1, 2. Ania a dakkel a trabaho ti impadto ni Jesus, ken ania a napateg a saludsod ti tumaud?

 MASANSAN a saan a matungpal ti kari dagiti agtuturay. Uray dagidiay nasayaat ti motibona mabalin a saanda a kabaelan a tungpalen dagiti karida. Makaparagsak ta naiduma ti Mesianiko nga Ari, a ni Jesu-Kristo, ta kanayon a tungpalenna dagiti saona.

² Kalpasan a naisaad kas Ari idi 1914, nakasaganan ni Jesus a mangtungpal iti impadtona agarup 1,900 a tawen sakbayna. Idi umad-adanin ti ipapatayna, impadto ni Jesus: “Daytoy naimbag a damag ti pagarian maikaskasabanto iti intero a mapagnaedan a daga.” (Mat. 24:14) Ti kaitungpalan dayta a sasao ket paset ti pagilasinan ti panagturayna iti Pagarian. Ngem ti napateg a saludsod ket: Kasano a maorganisar ti Ari ti buyot dagiti situtulok a manangaskasaba iti maudi nga al-aldaw​—ti periodo ti panawen nga adu ti managimbubukodan, awanan iti ayat, ken saan a managbuteng iti Dios? (Mat. 24:12; 2 Tim. 3:1-5) Masapul nga ammuentayo ti sungbat ta apektaranna amin a pudno a Kristiano.

3. Ania ti masigurado ni Jesus, ken apay?

³ Panunotem manen ti naimpadtuan a sasao ni Jesus. Ti kadi sao a “maikaskasabanto” ipasimudaagna a sigurado a matungpal dayta? Wen! Masigurado ni Jesus nga addanto dagiti situtulok a mangsuporta kenkuana iti maudi nga al-aldaw. Apay a kasta la unay ti panagtalekna? Nasursurona dayta iti Amana. (Juan 12:45; 14:9) Sakbay a nagbiag kas tao, napaliiw a mismo ni Jesus a ni Jehova ket agtalek a situtulok nga agsakripisio dagiti agdaydayaw kenkuana. Kitaentayo no kasano nga impakita ni Jehova dayta a panagtalek.

4. Ania a trabaho ti kiniddaw ni Jehova a suportaran dagiti Israelita, ket ania ti reaksionda?

⁴ Lagipem ti napasamak idi binilin ni Jehova ni Moises a mangibangon iti tabernakulo, wenno tolda, a mausar kas sentro ti panagdaydayaw ti nasion ti Israel. Babaen ken Moises, kiniddaw ni Jehova kadagiti Israelita a suportaranda ti trabaho. Kinuna ni Moises kadakuada a ‘tunggal maysa a situtulok ti pusona mangyeg koma iti kontribusion ken Jehova.’ Ania ti resultana? Intultuloy  dagiti Israelita ti ‘nangyeg iti boluntario a daton iti binigambigat.’ Nakaad-adu ti inyegda nga uray la ‘napawilandan a mangyeg’! (Ex. 35:5; 36:3, 6) Pinaneknekan dagiti Israelita a saan a nagkamali ni Jehova a nagtalek kadakuada.

5, 6. Sigun iti Salmo 110:1-3, ania ti namnamaen ni Jehova kasta met ni Jesus nga ipakita dagiti pudno nga agdaydayaw iti maudi nga al-aldaw?

⁵ Namnamaen kadi ni Jehova a situtulok met nga agserbi dagiti agdaydayaw kenkuana iti maudi nga al-aldaw? Wen! Nasurok a 1,000 a tawen sakbay a nayanak ni Jesus ditoy daga, impaisurat ni Jehova ken ni David ti maipapan iti tiempo a panangrugi ti turay ti Mesias. (Basaen ti Salmo 110:1-3.) Ni Jesus, ti kaisasaad nga Ari, ket busorento dagiti kabusorna. Ngem addanto buyot a mangsuporta kenkuana. Saanda a mapilit nga agserbi iti Ari. Uray dagiti ubbing ket situtulok nga agserbi, ken nakaad-aduda isu a maitutop a mayarigda iti linnaaw a nayaplag iti daga iti agsapa. a

⁶ Ammo ni Jesus nga agaplikar kenkuana ti padto iti Salmo 110. (Mat. 22:42-45) Gapuna, adu ti panggapuanna nga agtalek nga addanto dagiti nasungdo a mangsuporta ken situtulok nga agserbi kenkuana tapno maikasaba ti naimbag a damag iti intero a daga. Ania ti ipakita dagiti pasamak iti historia? Talaga kadi a nangorganisar ti ari iti buyot dagiti situtulok a manangaskasaba iti daytoy maudi nga al-aldaw?

7. Idi naisaad kas Ari, kasano nga insagana ni Jesus dagiti pasurotna iti trabaho nga agur-uray kadakuada?

⁷ Di nagbayag kalpasan a naisaad kas Ari, nangaramid ni Jesus kadagiti addang tapno maisagana dagiti pasurotna para iti dakkel a trabaho. Kas nakitatayo iti Kapitulo 2, adda inaramidna a panagsukimat ken panagdalus manipud idi 1914 agingga iti umuna a paset ti 1919. (Mal. 3:1-4) Kalpasanna, idi 1919, dinutokanna ti matalek nga adipen a mangidaulo kadagiti pasurotna.  (Mat. 24:45) Manipud idin, dayta nga adipen ket mangipapaay iti naespirituan a taraon​—babaen kadagiti palawag iti kombension ken nayimprenta a publikasion​—a maulit-ulit a nangipaganetget iti responsabilidad dagiti amin a Kristiano a makiraman a mismo iti panangasaba.

8-10. Kasano a nakatulong dagiti kombension tapno ad-adda a maisaknap ti trabaho a panangasaba? Mangtedkayo iti pagarigan. (Kitaenyo met ti kahon a “ Dagiti Nagkauna a Kombension a Nangpapartak iti Pannakaisaknap ti Trabaho a Panangasaba.”)

⁸ Dagiti palawag iti kombension. Nagtataripnong dagiti Estudiante ti Biblia iti Cedar Point, Ohio, U.S.A., manipud idi Septiembre 1-8, 1919, para iti umuna a dakkel a kombension kalpasan ti Sangalubongan a Gubat I. Magagaranda nga agpaisuro. Iti maikadua nga aldaw, nagpalawag ni Kabsat Rutherford ket imbagana kadagiti delegado: “Ti mision dagiti Kristiano ditoy daga . . . ket mangiwaragawag iti mensahe maipapan iti pagarian ti Apo.”

⁹ Ti tampok dayta a kombension ket naipaay iti maikatlo nga aldaw idi impalawag ni Kabsat Rutherford ti tema a, “Palawag Kadagiti Kadua a Trabahador,” a naipablaak iti The Watch Tower iti artikulo a “Panangibunannag iti Pagarian.” Kinunana: “No agmennamenna ti maysa a Kristiano, maisaludsodna iti bagina, Apay nga addaak ditoy daga? Ti rumbeng a sungbat ket, Inaramidnak ti Apo kas embahadorna tapno awitek ti mensahe ti pannakikappia manipud iti Dios, ket pribilehio ken obligasionko nga ipakaammo dayta a mensahe.”

¹⁰ Iti dayta a nakallalagip a palawag, impakaammo ni Kabsat Rutherford a ti baro a magasin a The Golden Age (Agriingkayo! itan), ket maipablaak tapno mausar a tumulong kadagiti tattao a mangbigbig iti Pagarian kas ti kakaisuna a namnama ti sangatauan. Kalpasanna, insaludsodna iti tallaong no mano ti mayat a makiraman nga agiwaras iti dayta a magasin. Kinuna ti maysa a report iti kombension: “Makaparagsak ta naggigiddan a timmakder amin nga 6,000 a timmabuno.” b Nalawag nga adda dagiti situtulok a mangsuporta iti Ari, a magagaran a mangiwaragawag iti Pagarianna!

11, 12. Sigun iti The Watch Tower idi 1920, kaano a maaramid ti trabaho nga impadto ni Jesus?

¹¹ Dagiti nayimprenta a publikasion. Babaen ti The Watch Tower, limmawag a limmawag ti kinapateg ti trabaho nga impadto ni Jesus​—ti panangikasaba iti naimbag a damag maipapan iti Pagarian. Usigentayo ti sumagmamano a pagarigan manipud iti umuna a paset ti 1920’s.

¹² Ania a mensahe ti maiwaragawag kas kaitungpalan ti Mateo 24:14? Kaano a maaramid dayta a trabaho? Iti Hulio 1, 1920, a ruar ti The Watch Tower, iti artikulo a napauluan iti “Gospel of the Kingdom” (Ebanghelio ti Pagarian), kastoy ti pannakailawlawag ti mensahe: “Ti naimbag a damag ket maipapan iti panagpatingga ti daan nga urnos ti bambanag ken ti pannakaipasdek ti Mesianiko a pagarian.” Silalawag nga impakita ti artikulo no kaano a maikasaba daytoy a mensahe. Kunana: “Masapul a maiwaragawag daytoy a mensahe iti nagbaetan ti dakkel  a sangalubongan a gubat [Sangalubongan a Gubat I] ken ti ‘dakkel a rigat.’” Gapuna, kinuna ti artikulo: “Itan ti tiempo . . . nga iwaragawagtayo ti naimbag a damag iti intero a Kakristianuan.”

13. Kasano a pinaregta ti The Watch Tower idi 1921 dagiti napulotan a Kristiano a situtulok nga agserbi?

¹³ Inkapilitan kadi nga aramiden ti ili ti Dios ti trabaho nga impadto ni Jesus? Saan. Ti artikulo a “Be of Good Courage” (Bumilegkayo), iti Marso 15, 1921, a ruar ti The Watch Tower, pinaregtana dagiti napulotan a Kristiano a situtulok nga agserbi. Naiparegta iti tunggal maysa a mangisaludsod iti bagina: “Saan kadi a dakkel a pribilehio, ken obligasionko, ti makiraman iti daytoy a trabaho?” Intuloy ti artikulo: “No ibilangyo a [pribilehio ti makiraman iti daytoy a trabaho] manamnamayo a mariknayo ti narikna ni Jeremias, a ti sao ti Apo ket nagbalin a kas ‘sumsumged nga apuy a napupok kadagiti tulangna,’ isu a dina magawidan ti agsao.” (Jer. 20:9) Dayta a naayat a pammaregta iparangarangna ti panagtalek ni Jehova ken Jesus kadagiti nasungdo a mangsupsuporta iti Pagarian.

14, 15. Idi 1922, ania a pamay-an ti panangasaba ti indagadag ti The Watch Tower kadagiti napulotan a Kristiano?

¹⁴ Kasano a maidanon dagiti pudno a Kristiano ti mensahe maipapan iti Pagarian kadagiti tattao? Ti ababa ngem napuersa nga artikulo a napauluan iti “Service Essential” (Napateg ti Panagserbi), iti Agosto 15, 1922, a ruar ti The Watch Tower, indagadagna kadagiti napulotan a Kristiano a makiramanda a “siaaktibo iti panangiwaras iti nakaimprenta a mensahe ken makisaritada kadagiti tattao iti binalaybalay, ken ikasabada nga asidegen ti pagarian ti langit.”

¹⁵ Nalawag a manipud idi 1919, inusar ni Kristo ti matalek ken masirib nga adipen a kanayon a mangipaganetget a pribilehio ken obligasion dagiti Kristiano ditoy daga ti mangiwaragawag iti mensahe maipapan iti Pagarian. Ngem kasano a nagtignay dagiti Estudiante ti Biblia idi un-unana iti pammaregta a makiraman iti trabaho a panangiwaragawag iti Pagarian?

16. Ania ti reaksion ti dadduma kadagiti nabutosan a panglakayen iti ideya a makiraman ti amin iti ministerio?

¹⁶ Idi 1920’s ken 1930’s, adda dagiti saan nga umanamong iti ideya nga amin a napulotan a Kristiano ket rumbeng a makiraman iti ministerio. Inlawlawag ti Nobiembre 1, 1927, a ruar ti Watch Tower no ania ti napasamak: “Ti dadduma a miembro ti kongregasion nga addaan iti saad kas panglakayen . . . dida kayat a paregtaen dagiti kakabsatda a mangasaba, ken uray isuda a mismo dida kayat ti makiraman iti dayta. . . . Linaisda ti singasing nga idanon kadagiti tattao iti binalaybalay ti mensahe ti Dios maipapan iti Ari ken iti pagarianna.” Direkta a kinuna ti artikulo: “Dimtengen ti panawen tapno markaan dagiti matalek dagiti kasta a tattao ken liklikanda ida, ken ibagada kadakuada a saandan a maikkan iti saad kas panglakayen.” c

17, 18. Ania ti reaksion ti kaaduan iti kongregasion iti instruksion manipud iti hedkuarter? Ania ti inaramid ti minilion a tattao iti napalabas a 100 a tawen?

¹⁷ Makaparagsak ta magagaran ti kaaduan iti kongregasion nga agtulnog iti instruksion manipud iti hedkuarter. Imbilangda  a pribilehio ti mangiranud iti mensahe maipapan iti Pagarian. Kuna ti Marso 15, 1926 a ruar ti The Watch Tower: “Agbolboluntario dagiti matalek . . . a mangidanon iti daytoy a mensahe kadagiti tattao.” Intungpal dagita a matalek a tattao ti padto iti Salmo 110:3 ken pinaneknekanda a sidadaanda a mangsuporta iti Mesianiko nga Ari.

¹⁸ Iti napalabas a 100 a tawen, minilion ti situtulok a nagserbi tapno maikasaba ti Pagarian. Iti sumaruno a sumagmamano a kapitulo, adalentayto no kasanoda a nangasaba​—dagiti pamay-an ken alikamen nga inusarda​—ken no ania dagiti resultana. Ngem ammuentayo nga umuna no apay a minilion ti boluntario a makiramraman iti trabaho a panangikasaba iti Pagarian uray no agbibiagda iti lubong nga adu ti managimbubukodan. Bayat ti panangusigtayo, nasayaat nga isaludsodtayo iti bagbagitayo, ‘Apay nga iranranudko ti naimbag a damag kadagiti tattao?’

19. Apay nga ipangagtayo ti balakad ni Jesus nga “itultuloyyo . . . a sapulen nga umuna ti pagarian”?

¹⁹ Imbalakad ni Jesus kadagiti pasurotna: “Itultuloyyo . . . a sapulen nga umuna ti pagarian.” (Mat. 6:33) Apay nga ipangagtayo dayta a balakad? Umuna iti amin, gapu ta bigbigentayo ti kinapateg ti Pagarian, a dayta ti usaren ti Dios a mangitungpal iti panggepna. Kas naammuantayo iti napalabas a kapitulo, in-inut nga impalgak ti nasantuan nga espiritu dagiti makapainteres a kinapudno maipapan iti Pagarian. No ipapusotayo dagita a napateg a kinapudno, matignaytayo a mangyun-una iti Pagarian.

20. Kasano nga ipakita ti ilustrasion ni Jesus maipapan iti nalmeng a gameng no kasano nga agtignay dagiti pasurotna iti balakad nga iyun-una ti Pagarian?

²⁰ Ammo ni Jesus no kasano nga agtignay dagiti pasurotna iti balakad nga agtultuloy a sapulen nga umuna ti Pagarian. Usigentayo ti ilustrasionna maipapan iti nalmeng a gameng. (Basaen ti Mateo 13:44.) Bayat nga ar-aramiden ti matangtangdanan a mannalon ti inaldaw a trabahona, nakakita iti nalmeng a gameng ket dagus a nabigbigna ti kinapateg dayta. Ania ti inaramidna? “Gapu iti rag-o nga adda kenkuana mapan ket ilakona ti aniaman a bambanag nga adda kenkuana ket gatangenna dayta a talon.” Ania ti masursurotayo? No mabirokantayo ti kinapudno maipapan iti Pagarian ket mabigbigtayo ti pategna, siraragsaktayo a mangaramid iti aniaman a sakripisio a kasapulan tapno mayun-unatayo dagiti interes ti Pagarian. d

21, 22. Kasano nga ipakita dagiti nasungdo a mangsupsuporta iti Pagarian nga iyun-unada ti Pagarian? Mangted iti pagarigan.

²¹ Dagiti nasungdo a mangsupsuporta iti Pagarian ipakpakitada nga iyun-unada ti Pagarian babaen ti aramid, saan laeng nga iti sao. Us-usarenda ti biag, abilidad, ken sanikuada iti trabaho a panangikasaba iti Pagarian. Adu ti nangaramid kadagiti dakkel a sakripisio tapno makapagserbida iti amin a tiempo. Amin dagitoy a boluntario a manangaskasaba napaneknekanda a mismo a bembendisionan ni Jehova dagiti mangyun-una iti Pagarian. Usigentayo ti maysa a pagarigan idi un-unana.

 ²² Nangrugi a nagserbi da Avery ken Lovenia Bristow kas colporteur (payunir) iti makin-abagatan a paset ti Estados Unidos iti maudi a paset ti 1920’s. Kalpasan ti sumagmamano a tawen, kinuna ni Lovenia: “Nakaad-adu ti naragsak a kapadasanmi ken ni Avery manipud idi nagpayunirkami. Adu a daras a saanmi nga ammo no pangalaanmi iti kuarta a para iti gasolina wenno groseriami. Ngem kanayon nga impaay ni Jehova dagiti kasapulanmi. Basta intultuloymi ti nagpayunir. Saankami a nagkurang iti aniaman.” Malagip ni Lovenia ti maysa a pasamak bayat nga agserserbida iti Pensacola, Florida. Bassit idin ti kuarta ken groseriada. Idi nagawidda iti trailer-da, adda nasangpetanda a dua a dadakkel a supot ti groseria a napakuyogan iti surat a kunana, “Manipud iti Pensacola Company.” e No lagipenna ti pinullo a tawen a panagpayunirna, kinuna ni Lovenia: “Pulos a saannakami a binaybay-an ni Jehova. Saankami a napaay iti panagtalekmi kenkuana.”

23. Ania ti riknam iti kinapudno maipapan iti Pagarian a naammuam? Ania ti determinasionmo?

²³ Saan nga agpapada ti maaramidantayo iti panangasaba ta agduduma ti kasasaadtayo. Nupay kasta, ibilangtayo a pribilehio ti panangaramid iti amin a kabaelantayo a mangiwaragawag iti naimbag a damag. (Col. 3:23) Gapu ta napateg kadatayo ti naammuantayo a kinapudno maipapan iti Pagarian, situtulok ken magagarantayo pay ketdi a mangaramid iti aniaman a sakripisio tapno makapagserbitayo iti amin a kabaelantayo. Kasta kadi ti determinasionmo?

24. Ania ti maysa kadagiti kapatgan a naibanag ti Pagarian iti maudi nga al-aldaw?

²⁴ Iti napalabas a 100 a tawen, talaga nga itungtungpalen ti Ari ti impadtona iti Mateo 24:14. Ken saanna a pilpiliten ti siasinoman a makiraman iti dayta. Kalpasan a simmina dagiti pasurotna iti daytoy managimbubukodan a lubong, situtulokda a mangasaba. Ti panangikasabada iti naimbag a damag iti intero a daga ket paset ti pagilasinan ti panagturay ni Jesus iti Pagarian​—ken maysa dayta kadagiti kapatgan a naibanag ti Pagarian iti maudi nga al-aldaw.