APAY a marigatan ti adu a tattao a mangsapul iti pudno a panggep ti biagda? “Ti tao, a nayanak manipud babai, ababa ti biagna ken namelmelan iti pannakariribuk. Kas iti sabong isu rimmuar ket makeltay, ket agtalaw a kas iti anniniwan ket saan nga agtalinaed.” (Job 14:1, 2) Adda napasamak iti immuna a pagassawaan idiay Paraiso a nangkeltay iti naraniag a namnama ti sangatauan.

² Tapno pudpudno a naragsak ti sangatauan, masapul a nasayaat ti relasionda iti Dios—daydiay boluntario, saan a mapilpilit. (Deuteronomio 30:15-20; Josue 24:15) Kayat ni Jehova a naimpusuan ti panagtulnog ken panagdayaw, daydiay maigapu koma iti ayat. (Deuteronomio 6:5) Adda imparit ni Jehova idiay minuyongan ti Eden, a nangted iti immuna a tao iti gundaway a mangpaneknek iti naimpusuan a kinasungdona. “Manipud iti tunggal kayo iti minuyongan mabalinmo ti agpennek a mangan,” imbilin ti Dios ken Adan, “ngem no maipapan iti kayo ti pannakaammo iti naimbag ken dakes dika mangan manipud iti dayta, ta iti aldaw a manganka manipud iti dayta mataykanto a di bumurong.” (Genesis 2:16, 17) Simple la dayta a suot. Kadagiti amin a kayo iti minuyongan, ti bunga ti maysa laeng a kayo ti imparit ni Jehova a kanen ni Adan. Insimbolo dayta a kayo ti kalintegan ti kasisiriban a Namarsua a mangikeddeng no ania ti naimbag ken no ania ti dakes. Daytoy a bilin ti Dios ket impakaammo ti immuna a lalaki iti asawana, nga impaay ni Jehova “kas maysa a komplimento [ni Adan].” (Genesis 2:18) Makaay-ayo kadakuada daytoy nga urnos—ti panagbiag iti sidong ti turay ti Dios—a pagragsakanda ti agtulnog iti pagayatanna ket iti kasta ipakitada nga ay-ayatenda ti Namarsua kadakuada ken ti Nangipaay iti Biagda.

³ Naminsan, nakisarita ti maysa a serpiente ken Eva ket inyimtuodna: “Pudno kadi a kinuna ti Dios a dikay mangan manipud iti tunggal kayo iti minuyongan?” Imbaga ni Eva a ti naiparit laeng a kanenda isu ti bunga “ti kayo nga adda iti tengnga ti minuyongan,” ti kayo ti pannakaammo  iti naimbag ken dakes, ‘tapno saanda a matay.’—Genesis 3:1-3.

⁴ Siasino daytoy a serpiente? Ti libro ti Biblia nga Apocalipsis impabigbigna “ti kadaanan a serpiente” kas “daydiay naawagan iti Diablo ken Satanas, a mangyaw-awan iti intero a mapagnaedan a daga.” (Apocalipsis 12:9) Pinarsua kadi ti Dios ni Satanas a Diablo? Saan, perpekto ken naimbag dagiti aramid ni Jehova. (Deuteronomio 32:4) Daytoy nga espiritu a parsua ti namagbalin iti bagina a Diablo, a kaipapananna “Mamarpardaya,” ken Satanas, a kaipapananna “Bumusbusor.” ‘Ginargari ken sinulbog ti bukodna a derrep,’ ti panangtarigagayna iti saad ti Dios, ket rinugianna a busoren ti Namarsua.—Santiago 1:14.

⁵ Kinuna ni Satanas a Diablo ken Eva: “Sigurado a saankayto a matay. Ta ammo ti Dios nga iti mismo nga aldaw a pannanganyo manipud iti dayta sigurado a maluktan dagiti matayo ket sigurado nga agbalinkayo a kas iti Dios, a makaammo iti naimbag ken dakes.” (Genesis 3:4, 5) Pinagparang ni Satanas a makaawis ti pannangan iti kayo ti pannakaammo iti naimbag ken dakes. Iti kababagasna, kasla kunkunana: ‘Adda naimbag a banag nga ipapaidam ti Dios kadakayo. Basta mangankayo iti bunga ti kayo, agbalinkayto a kas iti Dios ket iti kasta maikeddengyo a bukodyo no ania ti naimbag ken no ania ti dakes.’ Iti kaaldawantayo, us-usaren pay laeng ni Satanas ti kasta a panagrasrason tapno saan nga agserbi iti Dios ti adu a tattao. ‘Aramidem ta kaykayatmo,’ kunana. ‘Awan ti sungsungbatam iti Daydiay nangted iti biagmo.’—Apocalipsis 4:11.

⁶ Bigla a nagbalin a makaawis ti bunga ti kayo, makaay-ayo unay! Pimmuros ni Eva iti bunga, kinnanna, sana inikkan ti asawana. Nupay naan-anay nga ammona dagiti dakes nga ibungana, impangag ni Adan ni baketna ket nangan iti bunga ti kayo. Ania ti resultana? Kastoy ti sentensia ni Jehova iti babai: “Paaduekto unay ti rigat ti panagsikogmo; kadagiti ut-ot iti panaganak agipasngaykanto iti annak, ket ti panaggartemmo agpaayto iti asawam, ket dominarannakanto.” Iti lalaki met ngay? “Nailunod ti daga maigapu kenka. Iti rigat mangankanto iti apitna iti amin nga al-aldaw ti panagbiagmo. Ket mamagtubonto maipaay kenka iti sisiitan ken kalkalunay, ket masapul a kanem ti mulmula iti tay-ak. Iti ling-et ta rupam mangankanto iti tinapay agingga nga agsublika iti  daga, ta dayta ti nakaalaam. Ta tapokka ket iti tapok agsublikanto.” Sipud idin, nakakaammo da Adan ken Eva a mangbirok iti kinaragsak ken pannakapnekda. Agballigi kadi ti panagregget dagiti tattao a maaddaan ti makapnek a biag a saan a maitunos iti panggep ti Dios? Ti naragsak a trabaho a panangaywan iti arig minuyongan a Paraiso ken ti panangisaknap iti dayta kadagiti ungto ti daga ket nasukatan iti makauma ken makabannog a panagtrabaho tapno agtultuloy laeng nga agbiag, nga awan ti aramid a pakaidayawan ti Namarsua kadakuada.—Genesis 3:6-19.

⁷ Iti daydi aldaw a pannanganda iti bunga ti kayo ti pannakaammo iti naimbag ken dakes, natay ti immuna a pagassawaan iti imatang ti Dios ket nagturongdan iti pisikal nga ipapatay. Ania ti kasasaadda idi nataydan? Ilawlawag ti Biblia ti kasasaad ti natay. “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman, awananda metten a pulos kadagiti tangdan, agsipud ta ti pakalaglagipan kadakuada nalipatanen.” (Eclesiastes 9:5; Salmo 146:4) Awan ti aniaman a “kararua” nga agbiag kalpasan ti ipapatay. Patay ti dusa ti basol, saan nga agnanayon a pannakatuok iti umap-upay nga impierno. Maysa pay, saan a ti ipapatay ti ruangan nga agturong iti agnanayon a ragsak idiay langit. *

⁸ No kasano a ti kuppit a cake pan mangpataud laeng iti nadeporma a cake, ti imperpekto idin a lalaki ken babai mangpataudda laeng iti imperpekto nga annak. Ilawlawag ti Biblia daytoy a proseso: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Iti kasta, nayanaktayo amin nga addaan iti basol, naipasidong iti kinabarengbareng. Makapaupay ken makauma ti nagbanagan ti biag dagiti kaputotan ni Adan. Ngem posible kadi ti makalung-aw?