NI Abraham, maysa a nalatak ken matalek a tao idi panawen ti Biblia, pinanawanna ti nanam-ay a biag iti narang-ay a siudad ti Ur. Kalpasan a nagnaed idiay Haran iti sumagmamano a tawen, binusbosna ti biagna nga agakar-akar, a nagnaed kadagiti tolda, ket awan permanente a nagindeganna. (Genesis 12:1-3; Aramid 7:2-7; Hebreo 11:8-10) Kaskasdi, kuna ti rekord: “Nauyos ti biag ni Abraham ket natay iti naimbag a kinalakay, lakay ken napneken.” (Genesis 25:8) Apay a napnek unay iti biagna? Idi lakayen ken dandanin matay, nariknana ti pannakapnek saan laeng a maigapu kadagiti nagapuananna iti unos ti panagbiagna. Naawagan ni Abraham idi agangay kas “gayyem ni Jehova” gapu iti naisangsangayan a pammatina iti Dios. (Santiago 2:23; Isaias 41:8) Makapnek ti biag ni Abraham gapu ta nasinged ti relasionna iti Namarsua kenkuana.

² Kas iti napasaran ni Abraham agarup 4,000 a tawenen ti naglabas, matagiragsakyo met ita ti addaan panggep ken makapnek a biag no makigayyemkayo iti Dios. Kasla di nakappapati no panunotenyo a mabalinyo ti makigayyem iti Namarsua iti uniberso, ngem posible dayta. Kasano ngay? Masapul nga am-ammuen ken ayatenyo ti Dios. (1 Corinto 8:3; Galacia 4:9) Mangted panggep ken pannakapnek iti biagyo ti kasta a relasion iti Namarsua kadakayo.

³ Kadagidiay sidadaan a mangawat iti daton a  pangsubbot ni Jesu-Kristo, nangipaay ni Jehova kadagiti alagaden a mangiturong iti naragsak a biag. (Isaias 48:17) Laglagipenyo a ni Adan immalsa iti Dios idi makakaammo nga inkeddengna para iti bagina no ania ti naimbag ken no ania ti dakes. Nupay ginatang ni Jehova ti sangatauan babaen ti daton a pangsubbot ti Anakna, a nangipaay kadakuada iti gundaway a mawayawayaan iti basol ken ipapatay, nasken nga awaten ti tunggal indibidual ti subbot ket isardengnan ti mangipasdek iti bukodna nga alagaden maipapan iti naimbag ken dakes. Masapul nga agtulnogtayo kadagiti paglintegan ken prinsipio nga impaay ti Dios kadagidiay mangawat iti daton a pangsubbot ni Jesus.

⁴ Bayat nga itultuloyyo nga adalen ti Biblia ken iyaplikar dagiti prinsipio a nailanad iti dayta, awan duadua a masursuroyo nga apresiaren ti pateg ti pagalagadan ti Dios maipapan iti naimbag ken dakes. (Salmo 19:7-9) Maikunayonto iti Dios ti kas iti insawang idi ti mammadto ni Jehova a ni Moises: “Ita, pangngaasim, no nakasarakak iti pabor kadagiti matam ipakaammom kaniak, pangngaasim, ti daldalanmo, iti kasta maam-ammoka.” (Exodo 33:13; Salmo 25:4) Ipaay ti Biblia dagiti prinsipio a mangiwanwan kadakayo tapno madaeranyo dagiti parikut kadagitoy “napeggad a tiempo a narigat a pakilangenan.” (2 Timoteo 3:1) Rumayray ti apresasionyo, a mangiturong iti ad-adda a pannakaam-ammoyo ken Jehova ket iti kasta, suminged ti pannakigayyemyo kenkuana.

⁵ Natay ni Abraham a “lakay ken napneken,” ngem agingga a matmatay pay laeng ti tao, nagababa latta ti biag. Naikasigudan kadatayo amin ti tarigagay nga agbiag, kasano man ti kinalakaytayo. Maigapu daytoy iti “panangisaad [ti Dios] iti kinaagnanayon iti puso dagiti tattao; kaskasdi a dida matukod ti inaramid ti Dios manipud un-unana agingga iti panungpalan.” (Eclesiastes 3:11, New International Version) Uray agbiagtayo nga agnanayon, ditayto pulos matukod ti amin a parsua ni Jehova. Awan ti patinggana dagiti mabalin a paliiwen, adalen, ken tagiragsaken kadagiti nakaskasdaaw nga aramid ni Jehova!​—Salmo 19:1-4; 104:24; 139:14.

⁶ Nalabit a di makaay-ayo kadakayo ti agbiag nga agnanayon no napno ti daga kadagiti parikut a makitkitatay ita. Nupay kasta, saan koma a pakadanagan dayta. Inkari ti Biblia: “Adda baro a langlangit ken baro a daga nga ur-urayentayo sigun iti karina, ket kadagitoy agtaeng  ti kinalinteg.” (2 Pedro 3:13) Ti sasao a “baro a langlangit” tuktukoyenna ti baro a nailangitan a gobierno​—ti Pagarian ti Dios, a mangituray iti intero a daga. Ti “baro a daga” isu ti baro a kagimongan dagiti tattao a buklen dagidiay natulnog iti turay dayta a Pagarian. Tapno matungpal dayta, asidegen nga agtignay ni Jehova maibusor kadagidiay “mangdaddadael iti daga.”​—Apocalipsis 11:18; 2 Pedro 3:10.

⁷ Kasano kaasidegna? Kas paset “ti pagilasinan . . . ti panungpalan ti sistema ti bambanag,” dinakamat ni Jesu-Kristo ti panaggugubat dagiti nasion, “kinakirang ti taraon ken dagiti ginggined iti nadumaduma a disso,” “dagiti angol,” ken “iyaadu ti kinakillo.” (Mateo 24:3-13; Lucas 21:10, 11; 2 Timoteo 3:1-5) Sana impadto: “Inton makitayo a mapaspasamak dagitoy a banag, ammuenyo a ti pagarian ti Dios asidegen.” (Lucas 21:31) Wen, napartak ti iyaadani ti tiempo a panangdadael ni Jehova iti nadangkes. *

⁸ Kalpasan “ti dakkel nga aldaw ti Dios a Mannakabalin-amin,” inton madalusan ni Jehova ti daga iti kinadakes, agbalinto a maysa a paraiso ti dagatayo. (Apocalipsis 16:14, 16; Isaias 51:3) Iti kasta, “dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) Ngem komusta met ngay dagiti natay? Kinuna ni Jesus: “Dikay agsiddaaw iti daytoy, agsipud ta um-umayen ti oras nga amin dagidiay adda kadagiti pakalaglagipan a tanem mangngegdanto ti timekna ket rummuarda, dagidiay nagaramid iti naimbag a bambanag iti panagungar iti biag, dagidiay nangyugali iti nakadakdakes a bambanag iti panagungar iti pannakaukom.” (Juan 5:28, 29) Ni Jehova, a maseknan iti tunggal tao, tarigagayanna a pagungaren dagidiay naturog ken patay. Mabalin nga ikagkagumaan dagiti sientista ti mangtulad iti tao babaen ti genetic engineering, ngem ti Namarsua dina masapul ti mangtulad babaen iti cloning. Kabaelanna a lagipen ti amin a detalye maipapan iti tunggal maikari a tao ket pagungarenna ida. Wen, adda namnamayo a  mangabrasa kadagiti natay nga ing-ingungotenyo iti paraiso a daga!

⁹ Anianto ti kasasaad ti biag idiay Paraiso? Mapnonto ti daga kadagiti naragsak a lallaki ken babbai nga agkaykaysa a mangidaydayaw iti Namarsua. “Awanto ti agtataeng nga agkuna: ‘Masakitak.’” (Isaias 33:24; 54:13) Saanto a mapasaran ti asinoman ti makaited-sakit a panagdukot wenno pannakaburibor ti emosion ken panunot. Aglaplapusananto ti taraon para iti isuamin ket maragragsakandanto iti makapnek a trabaho a maitunos iti panggep ti Dios. (Salmo 72:16; Isaias 65:23) Sagrapendanto ti pannakikappia kadagiti ayup, kadagiti padada a tattao, ken kangrunaan ti amin, “pannakikappia iti Dios.”​—Roma 5:1; Salmo 37:11; 72:7; Isaias 11:6-9.

¹⁰ Ania ti rumbeng nga aramidenyo tapno addakayto iti dayta a Paraiso ken tagiragsakenyo a naan-anay ti makapnek a biag? Kinuna ni Jesu-Kristo: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Itultuloyyo ngarud a gun-oden ti pannakaammo maipapan ken Jehova ken ni Jesu-Kristo, nga ammuenyo no ania ti kalikaguman ti Dios kadakayo. Iti kasta, maay-ayoyo ni Jehova a Dios ket dayta ti mamagbalin iti biagyo a makapnek unay.