1, 2. (a) Ania ti imbilin ni Jehova ken Ezekiel? (b) Ania dagiti saludsod nga usigentayo?

KAKITKITA ni Ezekiel ti sirmata a nangipalagip kenkuana iti napalabas a dandani 900 a tawen idi tiempo ni Moises ken Josue. Inladawan idi ni Jehova ken Moises dagiti pagpatinggaan ti teritoria iti Naikari a Daga ken imbagana ken Josue idi agangay no kasano a bingaybingayen dayta para kadagiti tribu ti Israel. (Num. 34:1-15; Jos. 13:7; 22:4, 9) Ngem idi 593 B.C.E., binilin ni Jehova ni Ezekiel ken dagiti padana a naipanaw a bingaybingayenda ti Naikari a Daga para kadagiti tribu ti Israel!​—Ezek. 45:1; 47:14; 48:29.

² Ania ti mensahe daytoy a sirmata para ken Ezekiel ken kadagiti padana a naipanaw? Apay a makaparegta daytoy a sirmata para iti ili ti Dios ita? Adda kadi dakdakkel a kaitungpalanna iti masanguanan?

3, 4. (a) Ania nga uppat a pammatalged kadagiti naipanaw ti impaay ti maudi a sirmata ni Ezekiel? (b) Iti daytoy a kapitulo, ania ti garantia nga usigentayo?

³ Ti maudi a sirmata a nakita ni Ezekiel ket naisurat iti siam a kapitulo ti libro ti Ezekiel. (Ezek. 40:1–48:35) Impaayanna dagiti  naipanaw iti uppat a makapabileg a pammatalged maipapan iti napabaro a nasion ti Israel. Ania dagita a pammatalged? Umuna, maisubli ti nadalus a panagdaydayaw iti templo ti Dios. Maikadua, idauluan ti nalinteg a papadi ken papastor ti naisubli a nasion. Maikatlo, adda tawiden a daga ti amin nga agsubli iti Israel. Ken maikapat, addanto ni Jehova kadakuada ket makipagnaed manen kadakuada.

⁴ Nailawlawag iti Kapitulo 13 ken 14 daytoy a libro no kasano a mapasamakto ti umuna a dua a garantia​—ti pannakaisubli ti pudno a panagdaydayaw ken ti panangidaulo dagiti nalinteg a papastor. Iti daytoy a kapitulo, agpokustayo iti maikatlo a garantia, ti kari maipapan iti maipatawid a daga. Iti sumaruno a kapitulo, usigentayo ti kari maipapan iti kaadda ni Jehova.​—Ezek. 47:13-21; 48:1-7, 23-29.

5, 6. (a) Iti sirmata ni Ezekiel, ania a “teritoria” ti naibilin a bingaybingayenna? (Kitaen ti ladawan iti rugi ti kapitulo.) (b) Ania ti panggep ti sirmata maipapan iti maited a daga?

⁵ Basaen ti Ezekiel 47:14. Babaen ti sirmata, impakita ni Jehova ken Ezekiel ti maysa a paset ti daga a dandanin mapapintas a kas iti “hardin ti Eden.” (Ezek. 36:35) Kalpasanna, imbaga ni Jehova: “Daytoy ti teritoria nga itedyo kas tawid a daga ti 12 a tribu ti Israel.” (Ezek. 47:13) “Ti teritoria” a maited ket ti naisubli a daga ti Israel a pagsublian dagiti naipanaw. Sumaruno, kas nairekord iti Ezekiel 47:15-21, indetalye ni Jehova ti eksakto a pagpatinggaan ti intero a daga a tawidenda.

⁶ Ania ti panggep ti sirmata maipapan iti maited a daga? Ti nailadawan nga eksakto a rukod dagiti pagpatinggaan ti teritoria ket pammatalged ken Ezekiel ken kadagiti padana a naipanaw a talaga a maisubli ti ipatpategda a daga. Panunotem laengen ti ragsak dagiti naipanaw iti detalyado ken nagsayaat ti pannakailadawanna a pammatalged ni Jehova! Talaga kadi a naawat ti ili ti Dios idi un-unana ti daga a nabingaybingay kas tawidda? Wen.

7. (a) Ania dagiti nangrugi a napasamak idi 537 B.C.E., a mangipalagip kadatayo iti ania? (b) Ania a saludsod ti usigentayo nga umuna?

⁷ Idi 537 B.C.E., agarup 56 a tawen kalpasan a nakita ni Ezekiel ti sirmata, rinibu a naipanaw ti nagsubli iti Israel ken tinagikuada ti daga. Dagita a napateg a pasamak idi un-unana ti mangipalagip kadatayo iti mapaspasamak iti ili ti Dios iti agdama a tiempo. Arigna adda met bingayda a daga. Kasano? Impalubos ni Jehova a sumrekda iti naespirituan a daga ken tagikuaenda dayta. No kasta, ti pannakaisubli ti nagkauna a Naikari a Daga ket adu ti isurona kadatayo maipapan iti pannakaisubli ti naespirituan a daga ti ili ti Dios ita. Ngem sakbay nga usigentayo dagiti masursurotayo, sungbatantayo nga umuna daytoy a saludsod, “Apay a makunatayo a talaga nga adda naespirituan a daga ita?”

8. (a) Ania a nasion ti insukat ni Jehova iti nasion dagiti natural nga Israelita? (b) Ania ti naespirituan a daga, wenno paraiso? (c) Kaano a naadda dayta, ken siasino dagiti aggigian iti dayta?

 ⁸ Iti immun-una a sirmata a nabuya ni Ezekiel, impakita ni Jehova a dagiti padto maipapan iti pannakaisubli ti Israel ket adda dakdakkel a kaitungpalanda kalpasan a mangrugi ti panagari ni Jesu-Kristo, ti ‘adipenna a ni David.’ (Ezek. 37:24) Nangrugi ti panagarina idi 1914 C.E. Iti dayta a tiempo, ti nasion dagiti natural nga Israelita ket nabayagen a sinuktan ti nasion ti naespirituan nga Israel ti Dios, a buklen dagiti Kristiano a dinutokan ti espiritu. (Basaen ti Mateo 21:43; 1 Pedro 2:9.) Ngem saan la a ti natural a nasion ti Israel ti sinuktan ni Jehova iti naespirituan a nasion. Sinuktanna met uray ti pisikal a daga ti Israel iti naespirituan a daga, wenno paraiso. (Isa. 66:8) Kas nakitatayo iti Kapitulo 17 daytoy a libro, ti naespirituan a daga ket ti natalged a naespirituan a kasasaad, wenno pakaar-aramidan dagiti aktibidad, a sadiay, dagiti natda kadagiti nadutokan idaydayawda ni Jehova sipud 1919. (Kitaen ti kahon 9B, “Apay a 1919?”) Iti panaglabas  ti tiempo, dagidiay addaan iti naindagaan a namnama, ti ‘sabsabali a karnero,’ ket nangrugi metten nga agyan iti daytoy a naespirituan a daga. (Juan 10:16) Nupay agtultuloy ken agsaksaknap ita ti naespirituan a paraiso, masagraptayto laeng dagiti bendision iti kasayaatan a pamay-an kalpasan ti Armagedon.

9. Ania dagiti detalyado a bilin ni Jehova maipapan iti pannakabingaybingay ti daga?

⁹ Basaen ti Ezekiel 48:1, 28. Idi naipakaammon ti pagpatinggaan ti intero a daga a tawidenda, indetalye ni Jehova no kasano ti pannakabingaybingay ti daga. Imbilinna a ti daga a tawiden ti 12 a tribu ket agpapada ken eksakto ti rukodda manipud amianan agingga iti abagatan. Ti tribu ti Dan ti umuna manipud iti makin-amianan a pungto ti daga agingga iti tribu ti Gad iti makin-abagatan a pungto. Tunggal maysa kadagiti 12 a naipatawid a daga ket diretso a benneg a mangrugi manipud iti pagpatinggaan ti daga iti daya agingga iti Dakkel a Baybay, wenno Baybay Mediteraneo, iti laud.​—Ezek. 47:20.

10. Ania dagiti impatalged daytoy a paset ti sirmata kadagiti naipanaw?

¹⁰ Ania dagiti ipatalged daytoy a paset ti sirmata kadagiti naipanaw? Ti imbaga ni Ezekiel a detalyado a pannakabingaybingay ti daga ti nangparegta kadagiti naipanaw a nakaur-urnos ti pannakabingay ti daga. Maysa pay, ti umiso a pannakabingay ti daga para iti 12 a tribu ipaganetgetna a tunggal maysa nga agsubli ket sigurado nga adda tawidenna manipud iti naisubli a daga. Awan ti asinoman nga agsubli nga awan ti tawidenna a daga wenno pagyanan.

11. Ania dagiti masursurotayo iti daytoy a padto a sirmata maipapan iti pannakabingaybingay ti daga? (Kitaen ti kahon a “Ti Pannakabingaybingay ti Daga.”)

¹¹ Ania dagiti makaparegta a masursurotayo ita iti daytoy a sirmata? Ti naisubli a Naikari a Daga ket saan la a para kadagiti papadi, wenno Levita, ken kadagiti panguluen no di ket para iti amin a sabali pay a kameng ti 12 a tribu. (Ezek. 45:4, 5, 7, 8) Umasping iti dayta, ti naespirituan a paraiso ita ket saan la a para kadagiti natda kadagiti dinutokan ti espiritu ken para kadagiti mangidadaulo a miembro ti “dakkel a bunggoy” no di ket para iti amin a sabali pay a miembro ti dakkel a bunggoy. * (Apoc. 7:9) Kasanoman kabassit ti pasettayo iti organisasion, sigurado nga adda lugartayo ken napateg a pasettayo iti naespirituan a daga. Anian a makapabileg a pammatalged!

12, 13. Ania dagiti espesipiko nga imbilin ni Jehova maipapan iti pannakaited ti daga a bingay dagiti tribu?

¹² Mabalin a nasdaaw ni Ezekiel iti dadduma kadagiti bilin ni Jehova maipapan iti pannakabingaybingay ti daga ta naiduma dagita kadagiti imbilinna idi ken Moises. Kitaentayo ti dua a nagdumaanda. Maipapan dayta iti daga ken kadagiti umilina.

 ¹³ Umuna, ti daga. Naibilin ken Moises nga ad-adu ti ipatawidna kadagiti daddadakkel a tribu ngem kadagiti babbabassit a tribu. (Num. 26:52-54) Ngem iti sirmata ni Ezekiel, nangted ni Jehova kadagiti espesipiko nga instruksion nga ikkanna iti ‘agpapada a bingay [“tunggal maysa a kas iti kabsatna,” ftn.]’ ti amin a tribu. (Ezek. 47:14) Isu a ti rukod ti daga para iti maysa a tribu manipud amianan a pagpatinggaanna agingga iti abagatan a pagpatinggaanna ket eksakto a kapada ti dadduma pay iti 12 a tribu. Amin nga Israelita​—aniaman ti tribuna—​ket padapada a makagun-od iti nabaknang nga apit a patauden ti nadam-eg a Naikari a Daga.

14. Ania a bilin maipapan kadagiti ganggannaet a residente ti saan idi nga imbaga ni Jehova iti Mosaiko a Linteg?

¹⁴ Maikadua, dagiti umilina. Gapu iti Mosaiko a Linteg, protektado dagiti ganggannaet ken naipalubos a makipagdaydayawda ken Jehova, ngem awan ti tawidda a daga. (Lev. 19:33, 34) Nupay kasta, adda imbaga ni Jehova ken Ezekiel a saanna idi nga imbaga iti Linteg. Imbilin ni Jehova: “Ikkanyo ti ganggannaet a residente iti tawidna iti teritoria ti tribu a pagnanaedanna.” Gapu iti dayta a bilin, inikkat ni Jehova ti dakkel a nagdumaan dagiti “pudpudno nga Israelita” ken dagiti ganggannaet a residente iti  daga. (Ezek. 47:22, 23) Iti naisubli a daga a nasirmata ni Ezekiel, nakitana nga adda panagpapada ken panagkaykaysa iti panagdaydayaw dagiti umili.​—Lev. 25:23.

15. Ania nga agnanayon a kinapudno maipapan ken Jehova ti impatalged dagiti bilinna maipapan iti daga ken kadagiti umilina?

¹⁵ Gapu iti daytoy dua a naisangsangayan a bilin a naawat ni Ezekiel maipapan iti daga ken kadagiti umilina, napatalgedan ti namnama dagiti naipanaw. Ammoda nga agpapada ti ipatawid ni Jehova kadakuada, Israelitada man wenno ganggannaet nga agdaydayaw ken Jehova. (Esd. 8:20; Neh. 3:26; 7:6, 25; Isa. 56:3, 8) Patalgedan met dagita a bilin ti makaparegta ken agnanayon a kinapudno, a para ken Jehova, agpapada a napateg ti amin nga adipenna. (Basaen ti Haggeo 2:7.) Ita, nailangitan man wenno naindagaan ti namnamatayo, ipatpategtayo ti isu met la a kinapudno.

16, 17. (a) Ania ti magunggonatayo iti panangusigtayo kadagiti detalye maipapan iti daga ken kadagiti umili? (b) Ania ti usigentayo iti sumaruno a kapitulo?

¹⁶ Ania ti magunggonatayo iti panangusigtayo kadagiti detalye maipapan iti daga ken kadagiti umili? Maipalagip kadatayo a masapul a nalawag a makita ti panagpapada ken panagkaykaysatayo ita iti sangalubongan a panagkakabsattayo. Saan a mangidumduma ni Jehova. Masapul nga isaludsodtayo iti bagitayo: ‘Tultuladek kadi ti saan a panangidumduma ni Jehova? Naimpusuan kadi a raraemek ti padak nga agdaydayaw kenkuana, aniaman ti pulina wenno kasasaadna iti biag?’ (Roma 12:10) Maragsakantayo ta impalubos ni Jehova nga agpapada a matagiragsaktayo amin ti naespirituan a paraiso, a pangipapaayantayo iti amin-kararua ken sagrado a panagserbi iti nailangitan nga Amatayo ken pakasagsagrapantayo kadagiti bendisionna.​—Gal. 3:26-29; Apoc. 7:9.

¹⁷ Usigentayo itan ti maikapat a pammatalged a makitatayo iti maudi a paset ti sirmata a nakita ni Ezekiel​—ti kari nga adda ni Jehova kadagiti naipanaw. Ania dagiti masursurotayo iti dayta a kari? Maammuantayo ti sungbat iti sumaruno a kapitulo.