Kalkalpas laeng nga inulit ni Jesus ti pagannurotan maipapan iti panagkararag, ngem saan la a dayta ti inulitna bayat ti ministeriona. Idi nagaramid kadagiti milagro idiay Galilea, pinabasolda ni Jesus nga ar-aramidenna dayta babaen ti pannakabalin ti agturay kadagiti demonio. Naipabasol manen dayta kenkuana idiay Judea.

Idi pinaruar ni Jesus ti demonio a mangpapaumel iti maysa a lalaki, nasdaaw dagiti tattao. Ngem saan a nasdaaw dagiti mangbabbabalaw kenkuana. Inakusaranda manen ni Jesus: “Parparuarenna dagiti demonio babaen ken Beelzebub a panguluen dagiti demonio.” (Lucas 11:15) Dadduma nga agsapsapul iti ad-adu a pammaneknek iti kinasiasino ni Jesus kayatda ti makakita iti pagilasinan manipud langit.

Ammona a subsubokenda, isu a sinungbatanna ida a kas iti imbagana kadagiti nangbabalaw kenkuana idiay Galilea. Imbagana a marpuog ti pagarian a nabingaybingay. Kinunana: “No lablabanan met ni Satanas ti bagina, kasano a mataginayon ti pagarianna?” Kalpasanna, imbaga ni Jesus kadakuada: “No babaen ti ramay ti Dios a parparuarek dagiti demonio, dimtengen ti Pagarian ti Dios a diyo napupuotan.”​—Lucas 11:​18-20.

Idi dinakamat ni Jesus ti “ramay ti Dios” impalagipna kadagiti dumdumngeg ti napasamak iti rugrugi ti pakasaritaan ti Israel. Nasdaaw dagiti adda iti palasio ni Faraon idi nakitada a nagaramid ni Moises kadagiti milagro. Kinunada: “Ramay ti Dios dayta!” Kasta met, “ramay ti Dios” ti nangisurat iti Sangapulo a Bilin iti dua a tapi a bato. (Exodo 8:19; 31:18) Gapuna, “ramay ti Dios”​—ti nasantuan nga espirituna, wenno aktibo a puersa​—ti tumultulong ken Jesus a mangparuar iti demonio ken mangpaimbag iti masakit. Gapuna, saan a nadnadlaw dagiti bumusbusor a dimtengen ti Pagarian ti Dios ta ti nadutokan nga Ari ti Pagarian, ni Jesus, ket addan iti tengngada a mangar-aramid kadagitoy.

Ti pannakabalin ni Jesus a mangparuar kadagiti demonio ket ebidensia a kabaelanna a parmeken ni Satanas, a kas iti nabileg a lalaki nga umay ket abakenna ti armado a lalaki a mangbambantay iti palasio. Inulit met ni Jesus ti ilustrasionna maipapan iti dakes nga espiritu a rimmuar iti maysa a lalaki. No saan a punnuan ti lalaki iti naimbag a bambanag ti nagpanawan ti dakes nga espiritu, agsubli dayta a mangikuyog iti pito pay, ket dakdakesto ti kasasaadna. (Mateo 12:​22, 25-29, 43-45) Kasta ti napasamak iti nasion ti Israel.

Impukkaw ti babai a dumdumngeg ken Jesus: “Naragsak ti ina a nangyanak ken nangpasuso kenka!” Arapaap dagiti babbai a Judio ti agbalin nga ina ti maysa a propeta, nangnangruna ti Mesias. Gapuna, mabalin a pampanunoten ti babai a talaga a nakaragragsak ni Maria kas ina ti kasta a mannursuro. Ngem imbaga ni Jesus iti babai ti pudno a pagtaudan ti kinaragsak: “Saan, naragragsak ketdi dagidiay dumdumngeg iti sao ti Dios ken mangtungtungpal iti dayta!” (Lucas 11:​27, 28) Saan nga imbaga ni Jesus a maipaayan ni Maria iti naisangsangayan a dayaw. Imbes ketdi, ti pudno a kinaragsak ti asinoman ket ti panagbalinna a matalek nga adipen ti Dios, saan a ti pisikal a relasionna iti maysa a tao wenno dagiti nagapuananna.

Kas iti inaramid ni Jesus idiay Galilea, tinubngarna dagiti agkidkiddaw iti pagilasinan manipud langit. Imbagana nga awan ti makitada malaksid “iti milagro a napasamak ken Jonas.” Ni Jonas ti nagserbi a pagilasinan agpadpada iti tallo nga aldaw a kaaddana iti tian ti ikan ken iti natured a panangasabana, a nangtignay kadagiti taga-Nineve nga agbabawi. Kinuna ni Jesus: “Ngem adda ditoy ti natantan-ok ngem ni Jonas.” (Lucas 11:​29-32) Natantan-ok met ni Jesus ngem ni Solomon, a dinengngeg idi ti reyna ti Sheba ti siribna.

Kinuna ni Jesus: “No sinindian ti maysa a tao ti lampara, saanna nga ilemmeng wenno kaluban dayta iti labba, no di ket ikabilna iti pagiparabawan  iti silaw.” (Lucas 11:33) Mabalin nga ibagbagana a ti panangisurona ken panangaramidna iti milagro iti imatang dagitoy a tattao ket kas iti panangilemmeng iti nasindian a lampara. Gapu ta saan a naipamaysa ti matada, naikapisda iti panggep dagiti aramidna.

Kalkalpas pay laeng a pinaruar ni Jesus ti demonio a mangpapaumel iti maysa a lalaki. Matignay koma dagiti tattao a mangidayaw iti Dios ken mangibaga iti dadduma iti ar-aramiden ni Jehova. Gapuna, pinakdaaran ni Jesus dagiti nangbabalaw kenkuana: ‘Siguraduenyo ngarud a lawag ti adda kadakayo, saan ket a kinasipnget. Isu a no ti intero a bagiyo ket naraniag ken awan pasetna a nasipnget, nalawagto dayta a kas iti lampara a mangraniag kadakayo.’​—Lucas 11:​35, 36.