1. Asino ti nangted iti biagtayo?

NI JEHOVA “ti sibibiag a Dios.” (Jeremias 10:10) Isu ti Namarsua kadatayo ken nangted iti biagtayo. Kuna ti Biblia: “Pinarsuam ti amin a banag, ken gapu iti pagayatam, napaadda ken naparsuada.” (Apocalipsis 4:11) Wen, kayat ni Jehova nga agbiagtayo. Ti biag ket nagpateg a regalona kadatayo.​—Basaen ti Salmo 36:9.

2. Ania ti masapul nga aramidentayo tapno naballigi ti biagtayo?

² It-ited ni Jehova dagiti kasapulantayo tapno agtultuloytayo nga agbiag, kas iti makan ken danum. (Aramid 17:28) Ngem kangrunaanna, kayatna a naragsaktayo nga agbiag. (Aramid 14:15-17) Masapul nga agtulnogtayo kadagiti linteg ti Dios tapno naballigi ti biagtayo.​—Isaias 48:17, 18.

3. Ania ti inaramid ni Jehova idi pinatay ni Cain ni Abel?

³ Isursuro ti Biblia a napateg ken Jehova ti biagtayo ken ti biag ti dadduma. Kas pagarigan, idi a ti anak da Adan ken Eva a ni Cain ket nakapungtot unay iti kabsatna a ni Abel, pinakdaaran ni Jehova a kontrolenna ti pungtotna. Ngem saan a dimngeg ni Cain ken nakapungtot iti kasta unay isu a ‘dinarupna ti kabsatna a ni Abel ket pinatayna.’ (Genesis 4:3-8) Dinusa ni Jehova ni Cain gapu iti panangpatayna ken Abel. (Genesis 4:9-11) Isu a dakes ti epekto ti pungtot ken gura ta pagbalinennatayo a naranggas wenno nauyong. Saan a maaddaan iti biag nga agnanayon ti kasta a tao. (Basaen ti  1 Juan 3:15.) Tapno maparagsaktayo ni Jehova, masapul a sursuruentayo nga ayaten ti amin a tattao.​—1 Juan 3:11, 12.

4. Iti maysa kadagiti linteg nga inted ti Dios kadagiti Israelita, ania ti masursurotayo maipapan iti regalo a biag?

⁴ Kalpasan ti rinibu a tawen, impakita ni Jehova a napateg kenkuana ti biag idi intedna ken Moises ti Sangapulo a Bilin. Ti maysa kadagita a bilin ket: “Dika pumatay.” (Deuteronomio 5:17) Masapul a mapapatay ti maysa a tao no inggagarana a patayen ti padana a tao.

5. Ania ti rikna ti Dios maipapan iti aborsion?

⁵ Ania ti rikna ti Dios maipapan iti aborsion? Napateg ken Jehova uray ti biag ti di pay nayanak nga ubing. Sigun iti Linteg nga inted ni Jehova kadagiti Israelita, imbaga ni Jehova a masapul a mapapatay ti maysa a tao no madangranna ti maysa nga ina ket matay ti sikogna. (Basaen ti Exodo 21:22, 23; Salmo 127:3.) Isuro daytoy kadatayo a saan nga umiso ti aborsion.​—Kitaen ti Endnote 28.

6, 7. Kasanotayo a maipakita ken Jehova nga ipatpategtayo ti biag?

⁶ Kasanotayo a maipakita ken Jehova nga ipatpategtayo ti biagtayo ken ti biag ti dadduma? Babaen ti saantayo a panangaramid iti aniaman a mangdangran iti biagtayo ken iti biag ti dadduma. Isu a ditay agsigarilio wenno agmama wenno agdroga ta makadangran dagita ken mabalin a pakatayantayo.

⁷ Inted ti Dios ti biag ken bagitayo isu a masapul nga usarentayo dagita iti pamay-an a kayatna. Masapul ngarud nga aywanantayo ti bagitayo ta no saan, ibilangnatayo ti Dios a narugit. (Roma 6:19; 12:1; 2 Corinto 7:1) Saantayo a maidaydayaw ni Jehova, a nangted iti biagtayo, no ditay ipateg ti biag. Mabalin a narigat nga isardeng dagiti dakes a bisio, ngem tulongannatayo ni  Jehova no ikagumaantayo nga aramiden dayta ta ipakpakitatayo nga ipatpategtayo ti biag.

8. Ania ti aramidentayo tapno saantayo a madangran ti biagtayo wenno ti biag ti dadduma?

⁸ Naadaltayo a ti biag ket nagpateg a regalo. Agtalek ni Jehova nga aramidentayo ti amin a kabaelantayo tapno saan a pulos madangran ti biagtayo wenno ti biag ti dadduma. Maaramidtayo dayta iti pamay-an ti panagmanehotayo iti kotse, motor, wenno dadduma pay a lugan. Liklikantayo ti delikado wenno naranggas nga isports. (Salmo 11:5) Aramidentayo met ti amin a kabaelantayo tapno natalged ti balaytayo. Imbilin ni Jehova kadagiti Israelita: “No mangipatakderkayo iti balay, masapul a barandiliasanyo [wenno, ikkanyo iti nababa a pader] ti atepna, tapno dikay makabasol iti dara no adda matnag manipud iti dayta.”​—Deuteronomio 22:8.

9. Kasano koma ti panangtratotayo kadagiti animal?

⁹ Napateg met ken Jehova uray ti panangtratotayo kadagiti animal. Ipalubosna a pumataytayo iti animal tapno adda pagtaraon ken pagbadotayo, ken no pagpeggadenda ti biagtayo. (Genesis 3:21; 9:3; Exodo 21:28) Ngem ditay mabalin a ranggasan wenno patayen dagiti animal tapno laeng pagay-ayaman.​—Proverbio 12:10.

10. Apay a maibagatayo a ti dara irepresentarna ti biag?

¹⁰ Sagrado ken Jehova ti dara ta irepresentar dayta ti biag. Kalpasan a pinatay ni Cain ni Abel, imbaga ni Jehova ken ni Cain: “Agik-ikkis kaniak ti dara ti kabsatmo manipud iti daga.” (Genesis 4:10) Irepresentar ti dara ni Abel ti biagna isu a dinusa ni Jehova ni Cain ta pinatayna ni Abel. Kalpasan ti Layus idi tiempo ni Noe, impakita manen ni Jehova a biag ti irepresentar ti dara. Pinalubosan  ni Jehova da Noe ken ti pamiliana a mangan iti karne ti animal. Imbagana: “Mabalinyo a pagtaraon ti tunggal sibibiag ken aggargaraw nga animal. Itedko amin dagitoy a taraonyo kas iti panangtedko kadagiti berde a mula.” Ngem adda imbilin ni Jehova a saanda a kanen: “Ti laeng diyo kanen ket ti lasag nga adda darana, ta dayta ti biagna.”​—Genesis 1:29; 9:3, 4.

11. Ania ti imbilin ti Dios iti nasion ti Israel maipapan iti dara?

¹¹ Agarup 800 a tawen kalpasan a binilin ni Jehova ni Noe a saan a mangan iti dara, binilinna manen ti ilina: “Asinoman nga Israelita wenno ganggannaet a residente a makaanup wenno makatiliw iti atap nga animal wenno billit a mabalin a kanen, masapul nga ibukbokna ti dara ti animal sa gaburanna iti tapok.” Sa innayonna: “Saanyo a kanen ti dara.” (Levitico 17:13, 14) Kayat latta ni Jehova nga ibilang ti ilina a sagrado ti dara. Mabalinda a kanen ti karne ngem saan ti dara. No partienda ti animal tapno pagtaraon, masapul nga ibukbokda ti darana iti daga.

12. Ania koma ti pangibilangan dagiti Kristiano iti dara?

¹² Sumagmamano a tawen kalpasan ti ipapatay ni Jesus, nagsasaritaan dagiti apostol ken dagiti panglakayen iti kongregasion Kristiano iti Jerusalem no ania kadagiti paset ti Linteg a naited kadagiti Israelita ti agaplikar latta kadagiti Kristiano. (Basaen ti Aramid 15:28, 29; 21:25.) Tinulongan ida ni Jehova tapno maawatanda a napateg latta kenkuana ti dara ken masapul nga ibilangda a sagrado dayta. Saan a mabalin a mangan wenno uminum iti dara dagiti nagkauna a Kristiano wenno mangan iti karne a saan a nasayaat ti pannakapadarana. Maibilang dayta a dakes a kas iti panagdaydayaw kadagiti idolo wenno panagaramid iti seksual nga immoralidad. Sipud idi, saan a kayat dagiti pudno a Kristiano ti mangan wenno  uminum iti dara. Ita ngay? Kayat latta ni Jehova nga ibilangtayo a sagrado ti dara.

13. Apay a saan nga agpayalison iti dara dagiti Kristiano?

¹³ Kayatna kadi a sawen a masapul a saan met nga agpayalison iti dara dagiti Kristiano? Wen. Imbilin ni Jehova a saantayo a mangan wenno uminum iti dara. No ibaga ti doktor a saanka nga uminum iti arak, itudokmo kadi dayta iti bagim? Siempre, saan! Kasta met, ti bilin a saan a mangan wenno uminum iti dara kayatna a sawen a masapul a saantayo nga agpayalison iti dara.​—Kitaen ti Endnote 29.

14, 15. Apay a masapul nga ipateg dagiti Kristiano ti biag ken agtulnogda ken Jehova?

¹⁴ Kasanon no ibaga ti doktor a mataytayo no ditay agpayalison iti dara? Masapul nga agdesision ti tunggal maysa no kayatna ti agtulnog iti linteg ti Dios maipapan iti dara. Ipatpateg unay dagiti Kristiano ti biag a regalo ti Dios isu nga agbiroktayo iti sabali a pamay-an ti panangagas tapno agbiagtayo; ngem ditay agpayalison iti dara.

¹⁵ Ikagkagumaantayo ti agtalinaed a nasalun-at, ngem gapu ta napateg iti Dios ti biag, ditay agpayalison iti dara. Napatpateg ti agtulnog ken Jehova ngem ti agsukir kenkuana tapno laeng umatiddog ti biagtayo. Imbaga ni Jesus: “Ti mangikagumaan a mangisalakan iti biagna, mapukawnanto. Ngem ti makapukaw iti biagna maigapu kaniak, masarakannanto.” (Mateo 16:25) Kayattayo ti agtulnog ken Jehova gapu ta ay-ayatentayo. Ammona ti kasayaatan para kadatayo isu a kas kenkuana, ipategtayo ti biag ken ibilangtayo dayta a sagrado.​—Hebreo 11:6.

16. Apay nga agtulnog iti Dios dagiti adipenna?

¹⁶ Determinado dagiti matalek nga adipen ti Dios nga agtulnog iti lintegna maipapan iti dara. Saanda a mangan wenno uminum iti dara, ken saanda met nga agusar  iti dara kas pangagas. * Ngem awatenda ti sabali a pamay-an ti panangagas tapno masalbar ti biagda. Kombinsidoda nga ammo ti Namarsua iti biag ken dara no ania ti kasayaatan para kadakuada. Mamatika kadi nga ammona no ania ti kasayaatan para kenka?

17. Ania ti kakaisuna nga impalubos ni Jehova a pangusaran dagiti Israelita iti dara?

¹⁷ Iti Linteg nga inted ti Dios ken ni Moises, imbaga ni Jehova kadagiti Israelita: “Adda iti dara ti biag ti aniaman a parsua, ket imbilinko a maidaton dayta iti rabaw ti altar kas pangabbong [wenno, panangdawat iti pammakawan] kadagiti basolyo. Ti dara ti mangabbong iti basol.” (Levitico 17:11) No agbasol idi dagiti Israelita, mabalinda ti dumawat iti pammakawan ken Jehova babaen ti panangidatonda iti animal ken panangkiddawda iti padi a mangibukbok iti dara ti animal iti altar iti templo. Daytoy laeng ti kakaisuna a pamay-an nga impalubos ni Jehova a pangusaran dagiti Israelita iti dara.

18. Ania ti nagbalin a posible para kadatayo gapu iti daton ni Jesus?

¹⁸ Idi immay ni Jesus ditoy daga, sinuktanna ti linteg iti panagidaton iti animal babaen ti panangitedna iti biagna, wenno darana, tapno mapakawan dagiti basoltayo. (Mateo 20:28; Hebreo 10:1) Nakapatpateg ti biag ni Jesus ta kalpasan a pinagungar ni Jehova ken immuli idiay langit, mabalinen nga ikkan ni Jehova ti amin a tattao iti gundaway nga agbiag nga agnanayon.​—Juan 3:16; Hebreo 9:11, 12; 1 Pedro 1:18, 19.

19. Ania ti masapul nga aramidentayo tapno ‘nadalustayo iti dara ti amin a tao’?

 ¹⁹ Anian a yamantayo ken Jehova iti nagsayaat a regalona a biag! Isu a kayattayo nga ibaga kadagiti tattao a no adda pammatida ken Jesus, mabalinda ti agbiag nga agnanayon. Ay-ayatentayo dagiti tattao, isu nga aramidentayo ti amin tapno maisurotayo kadakuada no kasanoda a magun-od ti biag. (Ezekiel 3:17-21) Iti kasta, maibagatayo met ti kinuna ni apostol Pablo: “Nadalusak iti dara ti amin a tao, ta saanak a nagkedked a nangibaga kadakayo iti amin a pagayatan ti Dios.” (Aramid 20:26, 27) Wen, maipakitatayo nga ipatpategtayo ti biag ken dara no ibagatayo iti dadduma ti maipapan ken Jehova ken no kasano kapateg ti biag kenkuana.