1-6. Mangisalaysayka iti kapadasan a mangipakita a mangaskasaba dagiti Saksi iti nadumaduma a kasasaad.

 NI Rebecca ket maysa nga agtutubo a Saksi ni Jehova idiay Ghana. Imbilangna ti eskuelaan kas teritoriana isu a kanayon a mangitugtugot kadagiti literatura a naibatay iti Biblia. Kadagiti bakante nga orasna, mangbirok kadagiti gundaway a mangasaba kadagiti padana nga estudiante. Nayadalan ni Rebecca ti sumagmamano kadagiti kaklasena.

² Iti isla ti Madagascar, nga asideg iti makindaya a kosta ti Africa, adda dua a regular pioneer nga uray no nakapudpudot ket kanayon a magmagnada iti agarup 25 a kilometro nga agturong iti naiputputong a purok. Adda sumagmamano nga interesado sadiay nga iyad-adalanda iti Biblia.

³ Tapno makasabaan dagiti tattao nga agnanaed iti igid ti Karayan Paraguay ken Karayan Paraná, dagiti Saksi idiay Paraguay ken dagiti boluntario a naggapu iti 15 a pagilian nagtitinnulongda a nangaramid iti 45 a tonelada ti kadagsenna a bangka a makalaon iti 12 a tao. Babaen daytoy a bangka, dagiti naregta a manangikaskasaba iti Pagarian naiwaragawagda ti naimbag a damag kadagiti lugar a narigat a madanon.

⁴ Dagiti Saksi idiay Alaska gunggundawayanda ti naisangsangayan nga oportunidad a mangasaba kabayatan ti kalgaw. No ngamin kapudotna, adu ti sumanglad a barko a napno kadagiti turista a nagduduma ti nasionalidadda. Gapu ta kasta, dagiti Saksi iti dayta a lugar agpuestoda iti sangladan a mangpasangbay kadagiti turista babaen kadagiti nagsayaat ti pannakaiplastarna a literatura a naibatay iti Biblia iti nagduduma a lengguahe. Iti dayta met laeng a rehion, nakapatpateg ti eroplano iti panangdanon kadagiti naiputputong a purok, iti kasta maikasaba ti naimbag a damag kadagiti komunidad ti Aleut, Athabascan, Tsimshian, ken Tlingit.

⁵ Ni Larry a taga-Texas, U.S.A., ket addaan iti espesial a teritoria—ti mismo a balay a pagaywanan a pagnanaedanna. Nupay naidalit iti de pilid a tugaw (wheelchair) gapu iti pannakaaksidentena, kanayon nga okupado ni Larry. Isarsaritana kadagiti sabsabali ti maipapan iti Pagarian, a pakairamanan ti naibatay iti Biblia a namnamana a dumtengto ti aldaw a makapagnanto manen inton agturay ti Pagarian.—Isa. 35:5, 6.

 ⁶ Adda grupo dagiti Saksi idiay Mandalay a nagbarko iti tallo nga aldaw tapno matabunuanda ti asamblea idiay makin-amianan a Myanmar. Gapu ta magagaranda a mangikasaba iti naimbag a damag, nangitugotda kadagiti literatura a naibatay iti Biblia nga ipaimada kadagiti padada a pasahero. Tunggal sumanglad ti barko iti maysa nga ili wenno purok, dagus a mapan iti kabalbalayan dagita a naregta a manangaskasaba tapno agipaimada kadagiti literatura. Inton agsublida iti barko, isublatda a kasabaan dagiti naglugan a kabbaro a pasahero.

7. Ania dagiti pamay-an nga us-usaren dagiti Saksi ni Jehova a mangikasaba iti Pagarian ti Dios, ken ania ti panggepda?

⁷ Kas kadagiti nadakamat a kakabsat, dagiti naregta nga agdaydayaw ken Jehova iti intero a lubong naan-anay nga ikaskasabada ti “Pagarian ti Dios.” (Ara. 28:23) Mangaskasabada iti binalaybalay, iti lansangan, ken babaen ti panagsurat ken panagtawag. Nakaluganda man iti bus, agpaspasiar iti parke, wenno bayat nga agmerienda wenno mangaldawda iti pagtrabahuanda, sigagagar a mangbirbirokda iti gundaway a mangikasaba iti Pagarian ti Dios. Mabalin a nagduduma ti pamay-anda a mangasaba ngem maymaysa ti panggepda—ti panangikasaba iti naimbag a damag sadinoman ti pakasarakanda kadagiti tattao.—Mat. 10:11.

8, 9. (a) Apay a kasla di nakappapati ti panagsaknap ti trabaho a panangikasaba iti Pagarian? (b) Ania ti usigentayo a mamagpanunot a saludsod, ken ania ti aramidentayo tapno maammuantayo ti sungbat?

⁸ Sika a patgenmi nga agbasbasa, maysaka kadi kadagiti adu nga aktibo a mangiwarwaragawag iti Pagarian ti Dios iti nasurok itan a 235 a pagilian? No kasta, adda pasetmo iti makaparagsak a panagsaknap ti trabaho a panangikasaba iti Pagarian! Kasla di nakappapati ti pannakaibanag ti trabahotayo iti sangalubongan. Ngamin, iti laksid ti adu a lapped ken karit—uray pay dagiti panangiparit ti gobierno ken direkta a panangidadanes—naan-anay nga ikaskasaba latta dagiti Saksi ni Jehova ti maipapan iti Pagarian ti Dios kadagiti tattao iti amin a nasion.

⁹ Ti mamagpanunot a saludsod nga usigentayo ket, Apay a dagiti lapped, uray pay ti ibubusor ni Satanas, dina mapasardeng ti panagsaknap ti trabaho a panangikasaba iti Pagarian? Tapno masungbatan dayta a saludsod, subliantayo dagiti pasamak idi umuna a siglo C.E. Kinapudnona, itultuloy laeng dagiti Saksi ni Jehova ita ti trabaho a nairugi idi.

10. Ania ti impamaysa ni Jesus, ken ania ti ammona mainaig iti dayta a trabaho?

¹⁰ Ni Jesu-Kristo, a nangipasdek iti kongregasion Kristiano, impamaysana nga inkasaba ti naimbag a damag maipapan iti Pagarian ti Dios; dayta ti trabahona bayat ti kaaddana ditoy daga. Kinunana: “Masapul nga ipakaammok met ti naimbag a damag ti Pagarian ti Dios iti dadduma pay a siudad, ta daytoy ti nakaibaonak.” (Luc. 4:43) Ammo ni Jesus a ti trabaho nga inrugina ket saanna a mairingpas nga is-isuna. Idi umadanin ti ipapatayna, impadtona a ti mensahe maipapan iti Pagarian ket maikasaba “iti amin a nasion.” (Mar. 13:10) Ngem kasano a maibanag daytoy, ken siasino ti mangibanag?

11. Ania a napateg nga annongen ti inted ni Jesus kadagiti adalanna, ken ania a tulong ti maipaay kadakuada tapno maitungpalda dayta?

 ¹¹ Kalpasan ti ipapatay ken panagungarna, nagparang ni Jesus kadagiti adalanna ket inikkanna ida iti napateg nga annongen: “Inkayo ngarud kadagiti tattao iti amin a nasion ket pagbalinenyo ida nga adalak, ken bautisaranyo ida iti nagan ti Ama ken iti nagan ti Anak ken iti nagan ti nasantuan nga espiritu, ken isuroyo a tungpalenda ti amin nga imbilinko kadakayo. Ket adtoy! addaak kadakayo iti amin nga al-aldaw agingga iti panungpalan daytoy a sistema ti bambanag.” (Mat. 28:19, 20) Ti sasao nga “addaak kadakayo” ipasimudaagna a tulonganna dagiti adalanna a mangitungpal iti trabaho a panangasaba ken panagaramid kadagiti adalan. Kasapulanda ti kasta a tulong agsipud ta impakauna ni Jesus a ‘guraento [ida] ti amin a nasion gapu iti naganna.’ (Mat. 24:9) Adda pay sabali a tumulong kadagiti adalan. Sakbay nga immuli ni Jesus idiay langit, imbagana a pabilgento ida ti nasantuan nga espiritu ket agbalindanto a saksina “agingga iti kaadaywan a paset ti daga.”—Ara. 1:8.

12. Ania dagiti usigentayo a napateg a saludsod, ken apay a napateg nga ammuentayo dagiti sungbat?

¹² Ita, adda sumagmamano a napateg a saludsod nga intay usigen: Sipapasnek kadi nga intungpal dagiti apostol ni Jesus ken dagiti dadduma pay nga adalan idi umuna a siglo ti annongenda? Naan-anay kadi nga inkasaba daytoy a bassit a grupo dagiti Kristiano ti maipapan iti Pagarian ti Dios uray idi naipasangoda iti nakaro a pannakaidadanes? Talaga kadi a tinulongan ida ni Jehova ken ti nasantuan nga espirituna, agraman ni Jesus ken dagiti anghel, iti panangitungpalda iti trabaho a panagaramid kadagiti adalan? Dagitoy ken dagiti nainaig a saludsod ket masungbatan iti libro iti Biblia nga Aramid. Nasken nga ammuentayo dagiti sungbat. Apay? Inkari ni Jesus a ti trabaho nga impaannongna ket agtultuloy “agingga iti panungpalan daytoy a sistema ti bambanag.” Naited ngarud daytoy nga annongen kadagiti amin a pudno a Kristiano, a pakairamanantayo nga agbibiag iti daytoy panawen ti panungpalan. Gapuna, paginteresantay unay nga usigen dagiti salaysay a nailanad iti libro nga Aramid.

13, 14. (a) Siasino ti nangisurat iti Aramid, ken nanggun-odanna iti impormasion nga insuratna? (b) Ania ti linaon ti Aramid?

¹³ Siasino ti nangisurat iti Aramid? Saan nga innaganan ti libro no siasino ti nangisurat, ngem nabatad iti panglukat a sasao a ti nangisurat iti Aramid ket isu met laeng ti nangisurat iti Ebanghelio ni Lucas. (Luc. 1:1-4; Ara. 1:1, 2) Gapuna, uray idi un-unana, bigbigen dagiti tattao a ti nangisurat iti Aramid ket ni Lucas, a “dungdungnguen a doktor” ken naannad a historiador. (Col. 4:14) Agarup 28 a tawen ti saklawen daytoy a libro, manipud iti iyuuli ni Jesus idiay langit idi 33 C.E. agingga iti pannakaibalud ni apostol Pablo idiay Roma idi agarup 61 C.E. Nabatad a naimatangan ni Lucas ti adu kadagiti pasamak nga insuratna ta inramanna ti bagina kadagiti dadduma a salaysayna. (Ara. 16:8-10; 20:5; 27:1) Kas naannad a managsukisok, awan duadua a kada Pablo, Bernabe, Felipe, ken dadduma pay ti nakagun-odan ni Lucas iti impormasion nga insuratna.

 ¹⁴ Ania ti linaon ti Aramid? Iti Ebanghelio nga immun-una nga insuratna, insalaysay ni Lucas ti maipapan kadagiti sinao ken inaramid ni Jesus. Ngem iti libro nga Aramid, insuratna ti maipapan kadagiti imbaga ken inaramid dagiti pasurot ni Jesus. No kasta, ti Aramid ket maipapan kadagiti tattao a nakaibanag iti nagpaiduma a trabaho nupay adu kadakuada ti minatmatan dagiti di manamati kas ‘awan adalna ken ordinario a tattao.’ (Ara. 4:13) Iti ababa a pannao, ti naipaltiing a salaysay ipakitana kadatayo no kasano a naipasdek ken rimmang-ay ti kongregasion Kristiano. Ipakita ti libro nga Aramid no kasano ti panangasaba dagiti Kristiano idi umuna a siglo—dagiti pamay-anda ken ti kababalinda. (Ara. 4:31; 5:42) Salaysayenna no kasano a nakatulong ti nasantuan nga espiritu iti pannakaisaknap ti naimbag a damag. (Ara. 8:29, 39, 40; 13:1-3; 16:6; 18:24, 25) Itampokna ti tema ti Biblia, a mainaig iti pannakasantipikar ti nagan ti Dios babaen ti Pagarianna iti panangituray ni Kristo, ken ipakitana ti naballigi a pannakaiwaragawag ti mensahe maipapan iti Pagarian iti laksid ti nakaro nga ibubusor.—Ara. 8:12; 19:8; 28:30, 31.

15. Kasano a mabenepisiarantayo no usigentayo ti libro nga Aramid?

¹⁵ Pudno a makaparagsak ken makapabileg iti pammati ti panangusig iti Aramid! Matukay ti pusotayo no utobentayo ti kinatured ken kinaregta dagiti nagkauna a pasurot ni Kristo. Matignaytayo a mangtulad iti pammati dagiti kakabsattayo idi umuna a siglo. Iti kasta, ad-adda a nakasaganatayo a mangitungpal iti annongentayo a mangaramid iti ad-adalan. Daytoy a publikasion a basbasaem ket nairanta a tumulong kenka a mangadal a naimbag iti libro nga Aramid.

16. Ania ti tallo a panggep daytoy a publikasion?

¹⁶ Ania ti kangrunaan a panggep daytoy a publikasion? Adda tallo a panggepna: (1) Ad-adda nga ipatalgedna kadatayo nga us-usaren ni Jehova ti nasantuan nga espirituna a mangiturong iti trabaho a panangikasaba iti Pagarian ken panagaramid kadagiti adalan, (2) parayrayenna ti regtatayo a mangasaba babaen ti panangusig iti ulidan dagiti pasurot ni Kristo idi umuna a siglo, ken (3) paunegenna ti panagraemtayo iti organisasion ni Jehova ken kadagidiay mangidadaulo iti trabaho a panangasaba ken mangay-aywan kadagiti kongregasion.

17, 18. Kasano ti pannakaurnos daytoy a publikasion, ken ania dagiti bennegna a makatulong iti personal a panagadalmo iti Biblia?

¹⁷ Kasano ti pannakaurnos daytoy a publikasion? Mapaliiwmo a nabingaybingay daytoy iti walo a benneg. Saklawen ti tunggal benneg ti maysa a paset ti libro nga Aramid. Dagiti sumaruno a kapitulo ket saan a bersikulo por bersikulo a panangsalaysay iti Aramid no di ket ipakitana no ania dagiti maadaltayo kadagiti pasamak a naisalaysay iti dayta a libro ti Biblia ken tulongannatayo a mangamiris no kasanotayo a mayaplikar dagiti punto a masursurotayo. Iti rugi ti tunggal kapitulo, adda paulo a mangibaga no ania ti linaon dayta a kapitulo ken adda naisitar a teksto a mangipakita no ania a paset ti Aramid ti masalaysay.

¹⁸ Adda sabali pay a benneg daytoy a publikasion a makatulong iti personal a panagadal iti Biblia. Dagiti napintas a ladawan a mangipakita kadagiti  makapagagar a pasamak a nailanad iti libro nga Aramid tulongannaka a mangiladawan iti panunotmo no ania ti mapaspasamak bayat nga us-usigem ti salaysay ti Biblia. Adu a kapitulo ti addaan kadagiti kahon a naglaon iti kanayonan ken makatulong nga impormasion. Naglaon dagiti dadduma a kahon iti impormasion maipapan iti karakter iti Biblia a ti pammatina ket maikari a tuladen. Adda met dagiti kahon a naglaon iti kanayonan a detalye maipapan kadagiti lugar, pasamak, kostumbre, wenno dadduma pay a karakter a nadakamat iti Aramid.

19. Ania ti rumbeng nga amirisentayo sagpaminsan?

¹⁹ Matulongannaka daytoy a publikasion a mangsukimat iti bagim. Kasanoman ti kabayagmon nga agserserbi kas agibumbunannag iti Pagarian, nasayaat no sagpaminsan nga amirisem dagiti prioridadmo iti biag ken ti panangmatmatmo iti Nakristianuan a ministerio. (2 Cor. 13:5) Isaludsodmo iti bagim: ‘Sigaganat kadi nga itungtungpalko ti ministeriok? (1 Cor. 7:29-31) Ikaskasabak kadi ti naimbag a damag buyogen ti natibker a pammati ken kinaregta? (1 Tes. 1:5, 6) Ar-aramidek met laeng kadi ti amin a kabaelak a makiraman iti trabaho a panangasaba ken panagaramid kadagiti adalan?’—Col. 3:23.

20, 21. Apay a nakagangganat ti annongentayo, ken ania koma ti determinasiontayo?

²⁰ Kanayon koma a laglagipentayo nga adda napateg a trabaho a naipaannong kadatayo—ti panangasaba ken panagaramid kadagiti adalan. Bayat ti panagtulid ti aldaw, ad-adda a naganat dayta a trabaho. Napartak ti iyaasideg ti panungpalan daytoy sistema ti bambanag. Ad-adda ita nga agpegpeggad ti biag ti adu a tattao. Ditay ammo no kasano pay kaadu ti mangipangag iti mensahetayo. (Ara. 13:48) Ngem responsabilidadtayo a tulongan ida bayat a saan pay a naladaw ti amin.—1 Tim. 4:16.

²¹ Napateg ngarud a tuladentayo ti ulidan dagiti naregta a manangikaskasaba iti Pagarian idi umuna a siglo. Sapay koma ta ti naannad a panangadalmo iti daytoy a publikasion parayrayenna ti kinaregta ken kinaturedmo a mangasaba. Ken sapay koma ta bumileg ti determinasionmo nga agtultuloy a naan-anay a mangikasaba iti “Pagarian ti Dios.”—Ara. 28:23.