1, 2. (a) Maipaspasangotayo amin iti ania a pagpilian? (b) Ania ti imbaga ti maysa a matalek nga anghel idi adda agdayaw koma kenkuana?

MASAPUL a sungbatan ti tunggal maysa kadatayo ti napateg a saludsod: Asino ti pagdayawak? Mabalin nga adu ti mangibaga a komplikado daytoy a banag ken makatikaw dagiti pagpilian. Ngem kinapudnona, nalawag ken simple laeng ti pagpilian. Mabalin a ni Jehova ti pagdaydayawantayo wenno ni Satanas a Diablo.

² Kayat ni Satanas nga isu ti pagdayawan. Nakalawlawag dayta idi sinulisogna ni Jesus. Kas nailawlawag iti Kapitulo 1 daytoy a libro, impakita ni Satanas ken Jesus ti naisangsangayan a gunggona​—ti autoridad a mangituray iti amin a pagarian iti daga. Ania ti kayat ti Diablo a kasukat dayta? Imbagana ken Jesus: “Agdayawka kaniak uray maminsan laeng.” (Mat. 4:9) Ngem iti kasupadina, ti anghel a nangipakita ken apostol Juan iti apocalipsis wenno palgaak dina kinayat ti mapagdayawan. (Basaen ti Apocalipsis 22:8, 9.) Idi pagdayawan koma ni Juan ti anghel, insungbat dayta a napakumbaba nga espiritu nga anak ti Dios: “Dimo aramiden dayta!” Imbes nga ibagana, ‘Agdaydayawka kaniak,’ kinuna ti anghel, “Agdaydayawka iti Dios.”

3. (a) Ania ti panggep daytoy a libro? (b) Ania ti usigentayo ita?

 ³ Panggep daytoy a libro a pabilgen ti determinasiontayo a mangaramid iti imbilin dayta nga anghel​—ni laeng Jehova a Dios ti pagdayawantayo. (Deut. 10:20; Mat. 4:10) Repasuentayo biit dagiti nasursurotayo maipapan iti nadalus a panagdaydayaw kadagiti padto ken sirmata ni Ezekiel. Kalpasanna, iti tulong ti Kasuratan, tannawagantayo ti masanguanan inton ti tunggal tao ditoy daga ket maipasango iti maudi a pannubok​—maysa a pannubok a mangikeddeng no siasino ti agbiag a makakita iti naan-anay a pannakaisubli ti nadalus a panagdaydayaw ken Jehova iti agnanayon.

4. Ania a tallo a tema ti naipaganetget iti libro nga Ezekiel?

⁴ Isuro kadatayo ti libro nga Ezekiel a saan a basta panangaramid kadagiti ritual a maipakita ti nadalus a panagdaydayaw. Masapul nga (1) ipaaytayo ken Jehova ti naipamaysa a debosion, (2) agtalinaedtayo a naikaykaysa iti nadalus a panagdaydayaw, ken (3) ipakitatayo ti ayat iti sabsabali. Usigentayo no kasano a naitampok dagita a tallo a tema kadagiti padto ken sirmata a nailawlawag iti daytoy a libro.

5-9. Ania dagiti nasursurotayo maipapan iti panangipaay ken Jehova iti naipamaysa a debosion?

⁵ Kapitulo 3: * Ti nagsayaat a sirmata maipapan ken Jehova a napalawlawan iti bullalayaw ken naglugan iti ngato dagiti mannakabalin nga espiritu a parsua ket mangipaganetget kadatayo iti kangrunaan a kinapudno​—ti laeng Mannakabalin-amin ti maikari a pagdaydayawantayo.​—Ezek. 1:4, 15-28.

⁶ Kapitulo 5: Makapakigtot unay a makita iti sirmata a narugitanen ti templo ni Jehova! Ipakita dayta nga awan ti banag a mailemmeng ken Jehova. Makitkitana dagiti dakes nga aramid, a kas iti panagdaydayaw ti ilina kadagiti didiosen, uray no saan a makita dagita ti tattao. Masaktan ti riknana kadagita nga aramid ket dusaenna dagiti mangar-aramid kadagita.​—Ezek. 8:1-18.

⁷ Kapitulo 7: Ti impakaammona a panangukom kadagiti nasion iti aglawlaw a ‘napalalo ti pananglaisda’ iti Israel paneknekanna a singiren ni Jehova dagidiay dakes ti panangtratoda iti ilina. (Ezek. 25:6) Ngem adda pay masursurotayo iti pannakilangen dagiti Israelita kadagita a nasion​—masapul a napudnotayo kangrunaanna ken Jehova. Ditay pulos kayat nga ibaba dagiti pagalagadantayo tapno laeng mapagustuan dagiti kabagiantayo a saan nga agdaydayaw ken Jehova. Ditay met agtalek iti kinabaknang wenno ikompromiso ti neutralidadtayo babaen ti panangtedtayo kadagiti gobierno ti tattao iti panagtalek a maikari laeng ken Jehova.

⁸ Kapitulo 13 ken 14: Ti nasirmata a templo nga adda iti nangato a bantay isuronatayo a masapul nga agbiagtayo maitunos kadagiti nangato a pagalagadan ni Jehova, nga ibilangtayo a nangatngato isuna ngem iti amin a sabali a dios.​—Ezek. 40:1–48:35.

 ⁹ Kapitulo 15: Ti naipadto a pannakailadawan ti Israel ken Juda kas balangkantis ipalagipna kadatayo no kasano kadakes para ken Jehova ti panagdayaw iti sabali a dios malaksid kenkuana.​—Ezek. kap. 16, 23.

10-14. Kasano a naipaganetget ti kinapateg ti panagtalinaedtayo a naikaykaysa iti nadalus a panagdaydayaw?

¹⁰ Kapitulo 8: Dagiti padto a nangikarian ni Jehova a mangted iti ‘pastor’ a mangaywan iti ilina ti mangipaganetget kadatayo a masapul nga adda kappia ken panagkaykaysatayo nga agtrabaho iti sidong ti panangituray ni Jesus.​—Ezek. 34:23, 24; 37:24-28.

¹¹ Kapitulo 9: Dagiti padto ni Ezekiel maipapan iti panangwayawaya ti Dios iti ilina iti pannakaadipenda idiay Babilonia ken iti pannakaisublida iti dagada ket naglaon iti mensahe a pakagunggonaan dagiti mayat a mangparagsak iti Dios ita. Dagiti mangipapaay iti nadalus a panagdaydayaw ken Jehova ket masapul nga isardengda dagiti dakes nga impluensia ti ulbod a relihion ken itultuloyda nga adaywan dagita. Uray nagduduma idi ti relihiontayo, kasasaadtayo iti biag, ken pulitayo, masapul nga itultuloytayo ti agkaykaysa kas pakabigbigantayo nga ili ti Dios.​—Ezek. 11:17, 18; 12:24; Juan 17:20-23.

¹² Kapitulo 10: Naipaganetget ti panagkaykaysa iti sirmata maipapan kadagiti namaga a tulang a nagbiag manen. Anian a nagsayaat a pribilehio a pasettayo iti naisubli a grupo dagiti mangipapaay iti nadalus a panagdaydayaw nga agkaykaysa kas maysa nga armada!​—Ezek. 37:1-14.

¹³ Kapitulo 12: Ad-adda a naipaganetget ti panagkaykaysa iti padto a panagtipon ti dua a baston. Talaga a makapabileg a makita a tungtungpalen dagiti dinutokan ti espiritu ken dagiti sabsabali a karnero dayta a padto! Nupay agbibiagtayo iti lubong nga aggiginnura gapu iti relihion ken politika, agtultuloy latta ti panagkaykaysatayo gapu iti ayat ken panagbalintayo a napudno.​—Ezek. 37:15-23.

¹⁴ Kapitulo 16: Ti sirmata maipapan iti lalaki nga addaan iti tintero ken dagiti lallaki a nakaiggem iti armas a pangburak ket naglaon iti serioso a pakdaar​—dagidiay laeng mangipapaay iti nadalus a panagdaydayaw bayat ti “dakkel a rigat” ti mamarkaan iti pannakaisalakan.​— Mat. 24:21; Ezek. 9:1-11.

15-18. Apay a masapul nga itultuloytayo nga ipakita ti ayat, ken kasanotayo a maaramid dayta?

¹⁵ Kapitulo 4: Ti sirmata maipapan iti uppat a sibibiag a parsua insurona kadatayo dagiti kualidad ni Jehova, a ti ayat ti kangrunaan kadagita. No agsao ken agtignaytayo iti naayat a pamay-an, pampaneknekantayo a ni Jehova ti Diostayo.​—Ezek. 1:5-14; 1 Juan 4:8.

 ¹⁶ Kapitulo 6 ken 11: Gapu iti ayat, nangdutok ti Dios kadagiti parabantay a kas ken Ezekiel. Gapu ta ti Dios ket ayat, saanna a kayat a madadael ti asinoman inton pagpatinggaenna ti panangituray ni Satanas iti daga. (2 Ped. 3:9) Pribilehiotayo nga ipakita ti ayat ti Dios babaen ti panangtungpaltayo iti responsabilidadtayo a mangsuporta iti trabaho ti parabantay iti agdama a tiempo.​—Ezek. 33:1-9.

¹⁷ Kapitulo 17 ken 18: Ammo ni Jehova nga adu ti mangilaksid iti asina ken padasenda nga interamente a pukawen dagiti matalek nga agdaydayaw kenkuana. Gapu iti ayat, idepensanto ni Jehova ti ilina inton rauten ni “Gog iti daga ti Magog,” dagidiay matalek Kenkuana. Gapu iti ayat iti sabsabali, ipakpakdaartayo iti ad-adu pay a tattao ti panangdadaelto ni Jehova kadagidiay mangirurrurumen iti ilina.​—Ezek. 38:1–39:20; 2 Tes. 1:6, 7.

¹⁸ Kapitulo 19, 20, ken 21: Kadagiti sirmata maipapan iti karayan a mangted iti biag ti danumna ken iti pannakabingaybingay ti daga, nakalawlawag a makita kadagita ti ayat ni Jehova kadagiti tattao. Iladawan dagiti sirmata dagiti resulta ti kadakkelan a panangipakita ni Jehova iti ayatna, ti panangtedna iti biag ti Anakna tapno mapakawan dagiti basoltayo ken maaddaantayo iti perpekto a biag kas paset ti pamiliana. Maysa kadagiti kasayaatan a pamay-an a maipakitatayo ti ayattayo kadagiti tattao ket ti panangipakaammo iti nagsayaat a masanguanan nga insagana ni Jehova para kadagiti mamati iti Anakna.​—Ezek. 45:1-7; 47:1–48:35; Apoc. 21:1-4; 22:17.

19. Ania ti aramiden ni Jesus bayat ti Sangaribu a Tawen a Panagturayna? (Kitaen ti kahon a “Panangsango iti Maudi a Pannubok.”)

¹⁹ Bayat ti Sangaribu a Tawen a Panagturay ni Jesus, pagungarennanto ti binilion a tattao ken punasenna ti saem maigapu iti ‘kabusortayo, ni patay.’ (1 Cor. 15:26; Mar. 5:38-42; Ara. 24:15) Ti pakasaritaan ti sangatauan ket kas iti naladingit nga estoria a napno iti kinaliday ken ipapatay. Ngem bayat a mapagungar ti tunggal henerasion, buraento ni Jesus ti nakalkaldaang nga estoria ken ikkanna dagiti napagungar iti gundaway a mangisurat iti nasaysayaat nga estoria. Babaen ti daton a subbot, ikkatennanto ti amin nga epekto ti sakit, gubat, ken bisin. Ngem napatpateg pay, tulongannatayo a mangikkat iti ramut ti panagladingittayo​—ti basol a natawidtayo ken Adan. (Roma 5:18, 19) Naan-anayto a ‘dadaelen ni Jesus dagiti aramid ti Diablo.’ (1 Juan 3:8) Ania ti sumaruno a mapasamak?

20. Kasano nga ipakitanto ni Jesus ken ti 144,000 ti naisangsangayan a kinapakumbaba? Ilawlawagyo. (Kitaen ti ladawan iti rugi ti kapitulo.)

²⁰ Basaen ti 1 Corinto 15:24-28. Inton perpekton ti amin a tattao ken nagbalinen a Paraiso ti daga kas iti orihinal a panggep ni Jehova, ni Jesus ken ti 144,000 a makipagturay kenkuana ipakitadanto ti naisangsangayan a kinapakumbaba; isublidanto ti Pagarian  ken Jehova. Sibubulos ti riknada a mangisublinto iti autoridad a naited kadakuada iti 1,000 a tawen. Amin a naaramidan ti Pagarian ket agpaut iti agnanayon.

21, 22. (a) Ania ti kasasaad ti lubong inton agpatingga ti 1,000 a tawen? (b) Apay a ni Jehova paruarennanto ni Satanas ken dagiti demonio?

²¹ Kalpasanna, addanto naisangsangayan nga aramiden ni Jehova a mangipakita a dakkel ti panagtalekna kadagiti iturayanna ditoy daga. Ibilinnanto a maparuar ni Satanas ken dagiti demonio manipud iti nakaun-uneg nga abut a nakaipupokanda iti 1,000 a tawen. (Basaen ti Apocalipsis 20:1-3.) Ti lubong a makitadanto ket naiduma unay iti dati nga ammoda. Sakbay ti Armagedon, inallilaw ni Satanas ti kaaduan a tattao ken dinadaelna ti panagkaykaysada gapu iti gura ken panangidumduma. (Apoc. 12:9) Ngem iti ngudo ti 1,000 a tawen, amin a tattao ket agdaydayawen ken Jehova kas agkaykaysa ken agiinnayat a pamilia. Natalnanton a Paraiso ti daga.

 ²² Apay a paruaren ni Jehova dagiti kriminal a kas ken Satanas ken dagiti demonio iti nadalusen nga aglawlaw? Kaaduan ngamin a sibibiag inton agpatingga ti 1,000 a tawen ket saan pay a pulos nasubok ti kinamatalekda kas napudno nga agdaydayaw ken Jehova. Kaaduan kadagiti mapagungar iti Paraiso ket saanda idi nga am-ammo ni Jehova. Saan la a pinagbiag ida ni Jehova no di ket impaaynan ti amin a pisikal ken naespirituan a kasapulanda. Awan ti napadasanda a dakes nga impluensia no di ket puro nasayaat. Dagiti nakalkalangenda a tattao ket mangay-ayat ken agserserbi ken Jehova. Mabalin nga akusaran ni Satanas dagiti mapagungar kas iti inaramidna idi ken Job​—agserserbida laeng iti Dios gapu ta salsalakniban ken bembendisionanna ida. (Job 1:9, 10) Isu a sakbay a permanente nga isurat ni Jehova dagiti nagantayo iti libro ti biag, ikkannatayto iti gundaway a mangpaneknek a talaga a napudnotayo kenkuana kas Amatayo ken Kangatuan nga Agturay kadatayo.​—Apoc. 20:12, 15.

23. Ania nga isyu ti pakaipasanguanto ti tunggal tao?

 ²³ Iti apagbiit a tiempo, maikkan ni Satanas iti gundaway a mangsulisog kadagiti tattao a tumallikud iti Dios. Anianto dayta a pannubok? Sigurado a maipasangonto ti tunggal maysa iti isu met la nga isyu a naipasango idi kada Adan ken Eva​—surotenda dagiti pagalagadan ni Jehova, suportaranda ti panagturayna, ken agdayawda kenkuana wenno agrebeldeda iti Dios ket suportaranda ni Satanas.

24. Apay a dagiti agrebelde ket maawagan iti Gog ken Magog?

²⁴ Basaen ti Apocalipsis 20:7-10. Dagiti agrebelde iti ngudo ti 1,000 a tawen ket maawagan iti Gog ken Magog. Dagiti kababalinda ket kas kadagiti rebelde nga impadto ni Ezekiel a mangraut iti ili ti Dios bayat ti dakkel a rigat. Dagita nga immun-una a grupo dagiti tattao, a “Gog iti daga ti Magog,” ket adda idi iti nadumaduma a nasion a bimmusor iti turay ni Jehova. (Ezek. 38:2) Umasping iti dayta, dagidiay agrebelde iti ngudo ti Sangaribu a Tawen a Panagturay ni Kristo ket nailadawan kas “dagiti nasion.” Makapainteres ti pannakausar dagita a sasao. Apay? Gapu ta bayat ti Sangaribu a Tawen a Panagturay, naikkatton dagiti pakaigapuan ti pannakasinasina ti amin a nasion; ti amin a tattao ket iturayanton  ti maymaysa a gobierno, ti Pagarian ti Dios. Amintayo ket agbalinton nga umili ti maymaysa a naespirituan a nasion. Ti panangawag kadagitoy a rebelde kas Gog ken Magog ken kas “dagiti nasion” sigun iti padto ipakitana nga agballiginto ni Satanas a mangpataud iti panagsisina iti dadduma a kameng ti ili ti Dios. Awanto ti mapilit a dumasig ken Satanas. Tunggal perpekto a tao ket masapul nga agpilinto.

25, 26. Mano ti dumasigto ken Satanas, ket ania ti mapasamakto kadakuada?

²⁵ Mano ti dumasigto ken Satanas? Ti bilang dagiti agrebelde ket “kas iti darat ti baybay.” Dina kayat a sawen a dakkel a porsiento iti bilang ti amin a tattao ti agrebelde. Kasanotayo nga ammo? Subliantayo ti naikari ken Abraham. Imbaga ni Jehova ken Abraham a ti kaputotanna ket umadu a kas “kadagiti darat iti igid ti baybay.” (Gen. 22:17, 18) Ngem 144,001 laeng ti dagup ti kaputotanna. (Gal. 3:16, 29) Nupay dakkel met dayta a bilang, nagbassit laeng no ikompara iti bilang ti amin a tattao. Mabalin nga adu met ti dumasigto ken Satanas ngem saan a nakaad-adu unay. Dagiti rebelde ket saanto unay a mamagpeggad kadagiti matalek nga agserserbi ken Jehova.

 ²⁶ Madadaelto a dagus dagiti agrebelde. Kas ken Satanas ken dagiti demonio, mapukawdanto​—nga awanen ti namnamada nga agbiag manen. Dagiti laengen di umiso a desisionda ken dagiti dakes a resulta dagita a desision ti malagip iti agnanayon.​—Apoc. 20:10.

27-29. Ania ti agur-uray kadagiti makapasa iti maudi a pannubok?

²⁷ Iti sabali a bangir, dagidiay makapasa iti maudi a pannubok ket permanente a maisuratto dagiti naganda “iti libro ti biag.” (Apoc. 20:15) Kalpasanna, kas agkaykaysa a pamilia, ti amin a matalek a lallaki ken babbai nga annak ni Jehova ipaaydanton ti panagdaydayaw a maikari unay kenkuana.

²⁸ Panunotem dayta a masanguanan. Agur-uray kenka ti makagunggona a trabaho ken makaparagsak a panaggagayyem. Saankanton a pulos agsagaba wenno dagiti ipatpategmo. Kas naan-anay nga awanan iti basol, makaasidegkanton ken Jehova a saanmon a kasapulan ti mangibabaet. Awanton ti lapped iti pannakigayyem ti tunggal tao iti Dios. Kangrunaan iti amin, idiay langit ken ditoy daga, perpektonton ti pannakaipaay ti nadalus a panagdaydayaw. Daytanto ti naan-anay a pannakaisubli ti nadalus a panagdaydayaw!

²⁹ Addakanto kadi sadiay a makakita iti dayta a naindaklan nga aldaw? Wen, no itultuloymo nga iyaplikar ti tallo a kangrunaan a masursuro iti libro nga Ezekiel​—ipaaymo ken Jehova ti naipamaysa a debosion, agtalinaedka a naikaykaysa iti nadalus a panagdaydayaw,  ken ipakitam ti ayatmo iti sabsabali. Adda pay maudi ken napateg a masursurotayo kadagiti padto ni Ezekiel. Ania dayta?

30, 31. Anianto ti kaipapanan ti deklarasion a “maammuandanto a siak ni Jehova” para (a) kadagiti kabusor ti Dios? (b) iti ili ti Dios?

³⁰ Iti intero a libro nga Ezekiel, kasla banugbog ti tambor a maulit-ulit ti deklarasion a “maammuandanto a siak ni Jehova.” (Ezek. 6:10; 39:28) Gubat ken ipapatay ti kaipapanan dayta kadagiti kabusor ti Dios. Saandanto laeng a mapilitan a mangbigbig iti kaadda ni Jehova. Agsagabadanto pay sakbay a maawatanda a “Pagbalinenna” ti kaipapanan ti naindaklan a naganna. Ni “Jehova a panguluen dagiti armada” ket agbalinto a “nabileg a mannakigubat,” a manglaban kadakuada. (1 Sam. 17:45; Ex. 15:3) Naladaw unayen inton maawatanda ti nagpateg a kinapudno maipapan ken Jehova: Awan ti makapasardeng kenkuana a mangtungpal iti panggepna.

³¹ Iti ili ti Dios, talna ken biag ti kaipapanan ti deklarasion a “maammuandanto a siak ni Jehova.” Pagbalinennatayto ni Jehova kas iti orihinal a panggepna para kadatayo​—perpekto nga annakna a lallaki ken babbai a mangipakpakita kadagiti kualidadna. (Gen. 1:26) Nagbalinen ni Jehova a nadungngo nga Amatayo ken mangsalaknib a Pastortayo. Asidegen nga agbalin a mangparmek nga Aritayo. Sakbay a dumteng dayta nga aldaw, ipapusotayo koma ti mensahe ni Ezekiel. Inaldaw a paneknekantayo iti sasao ken ar-aramidtayo nga am-ammotayo ni Jehova ken ti kaipapanan ti naganna. Iti kasta, saantayo a mabuteng inton maibulosen dagiti mangdadael nga angin ti dakkel a rigat, no di ket tumangadtayto ta ammotayo nga asidegen ti pannakaisalakantayo. (Luc. 21:28) Kabayatanna, tulongantayo koma dagiti tattao iti sadinoman a mangammo ken mangayat iti kakaisuna a Dios a maikari a pagdayawan, Daydiay katan-okan ti naganna iti amin a nagan, ni Jehova.​—Ezek. 28:26.