BENNEG 1
Kinapudno Maipapan iti Pagarian—Pannakaipaay ti Naespirituan a Taraon
URAY la rimmaniag ti mata ti iyad-adalam iti Biblia idi naawatanna ti kaipapanan ti teksto a kabasbasayo. Idi kuan, kinunana, “Kayatmo a sawen, isursuro ti Biblia a mabalintayo ti agbiag nga agnanayon iti Paraiso—ditoy daga a mismo?” Immisem ti kaduam iti ministerio sa kinuna, “Ania kadi ti nabasam iti Biblia?” Uray la napangilangil ti iyad-adalam gapu iti siddaawna ket kinunana, “Ita laeng a naammuak dayta!” Kasta met laeng ti imbagana sumagmamano a lawas sakbayna, idi naammuanna iti umuna a gundaway a Jehova ti nagan ti Dios.
Adda kadi met kasta a kapadasam? Adu ti nakapadas iti kasta. Adda sumagmamano a banag a mangipalagip kadatayo a silalawag iti nagpateg a sagut a naited kadatayo—ti pannakaammo iti kinapudno! Ngem panunotem: Kasano a nakagteng kenka dayta a sagut? Mausig dayta a saludsod iti daytoy a benneg. Ti in-inut a pannakaipalgak ti naespirituan a lawag iti ili ti Dios ket nabatad a pammaneknek a pudpudno ti Pagarian ti Dios. Sangagasut a tawenen a sigsiguraduen ni Jesu-Kristo nga Ari daytoy a Pagarian a maisursuro ti kinapudno iti ili ti Dios.
ITI DAYTOY A SEKSION
KAPITULO 3
Impalgak ni Jehova ti Panggepna
Ti kadi Pagarian ket paset ti orihinal a panggep ti Dios? Kasano nga insilnag ni Jesus ti lawag maipapan iti Pagarian?
KAPITULO 4
Itan-ok ni Jehova ti Naganna
Ania ti naibanag ti Pagarian maipapan iti nagan ti Dios? Kasanom a masantipikar ti nagan ni Jehova?
KAPITULO 5
Ti Ari Insilnagna ti Lawag Maipapan iti Pagarian
Ammuem ti nalawlawag a pannakatarus maipapan iti Pagarian ti Dios, dagiti mangituray iti dayta ken dagiti iturayanna, ken ti kinapateg ti panagbalin a nasungdo.