaba ni Jesus.

Saanda nga ipamaysa ti mangisuro kadagiti sinagoga. Imbaga ni Jesus a mapanda iti balay dagiti tattao. “No adda mangpastrek kadakayo iti balay,” kinunana kadakuada, “ibagayo nga umuna: ‘Adda koma talna iti daytoy a balay.’ No adda managayat iti kappia, agbatinto kenkuana ti talnayo.” Ania koma ti mensaheda? Kinuna ni Jesus: “Ibagayo kadakuada: ‘Asidegen kadakayo ti Pagarian ti Dios.’”​—Lucas 10:​5-9.

Dagiti imbilin ni Jesus kadagiti 70 ket isu met laeng ti imbilinna kadagiti 12 nga apostol, agarup makatawen sakbayna. Impakpakaunana a saan nga amin a tao ti mangawat kadakuada. Ngem ti panangasabada ti mangisagana kadagiti dumngeg tapno inton dumteng ni Jesus, adunto ti sigagagar a mangam-ammo ken agsursuro iti Apo.

Di nagbayag, nagsubli ken Jesus ti 35 a paris a manangikaskasaba iti Pagarian. Maragsakanda a nangibaga: “Apo, uray dagiti demonio nagtulnogda kadakami idi inusarmi ti naganmo.” Naragsakan ni Jesus, ta kinunana: “Nakitak ni Satanas a kasla kimat a natnag manipud langit. Intedko kadakayo ti autoridad a mangbaddek kadagiti uleg ken manggagama.”​—Lucas 10:​17-19.

Impasigurado ngarud ni Jesus kadagiti pasurotna nga agballigida iti aniaman a makadangran  a bambanag, nga arigna ibaddebaddekda dagiti uleg ken manggagama. Masiguradoda met a matnagto ni Satanas manipud langit. Impakita met ni Jesus kadagiti 70 no ania a talaga ti napateg. Kinunana: “Dikay agragsak gapu ta nagtulnog kadakayo dagiti demonio. Agragsakkayo ketdi gapu ta naisuraten idiay langit dagiti naganyo.”​—Lucas 10:20.

Napalalo ti ragsak ni Jesus ken indaydayawna ni Amana iti sanguanan dagiti tattao ta inusarna dagitoy napakumbaba nga adipenna iti nakaskasdaaw a pamay-an. Kalpasanna, kinunana kadagiti adalanna: “Naragsak dagiti makakita iti bambanag a makitkitayo. Ibagak kadakayo, kayat ti adu a propeta ken ar-ari a makita dagiti makitkitayo ngem saanda a nakita, ken kayatda a mangngeg dagiti mangmangngegyo ngem saanda a nangngeg.”​—Lucas 10:​23, 24.