1-3. Ania dagiti isalsaludsod dagiti tattao maipapan iti ipapatay, ken ania ti sungbat ti dadduma a relihion?

IKARKARI ti Biblia nga “awanton ni patay.” (Apocalipsis 21:4) Iti Kapitulo 5, naammuantayo a posible a maaddaantayo iti biag nga agnanayon gapu iti subbot. Ngem matay latta dagiti tattao. (Eclesiastes 9:5) Isu a ti napateg a saludsod ket, Ania ti mapasamak kadatayo no mataytayo?

² Napateg ti sungbat dayta a saludsod aglalo no adda natay nga ipatpategtayo iti biag. Mabalin a mapanunottayo: ‘Napananna? Bambantayannatayo kadi? Matulongannatayo kadi? Makitatayto kadi manen?’

³ Nagduduma ti sungbat dagiti relihion kadagita a saludsod. Adda dagiti mangisursuro a no nasingpetka, mapanka idiay langit ket no dakeska, mapuoranka idiay impierno. Ibaga met ti dadduma a no matayka, agbalinka nga espiritu ken makikaduaka kadagiti kapamiliam a natayen. Ken ibaga ti dadduma a kalpasan a matay ken maukomka, mayanakka manen, wenno agbiagka nga addaan iti sabali a bagi, nalabit kas tao wenno animal.

4. Ania a kapanunotan maipapan iti ipapatay ti agpapada nga isursuro dagiti relihion?

⁴ Agparang ngarud a nagduduma ti isursuro dagiti relihion. Ngem adda maysa a kapanunotan nga agpapada nga isursuro ti dandani amin a relihion. Ibagbagada a no matay ti tao, adda sumina iti bagina nga agtultuloy nga agbiag. Agpayso kadi dayta?

5, 6. Ania ti mapasamak kadatayo no mataytayo?

⁵ Ammo ni Jehova no ania ti mapasamak kadatayo no mataytayo. Imbagana a no matay ti maysa a tao, agpatinggan ti biagna. Patay ti kasungani ti biag. Isu a no matay ti maysa, awan ti sumina kenkuana a kararua nga agtultuloy nga agbiag a makarikna ken makapanunot. * No mataytayo, saantayon a makakita, makangngeg, ken makapanunot.

⁶ Insurat ni Ari Solomon nga “awan a pulos ti ammo dagiti natay.” Saan a makarikna iti ayat ken gura dagiti natay, ken “awan ti aramid wenno plano wenno pannakaammo wenno sirib iti Tanem.” (Basaen ti Eclesiastes 9:5, 6, 10.) Ken ibaga ti Biblia iti Salmo 146:4 a no matay ti maysa a tao, matayen “ti panunotna.”

7. Ania ti imbaga ni Jesus maipapan iti ipapatay?

⁷ Idi natay ti nadekket a gayyem ni Jesus a ni Lazaro, imbagana kadagiti adalanna: “Matmaturog ni Lazaro a gayyemtayo.” Ngem saan nga ibagbaga ni Jesus nga agin-inana laeng ni Lazaro. Inlawlawag ni Jesus: “Natayen ni Lazaro.” (Juan 11:11-14) Impada ni Jesus ti ipapatay iti pannaturog. Saanna nga imbaga a napan ni Lazaro idiay langit wenno kaduana dagiti kapamiliana a natayen. Saanna met nga imbaga a natutuok ni Lazaro idiay impierno wenno nayanak manen kas sabali a tao wenno animal. Kasla laeng naimas ti turog ni Lazaro. Adda pay dagiti teksto ti Biblia a nangipada iti ipapatay iti naimas a turog. Kuna ti Biblia nga idi napapatay ni Esteban, isu  ket “naturogen ken patay.” (Aramid 7:60) Insurat met ni Pablo nga adda dagiti Kristiano a “naturogen ken patay.”​—1 Corinto 15:6.

8. Kasanotayo nga ammo a saan a pinarsua ti Dios dagiti tattao a matayto met laeng?

⁸ Pinarsua kadi ti Dios da Adan ken Eva a matayto met laeng? Saan! Pinarsua ida ni Jehova nga agbiag nga agnanayon a naragsak ken addaan iti perpekto a salun-at. Idi inaramid ni Jehova dagiti tattao, inikkanna ida iti tarigagay nga agbiag nga agnanayon. (Eclesiastes 3:11) Saan a kayat dagiti nagannak a makita a lumakay ken matay dagiti annakda, ket kasta met ti rikna ni Jehova kadatayo.  Ngem no pinarsuanatayo ti Dios nga agbiag nga agnanayon, apay ngarud a mataytayo?

9. Apay a nainkalintegan ti bilin nga inted ni Jehova kada Adan ken Eva?

⁹ Idiay hardin ti Eden, imbaga ni Jehova ken ni Adan: “Mabalinmo ti mangan iti bunga ti tunggal kayo iti hardin agingga a mapnekka. Ngem rumbeng a dimo kanen ti bunga ti kayo a pakaammuan iti naimbag ken dakes, ta sigurado a matayka iti aldaw a pannanganmo iti dayta.” (Genesis 2:9, 16, 17) Saan a narigat a tungpalen dayta a nalawag a bilin, ken adda kalintegan ni Jehova a mangibaga kada Adan ken Eva no ania ti naimbag ken dakes. No nagtulnogda ken Jehova, naipakitada koma a resrespetuenda ti autoridadna. Naipakitada met koma nga agyamyamanda iti amin nga intedna kadakuada.

10, 11. (a) Ania ti inaramid ni Satanas tapno maallilawna da Adan ken Eva? (b) Apay a saan a mapakawan ti inaramid da Adan ken Eva?

¹⁰ Makapaladingit ta pinili da Adan ken Eva ti agsukir ken Jehova. Imbaga ni Satanas ken ni Eva: “Agpayso kadi nga imbaga ti Dios a saanyo a kankanen ti bunga ti tunggal kayo iti hardin?” Insungbat ni Eva: “Mabalinmi a kanen ti bunga dagiti kayo iti hardin, malaksid iti bunga ti kayo nga adda iti tengnga ti hardin, ta kinuna ti Dios: ‘Dikay mangan iti bungana ken diyo sagiden; ta mataykayo no aramidenyo dayta.’”​—Genesis 3:1-3.

¹¹ Kalpasanna, imbaga ni Satanas: “Sigurado a saankayto a matay. Ta ammo ti Dios nga iti aldaw a pannanganyo iti dayta, maluktan dagiti matayo ket agbalinkayto a kas iti Dios a makaammo iti naimbag ken dakes.” (Genesis 3:4-6) Kayat ni Satanas a panunoten ni Eva a mabalinna ti agdesision a bukbukodna no ania ti naimbag ken dakes. Kasta met, nagulbod ni Satanas no ania ti mapasamak  ken Eva no agsukir. Imbagana a saan a matay ni Eva, isu a nangan ni Eva iti bunga ken inikkanna met ni lakayna. Ammo da Adan ken Eva nga imbilin ni Jehova a saanda a kanen ti bunga. Idi nanganda, pinilida a sukiren ti nalawag ken nainkalintegan a bilin. Impakitada met a saanda a resrespetuen ti naayat a nailangitan nga Amada. Saan a mapakawan dayta nga inaramidda!

12. Apay a makapadismaya ti panagsukir da Adan ken Eva ken ni Jehova?

¹² Makapadismaya ta saan a rinespeto ti immuna a nagannaktayo ti Namarsua kadakuada! Ania ti mariknam no ti anakmo a nagrigrigatam a pinadakkel ket nagrebelde ken nagsukir iti bilinmo? Saan kadi a masaktanka iti kasta unay?

13. Ania ti kayat a sawen ni Jehova idi imbagana nga “agsublikanto iti tapok”?

¹³ Idi nagsukir da Adan ken Eva, napukawda ti gundawayda nga agbiag nga agnanayon. Imbaga ni Jehova ken ni Adan: “Ta tapokka ket agsublikanto iti tapok.” (Basaen ti Genesis 3:19.) Kaipapanan dayta nga agsubli ni Adan iti tapok, a kas man la saan a naparsua. (Genesis 2:7) Kalpasan a nagbasol ni Adan, natay ken awanen.

14. Apay a mataytayo?

¹⁴ No nagtulnog da Adan ken Eva iti Dios, sibibiagda pay koma ita. Ngem idi nagsukirda kenkuana, nagbasolda, ket natayda idi agangay. Ti basol ket kasla nakaro a sakit a natawidtayo  iti immuna a nagannaktayo. Nayanaktayo amin a managbasol isu a mataytayo. (Roma 5:12) Ngem saan a dayta ti panggep ti Dios para kadagiti tattao. Saanna a kayat a matay dagiti tattao isu nga inawagan ti Biblia ti ipapatay kas “kabusor.”​—1 Corinto 15:26.

15. Kasano a wayawayaannatayo ti kinapudno maipapan iti ipapatay?

¹⁵ No ammotayo ti kinapudno maipapan iti ipapatay, saantayo a maallilaw iti adu nga ulbod a kapanunotan. Isursuro ti Biblia a saan a masaktan wenno maladingitan dagiti natay. Saantay ida a makasarita, ken saandatayo met a makasarita. Saantay a matulongan dagiti natay, ken saandatayo met a matulongan. Saandatay a madangran isu a saantay a rumbeng a pagbutngan ida. Ngem adu a relihion ti mangibagbaga a sibibiag dagiti natay ket matulongantayo ida no bayadantayo dagiti papadi wenno ti dadduma pay a lider ti relihion tapno ikararagan wenno imisaanda ida. Ngem no ammotayo ti kinapudno, saantayo a maallilaw kadagiti kasta a kinaulbod.

16. Ania a kinaulbod maipapan kadagiti natay ti isursuro ti adu a relihion?

¹⁶ Us-usaren ni Satanas ti ulbod a relihion a mangallilaw kadatayo tapno panunotentayo a sibibiag latta dagiti natay. Kas pagarigan, isursuro ti dadduma a relihion a no mataytayo, adda sumina iti bagitayo nga agtultuloy nga agbiag. Kasta kadi ti isursuro ti relihionmo, wenno isursurona ti ibagbaga ti Biblia maipapan kadagiti natay? Agus-usar ni Satanas kadagiti kinaulbod tapno iyadayonatayo ken Jehova.

17. Apay a maysa nga insulto ken Jehova ti sursuro a mapuoran dagiti tattao iti impierno?

¹⁷ Makapakigtot ti isursuro ti adu a relihion. Kas pagarigan, isursuro ti dadduma nga agnanayon a mapuoran  idiay impierno dagiti managdakdakes. Dayta a kinaulbod ket maysa nga insulto ken Jehova. Saanna a pulos ipalubos nga agrigat dagiti tattao iti kasta a pamay-an! (Basaen ti 1 Juan 4:8.) Ania ti makunam iti maysa a tao a mangdusa iti anakna babaen ti panangpuorna kadagiti ima ti anakna? Baka mapanunotmo a nakarangranggas dayta a tao ket sigurado a dimo kayat a maam-ammo. Kasta ti kayat ni Satanas a panunotentayo maipapan ken Jehova!

18. Apay a ditay rumbeng a pagbutngan dagiti natay?

¹⁸ Adda dagiti relihion a mangibagbaga a no matay dagiti tattao, agbalinda nga espiritu. Isursuroda a masapul a respetuen ken pagbutngantayo pay ketdi dagita nga espiritu ta posible nga agbalinda a mannakabalin a gayyem wenno nakabutbuteng a kabusor. Adu ti mamati iti dayta a kinaulbod. Kabutengda dagiti natay isu a dagita ti daydayawenda imbes a ni Jehova. Laglagipem nga awan rikna ken ammo dagiti natay isu a saantay a rumbeng a pagbutngan ida. Ni Jehova ti Namarsua kadatayo. Isu ti pudno a Dios, ken isu laeng ti masapul a dayawentayo.​—Apocalipsis 4:11.

19. Kasano a pagimbagantayo no ammotayo ti kinapudno maipapan iti ipapatay?

¹⁹ No ammotayo ti kinapudno maipapan iti ipapatay, mawayawayaantayo kadagiti ulbod a sursuro ti adu a relihion. Makatulong met dayta tapno maawatantayo dagiti nagsasayaat a kari ni Jehova maipapan iti biagtayo ken iti masanguanantayo.

20. Ania ti maadaltayo iti sumaruno a kapitulo?

²⁰ Insaludsod idi ti adipen ti Dios a ni Job: “No matay ti tao, agbiagto kadi manen?” (Job 14:14) Talaga kadi a posible nga agbiag manen ti tao a natayen? Makaparagsak unay ti sungbat ti Dios a mabasa iti Biblia. Maammuantayo dayta iti sumaruno a kapitulo.