NO AGPABALAKADKAYO, saan kadi a daydiay mapagtalkan ti asitganyo? No talkenyo ti naggubuayan ti balakad, nalaklakayo a suroten dayta, mabenepisiarankayo man a dagus wenno saan. Tapno magunggonaankayo kadagiti praktikal a balakad ti Biblia, nasken a maam-ammoyo ti Autorna. Mabalin pay ketdi a maibilangkayo a ‘gayyemna’!​—Isaias 41:8.

² No kayatyo a gayyemen ti maysa a tao, sigurado a kayatyo a maammuan ti naganna. Adda kadi nagan ti Dios a nadakamat iti Biblia? Kinunana: “Siak ni Jehova. Dayta ti naganko; ket iti asinoman a sabali saanko nga ited ti bukodko a dayag, wenno ti dayawko kadagiti kinitikitan a ladawan.” (Isaias 42:8) “Jehova” ti naganna, a naisurat a יהוה (mabasa nga agpakannigid) iti lenguahe a Hebreo. Agarup 7,000 a daras a nagparang dayta a nagan iti Hebreo a Kasuratan ti Biblia. Ti kaipapanan ti nagan ti Dios ket “Pagbalinenna,” a mangipasimudaag nga agbalin ni Jehova iti aniaman a kasapulan a pagbalinanna tapno maibanag dagiti panggepna wenno pagbalinenna dagiti parsuana iti aniaman a masapul a pagbalinanda tapno maibanag ti panggepna. Ti naganna iti Hebreo ket adda iti gramatikal a porma a mangipasimudaag iti madama a tignay. Ania ti kaipapanan daytoy? Ipamatmatna nga intungpal ken agtultuloy a tungtungpalen ni Jehova ti panggepna. Isu ti sibibiag a Dios, saan a basta maysa la a puersa!

³ Ni Jehova ti Namarsua. (Genesis 1:1) Isu ti “Dios a sibibiag, a nangaramid ti langit ken iti daga ken iti baybay ken iti amin a bambanag nga adda kadakuada.” (Aramid 14:15) Ni Jehova ti nangparsua iti amin a banag, agraman iti immuna a pagassawaan, da Adan ken Eva. Ti Dios ngarud ti “ubbog ti biag.” (Salmo 36:9) Isu met ti Mangsussustener iti Biag. Iti kasta, “saanna a binay-an nga awan mangsaksi iti bagina iti panagaramidna ti naimbag, nga inikkannakayo kadagiti tudo manipud langit ken kadagiti nabunga a panawen, a pinunnona a naan-anay dagiti pusoyo iti taraon ken ragsak.” (Aramid 14:17) Iti Africa ken  Asia, adu ti agdaydayaw kadagiti inapoda gapu ta dagitoy ti nakautanganda iti biag. Saan kadi nga ad-adda koma a mariknada a nakautangda iti Namarsua ken Mangsussustener iti biag, Daydiay nangparsua iti immuna a pagassawaan ken nangipaay iti kapasidadda nga agpaadu? No utobenyo dayta a kinapudno, mabalin a matignaykayo a mangikuna: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.”​—Apocalipsis 4:11.

⁴ Kadagiti binulong ti Biblia, maam-ammoyo ni Jehova a Namarsua kadakayo ken maadalyo no ania a kita a Dios. Ipalgakna a ti “Dios ket ayat.” (1 Juan 4:16; Exodo 34:6, 7) No basaenyo ti Biblia manipud Genesis agingga iti Apocalipsis, masarakanyo ti adu a salaysay a mangipakita nga isut’ pudno a naayat a Dios. Apay a diyo iyugali ti inaldaw a panagbasa iti Sao ti Dios tapno maam-ammoyo ti Namarsua kadakayo? Sipapasnek a makipagadalkayo iti Biblia kadagidiay makaammo kadagiti linaonna. (Aramid 8:26-35) No aramidenyo ti kasta, maadalyo met nga isut’ Dios ti kinahustisia, a dina palubosan nga agnanayon ti kinadakes. (Deuteronomio 32:4) Saan a nalaka a taginayonen ken timbengen ti tao ti ayat ken kinahustisia, ngem naan-anay a matimbeng ni Jehova dagitoy gapu iti siribna. (Roma 11:33; 16:27) Kas Mannakabalin-amin a Dios, kabaelanna nga ibanag ti aniaman a pagayatanna tapno matungpal dagiti panggepna. (Genesis 17:1) Ikagumaanyo nga iyaplikar ti nainsiriban a balakad a masarakanyo iti Biblia, ket ad-adda a maapresiaryo ti Namarsua kadakayo, gapu ta mabigbigyo a kanayon a pagimbagantayo dagiti balakadna.

⁵ Adda pay maysa a pamay-an a makaadani iti Dios. Babaen dayta ti kararag. Ni Jehova ti “Managdengngeg iti kararag.” (Salmo 65:2) Isu “mangaramid a nawadwad unay a lab-awanna ti amin a bambanag a dawaten wenno panunotentayo.” (Efeso 3:20) Ngem ania ti makunayo iti maysa a “gayyem” a sa la umasideg kadakayo no adda kasapulanna a pabor? Nalabit a diyo unay maipateg dayta a tao. No kasta, awan duadua a diyo kayat nga aramaten ti pribilehio nga agkararag tapno laeng agdawat iti Dios no adda kasapulanyo no di pay ket tapno agyaman ken agdayaw kenkuana.​—Filipos 4:6, 7; 1 Tesalonica 5:17, 18.