Idi imbaga ni anghel Gabriel iti balasang a ni Maria a mangipasngayto iti anak a lalaki a mapanaganan iti Jesus ken agturayto kas Ari iti agnanayon, dinamag ni Maria: “Kasano a mapasamak daytoy idinto ta maysaak a birhen?”—Lucas 1:34.

Insungbat ni Gabriel: “Addanto kenka ti nasantuan nga espiritu, ket salaknibannakanto ti pannakabalin ti Kangatuan. Gapu iti dayta, ti mayanak nga ubing ket maawaganto iti nasantuan, Anak ti Dios.”—Lucas 1:35.

Tapno ad-adda a patien ni Maria ti mensahena, kinuna ni Gabriel: “Ni Elisabet a kabagiam ket innem a bulanen a masikog, nupay baketen ken agdindinamag a lupes, gapu ta awan ti imposible iti Dios.”—Lucas 1:36, 37.

Namati ni Maria iti imbaga ni Gabriel kas ipakita ti sungbatna. Kinunana: “Adtoyak nga adipen ni Jehova! Maaramid koma kaniak dagiti imbagam.”—Lucas 1:38.

Kalpasan a pimmanaw ni Gabriel, nagsagana ni Maria a bumisita ken Elisabet ken ti asawana a ni Zacarias nga agnanaed iti katurturodan ti Judea nga asideg iti Jerusalem. Manipud iti pagtaengan ni Maria iti Nazaret, nalabit tallo wenno uppat nga aldaw dayta a panagdaliasat.

Nakadanon met laengen ni Maria iti balay da Zacarias. Idi simrek iti balay, kinablaawanna ti kabagianna a ni Elisabet. Iti dayta a tiempo, napno ni Elisabet iti nasantuan nga espiritu, ket kinunana ken Maria: “Naparaburanka kadagiti amin a babbai. Maparaburan met koma ti sikogmo! Siasinoak koma tapno bisitaennak ti ina ti Apok? Ta apaman a nangngegko ti kablaawmo, nagkuti ti ubing iti tianko gapu iti ragsakna.”—Lucas 1:42-44.

Naimpusuan a nagyaman ni Maria: “Idaydayawko ni Jehova, ket maragsakanak unay iti Dios a Mangisalakan kaniak, gapu ta nakitana ti kinanumok nga adipenna. Manipud ita, amin a henerasion ibagadanto a naragsakak, gapu ta ti Mannakabalin-amin ket nangaramid iti nakaskasdaaw a bambanag para kaniak.” Makitatayo a nupay naparaburan ni Maria, inturongna latta amin a dayaw iti Dios. Kinunana: “Nasantuan ti naganna, ket kankanayon a kaasianna dagiti agbuteng kenkuana.”—Lucas 1:46-50.

Intultuloy ni Maria nga indaydayaw ti Dios babaen ti panangibagana kadagitoy a naipaltiing a naimpadtuan a sasao: “Inaramidna amin dagita babaen ti nabileg nga imana, inwarawarana dagiti natangsit ti pusoda. Inikkatna dagiti nabileg nga agtuturay kadagiti tronoda ken intan-okna dagiti napakumbaba; pinennekna iti naimbag a bambanag dagiti mabisbisin ket pinapanawna nga ima-ima dagiti babaknang. Tinulonganna ti Israel nga adipenna gapu iti awan patinggana nga asina ken Abraham ken iti kaputotanna. Kasta ti inkarina kadagidi ammatayo.”—Lucas 1:51-55.

Nakipagyan ni Maria kada Elisabet iti agarup tallo a bulan ket tinulonganna bayat dagiti maudi a lawas ti panagsikog ni Elisabet. Nagsayaat ta dagitoy a matalek a babbai, nga agpada a masikog babaen ti tulong ti Dios, ket nagkaduada iti daytoy a tiempo ti biagda.

Panunotem ti dayaw a naipaay ken Jesus uray saan pay a nayanak. Isu ket inawagan ni Elisabet a “ti Apok,” ken ‘nagkuti ti ubing iti tianna gapu iti ragsakna’ idi bimmisita ni Maria. Naiduma unay dayta iti panangtrato ti dadduma ken Maria idi agangay ken iti ipasngaynanto nga ubing, kas makitatayto.