1. Ania ti mabalin a mapanunotmo kalpasan ti panangadalmo a naimbag iti daytoy a libro?

ADUN ti naammuam a kinapudno iti Biblia bayat ti panangadalmo iti daytoy a libro, kas iti biag nga agnanayon nga inkari ti Dios, ti kasasaad dagiti natay, ken ti namnama a panagungar. (Eclesiastes 9:5; Lucas 23:43; Juan 5:28, 29; Apocalipsis 21:3, 4) Mabalin nga agat-atenderkan iti gimong dagiti Saksi ni Jehova ken mamatika a sursurotenda ti pudno a panagdaydayaw. (Juan 13:35) Mabalin a naaddaankan iti nadekket a  pannakigayyem ken Jehova ken nagdesisionkan a kayatmo ti agserbi kenkuana. Isu a mabalin a mapanunotmo, ‘Ania ti aramidek itan tapno makapagserbiak iti Dios?’

2. Apay a kayat ti lalaki nga Etiope ti agpabautisar?

² Kasta ti napanunot ti lalaki nga Etiope idi panawen ni Jesus. Sumagmamano a tiempo kalpasan a napagungar ni Jesus, kinasabaan ti adalanna a ni Felipe daytoy a lalaki. Pinaneknekan kenkuana ni Felipe a ni Jesus ti Mesias. Natignay unay ti Etiope a lalaki iti naadalna isu a dagus nga imbagana: “Adda danum! Ania ti makalapped kaniak a mabautisaran?”​—Aramid 8:26-36.

3. (a) Ania ti imbilin ni Jesus kadagiti pasurotna? (b) Kasano ti rumbeng a pannakabautisar ti maysa a tao?

³ Nalawag nga isursuro ti Biblia a no kayatmo ti agserbi ken Jehova, masapul a mabautisaranka. Imbaga ni Jesus kadagiti pasurotna, ‘Pagbalinenyo nga adalak dagiti tattao iti amin a nasion ken bautisaranyo ida.’ (Mateo 28:19) Nangipakita ni Jesus iti nasayaat nga ehemplo idi nabautisaran. Interamente a naitaneb iti danum, saan la a nawarwarsian ti ulona iti danum. (Mateo 3:16) No mabautisaran ti maysa a Kristiano ita, masapul met nga interamente a maitaneb, wenno mairarem, iti danum.

4. Ania ti ipakpakitam iti sabsabali no mabautisaranka?

⁴ No mabautisaranka, ipakpakitam iti sabsabali a talaga a kayatmo ti agbalin a gayyem ti Dios ken agserbi kenkuana. (Salmo 40:7, 8) Isu a mabalin a mapanunotmo, ‘Ania ti masapul nga aramidek tapno mabautisaranak?’

5. (a) Ania ti masapul nga aramidem sakbay a mabautisaranka? (b) Apay a napateg dagiti gimong?

⁵ Sakbay a mabautisaranka, masapul nga am-ammuem ni Jehova ken ni Jesus. Rinugiamon nga aramiden dayta idi nagadalka iti Biblia. (Basaen ti Juan 17:3.)  Ngem saan nga umanay dayta. Ibaga ti Biblia a masapul a ‘mapnoka iti umiso a pannakaammo’ iti pagayatan ni Jehova. (Colosas 1:9) Makatulong dagiti gimong dagiti Saksi ni Jehova tapno maaddaanka iti nadekdekket a relasion ken Jehova. Dayta ti maysa a napateg a rason a regular nga atenderam dagita a gimong.​—Hebreo 10:24, 25.

6. Kasano kaadu ti masapul a maammuam iti Biblia sakbay a mabautisaranka?

⁶ Siempre, saan nga ekspektaren ni Jehova nga ammom ti linaon ti intero a Biblia sakbay a mabautisaranka. Saanna a namnamaen a maammuan ti lalaki nga Etiope ti amin a banag sakbay a mabautisaran. (Aramid 8:30, 31) Ken itultuloytayo ti agsursuro maipapan iti Dios iti agnanayon. (Eclesiastes 3:11) Ngem tapno mabautisaranka, masapul a maammuam ken awatem uray dagiti kangrunaan laeng a pannursuro ti Biblia.​—Hebreo 5:12.

7. Ania ti naitulong kenka ti panagadalmo iti Biblia?

⁷ Kuna ti Biblia: “Imposible a naan-anay a maparagsak ti Dios no awan ti pammati.” (Hebreo 11:6) Isu a masapul nga adda pammatim tapno mabautisaranka. Ibaga ti Biblia nga idi nangngeg dagiti tattao iti nagkauna a siudad ti Corinto dagiti isursuro dagiti pasurot ni Jesus, ‘namati ken nabautisaranda.’ (Aramid 18:8) Kasta met, tinulongannaka ti panagadalmo iti Biblia tapno maaddaanka iti pammati kadagiti kari ti Dios ken iti bileg ti daton ni Jesus, a makaisalakan kadatayo manipud iti basol ken ipapatay.​—Josue 23:14; Aramid 4:12; 2 Timoteo 3:16, 17.

8. Ania ti mangtignay kenka a mangipakaammo kadagiti maad-adalmo?

⁸ Bayat nga umad-adu ti maad-adalmo iti Biblia ken  makitkitam no ania ti maitultulong dagita iti biagmo, ad-adda met a tumibker ti pammatim. Kayatmonton nga ibaga iti sabsabali dagiti maad-adalmo. (Jeremias 20:9; 2 Corinto 4:13) Ngem siasino ti pangibagaam?

9, 10. (a) Siasino ti mabalin a pangibagaam kadagiti nasursurom? (b) Ania ti masapul nga aramidem no kayatmo ti mangasaba a kadua ti kongregasion?

⁹ Mabalin a kayatmo nga ibaga kadagiti kapamilia, gagayyem, kaarruba, ken katrabahuam dagiti maad-adalmo. Nasayaat dayta, ngem kanayon koma nga aramidem dayta iti naasi ken naayat a pamay-an. Inton agangay, mabalinmonton ti makikadua iti kongregasion a mangasaba. No mariknam a nakasaganakan, mabalinmo nga ibaga iti Saksi a mangyad-adal kenka iti Biblia a kayatmon ti makikadua iti kongregasion a mangasaba. No makitana a nakasaganakan ken agbibiagkan maitunos kadagiti pagalagadan ti Biblia, kaduaennaka a makisarita iti dua a panglakayen iti kongregasion.

¹⁰ Ania ti mapasamak iti dayta a panagsasarita? Makisarita kenka dagiti panglakayen tapno makitada no maawatam ken mamatika kadagiti kangrunaan a pannursuro ti Biblia, no sursurotem met laeng dagiti ibagbaga ti Biblia, ken no talaga a kayatmo ti agbalin a Saksi ni Jehova. Laglagipem nga ay-aywanan dagiti panglakayen ti amin a miembro ti kongregasion, a pakairamanam, isu a dika mabuteng a makisarita kadakuada. (Aramid 20:28; 1 Pedro 5:2, 3) Kalpasan daytoy a panagsasarita, ipakaammo kenka dagiti panglakayen no mabalinmon ti mangasaba a kadua ti kongregasion.

11. Apay a nagpateg a mangaramidka kadagiti panagbalbaliw sakbay a mabalinmo ti mangasaba a kadua ti kongregasion?

¹¹ Mabalin nga ilawlawag kenka dagiti panglakayen nga adda pay dagiti masapul a balbaliwam sakbay a mabalinka  a makikadua iti kongregasion a mangasaba. Apay a nagpateg nga aramidem dagita a panagbalbaliw? No ngamin isarsaritatayo iti sabsabali ti maipapan iti Dios, ireprepresentartayo ni Jehova isu a masapul nga agbiagtayo iti pamay-an a pakaidayawanna.​—1 Corinto 6:9, 10; Galacia 5:19-21.

12. Apay a masapul nga agbabawi ti amin a tao?

¹² Adda pay masapul nga aramidem sakbay a mabautisaranka. Imbaga ni apostol Pedro: “Gapuna, agbabawi ken agbalbaliwkayo tapno mapunas dagiti basolyo.” (Aramid 3:19) Ania ti kaipapanan ti panagbabawi? Kayatna a sawen a pagladingitantayo unay ti aniaman a nagkamaliantayo. Kas pagarigan, no immoral idi ti panagbiagmo, masapul nga agbabawika. Ken uray no inkagumaam nga aramiden ti umiso, masapul latta nga agbabawika, gapu ta managbasoltayo amin ket masapul a dumawattayo iti pammakawan ti Dios.​—Roma 3:23; 5:12.

13. Ania ti kayat a sawen ti ‘agbalbaliw’?

¹³ Umanay kadin a basta malidayantayo laeng iti di umiso a naaramidantayo? Saan. Kuna ni Pedro a masapul met nga ‘agbalbaliwtayo.’ Kayatna a sawen, masapul nga adaywantayo ti aniaman a di umiso nga aramid ket aramidentayo ti umiso. Kas panangyilustrar, panunotem a damom ti mapan iti maysa a lugar. Bayat ti panagbiahem, naammuam a kamali ti direksion a turturongem. Ania ti aramidem? Sigurado la ketdi nga agin-inayad, agsardeng, agsikko, sa mapanka iti umiso a direksion. Kasta met, bayat nga agad-adalka iti Biblia, mabalin a madiskobrem nga adda dagiti aramid wenno banag iti biagmo a masapul a balbaliwam. Sidadaanka koma nga agsikko, wenno ‘agbalbaliw,’ ket aramidem ti umiso.

14. Kasanom nga idedikar ti biagmo iti Dios?

¹⁴ Ti maysa pay a nagpateg nga aramidem sakbay nga agpabautisarka ket idedikarmo ti biagmo ken Jehova. No idedikarmo ti biagmo ken Jehova, ikarkarim kenkuana babaen ti kararag nga isu laeng ti daydayawem ken pagbalinem a kapatgan iti biagmo ti pagayatanna.​—Deuteronomio 6:15.

15, 16. Ania ti mangtignay iti maysa a mangidedikar iti biagna ken Jehova?

¹⁵ Ti panangikarim a ni Jehova laeng ti pagserbiam ket kas iti panangikarim iti ay-ayatem nga isu laeng ti pakikaduaam iti intero a panagbiagmo. Panunotem ti baro ken balasang nga agin-innarem. Bayat nga ad-adda a maam-ammo ti baro ti balasang, masursurona nga ayaten ken kayatna nga ikasar. Uray no serioso dayta a desision, sidadaan ti baro a mangawat iti responsabilidad ta ay-ayatenna ti balasang.

¹⁶ Bayat nga ad-adalem ti maipapan ken Jehova, masursurom nga ayaten ken kayatmo nga aramiden ti amin a kabaelam nga agserbi kenkuana. Daytoy ti mangtignay kenka a mangikari babaen ti kararag nga isu ti pagserbiam. Kuna ti Biblia a no kayat ti maysa a suroten ni Jesus, masapul a ‘tallikudanna ti bagina.’ (Marcos 8:34) Ania ti kayat a sawen dayta? Kayatna a sawen a ti panagtulnog ken Jehova ti masapul a kangrunaan iti biagmo. Napatpateg ti kayat ni Jehova ngem kadagiti kayatmo ken planom nga aramiden.​—Basaen ti 1 Pedro 4:2.

17. Apay a saan nga idedikar ti dadduma ti biagda ken Jehova?

¹⁷ Dadduma ti saan a mangidedikar iti biagda ken Jehova ta baka saanda a matungpal ti karida nga agserbi  kenkuana. Saanda a kayat a mapaay ni Jehova, wenno mabalin a panunotenda a no saanda a dedikado kenkuana, awan ti sungsungbatanda kenkuana uray ania ti ar-aramidenda.

18. Ania ti makatulong kenka tapno mapukaw ti panagbutengmo a baka mapaaymo ni Jehova?

¹⁸ Makatulong ti ayatmo ken Jehova tapno mapukaw ti panagbutengmo a baka mapaaymo. Gapu ta ay-ayatem, aramidem ti amin tapno matungpalmo ti karim kenkuana. (Eclesiastes 5:4; Colosas 1:10) Dimo mapanunot a nakarigrigat nga aramiden ti pagayatanna. Insurat ni apostol Juan: “Daytoy ti kaipapanan ti panagayat iti Dios, a tungpalentayo dagiti bilinna; ket kaskasdi a saan a makapadagsen dagiti bilinna.”​—1 Juan 5:3.

19. Apay a dika agbuteng a mangidedikar iti biagmo ken Jehova?

¹⁹ Saan a kasapulan nga agbalinka a perpekto tapno idedikarmo ti biagmo ken Jehova. Dina ekspektaren nga aramidentayo dagiti ditay kabaelan nga aramiden. (Salmo 103:14) Tulongannaka a mangaramid iti umiso. (Isaias 41:10) Agtalekka ken Jehova iti intero a pusom, ket “palintegennanto dagiti danam.”​—Proverbio 3:5, 6.

20. Kalpasan nga indedikarmo ti biagmo ken Jehova, ania ti sumaruno nga aramidem?

²⁰ Panagkunam, nakasaganaka kadin a mangidedikar iti biagmo ken Jehova? No naidedikarmon ti biagmo kenkuana, nakasaganakan a mangaramid iti sumaruno nga addang. Masapul nga agpabautisarka.

21, 22. Kasanom nga ‘ipakaammo iti publiko’ ti pammatim?

²¹ Ibagam iti koordineytor ti bagi dagiti panglakayen iti kongregasionyo nga indedikarmon ti biagmo ken Jehova ken kayatmon ti agpabautisar. Kalpasanna, isu  ket mangpili kadagiti panglakayen a mangirepaso kenka kadagiti kangrunaan a pannursuro ti Biblia. No makitada a nakasaganakan, ibagada kenka a mabalinkan a mabautisaran iti sumaruno nga asamblea wenno kombension dagiti Saksi ni Jehova. Iti asamblea, addanto maiparang a palawag a mangilawlawag iti kaipapanan ti bautismo. Isaludsodto ti ispiker ti dua a simple a  saludsod kadagidiay nakasagana a mabautisaran. Babaen ti panangsungbatmo kadagita a saludsod, ‘ipakpakaammom iti publiko’ ti pammatim.​—Roma 10:10.

²² Kalpasanna, mabautisarankan. Maitanebka iti danum. Babaen ti bautismom, ipakpakitam iti amin nga  indedikarmon ti biagmo ken Jehova ket maysakan a Saksi ni Jehova.

23. Ania ti kayat a sawen ti mabautisaran “iti nagan ti Ama ken iti nagan ti Anak ken iti nagan ti nasantuan nga espiritu”?

²³ Imbaga ni Jesus a dagiti adalanna ket mabautisaran “iti nagan ti Ama ken iti nagan ti Anak ken iti nagan ti nasantuan nga espiritu.” (Basaen ti Mateo 28:19.) Ania ti kaipapanan dayta? Kayatna a sawen, bigbigbigem ti autoridad ni Jehova, ti akem ni Jesus iti panggep ti Dios, ken no kasano nga us-usaren ti Dios ti nasantuan nga espirituna tapno matungpal ti pagayatanna.​—Salmo 83:18; Mateo 28:18; Galacia 5:22, 23; 2 Pedro 1:21.

24, 25. (a) Ania ti irepresentar ti bautismo? (b) Ania ti pagsasaritaantayo iti maudi a kapitulo?

²⁴ Adda nakapatpateg nga ireprepresentar ti bautismo. No maitanebka iti danum, kaipapanan dayta a nataykan, wenno tinallikudamon, ti dati a kabibiagmo. No rumkuaskan iti danum, rugiamon ti baro a biag a mangaramid iti pagayatan ti Dios. Ipakita dayta nga agserbikan ken Jehova manipud iti dayta a gundaway. Laglagipem a saanka a nagdedikar iti maysa a tao, organisasion, wenno trabaho. Ni Jehova ti nangidedikaram iti biagmo.

²⁵ Makatulong ti panagdedikarmo tapno maaddaanka iti nadekket a relasion iti Dios. (Salmo 25:14) Saanna a kayat a sawen dayta a maisalakanen ti maysa a tao gapu laeng ta nabautisaran. Insurat ni apostol Pablo: “Itultuloyyo nga ikagumaan nga itrabaho ti bukodyo a pannakaisalakan nga addaan iti buteng ken panagpigerger.” (Filipos 2:12) Ti bautismo ket pangrugian laeng. Ngem kasanoka nga agtalinaed a nadekket ken Jehova? Sungbatan dayta ti maudi a kapitulo daytoy a libro.