‘NAPATEG TI NAMNAMA ITI ESPIRITUALIDADTAYO,’ kuna ti libro a Hope in the Age of Anxiety. “Ken dayta ti kasayaatan a panglaban no marikna ti maysa nga awan gawgawayna, agmaymaysa, ken mabuteng.”

Naipakita kadagiti binulong ti Biblia a kasapulantayo ti namnama, ken ibagana met nga agannadtayo kadagiti ulbod a namnama. Kuna ti Salmo  146:3: “Dikay ikabil ti panagtalekyo kadagiti natan-ok, wenno uray iti anak ti naindagaan a tao, a kenkuana awan pannakaisalakan.” Imbes nga agtalektayo a maisalakannatayo ti tao, nainsiriban nga agtalektayo iti Namarsua, a makabael a mangtungpal iti amin a karina. Ania ti karina? Panunotem dagitoy:

AWANTON TI KINADAKES; ADDANTON TI AGNANAYON A TALNA KADAGITI NALINTEG: “Ket iti apagbiit laengen a kanito, ket daydiay nadangkes awanton . . . Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna,” kuna ti Salmo 37:10, 11. Kuna pay ti bersikulo 29 a “dagiti nalinteg . . . agtaengdanto nga agnanayon” iti daga.

AGPATINGGANTON TI GUBAT: “Ni Jehova . . . pagsardengenna dagiti gubat agingga iti ungto ti daga. Rungrungduenna ti bai ket putedputedenna ti pika; dagiti kareson ipuorna iti apuy.”—Salmo 46:8, 9.

AWANTON TI SAKIT, PANAGRIGRIGAT WENNO PANAGSAGABA, WENNO IPAPATAY: “Ti tolda ti Dios adda iti sangatauan . . . Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.”—Apocalipsis 21:3, 4.

ADU A MAKAN PARA ITI AMIN: “Maaddanto ti naruay a bukbukel iti daga; iti tapaw dagiti bantay addanto ti panaglaplapusanan.”—Salmo 72:16.

NALINTEG A TURAY TI MAYMAYSA A GOBIERNO ITI INTERO A LUBONG—PAGARIAN NI KRISTO: “Adda naited [ken Jesu-Kristo] a panagturay ken dayaw ken pagarian, tapno dagiti ili, nasional a bungbunggoy ken pagsasao agserbida koma amin kenkuana a mismo. Ti panagturayna ket di nakedngan ti kapautna a panagturay a saanto nga aglabas, ket ti pagarianna maysa a saanto a madadael.”—Daniel 7:14.

Kasano a masiguradotayo a matungpal dagita a kari? Idi adda ni Jesus ditoy daga, pinaneknekanna iti publiko a kualipikado kas Nadutokan nga Ari. Pinaimbagna dagiti masakit, pinakanna dagiti napanglaw, ken pinagungarna dagiti natay. Ngem napatpateg pay dagiti pannursurona, ta naglaon kadagiti prinsipio a makatulong iti tao nga agbiag a natalna ken agkaykaysa iti agnanayon. Impakpakauna met ni Jesus dagiti mapasamak iti masanguanan, a pakairamanan dagiti pagilasinan iti maudi nga al-aldaw daytoy agdama a lubong.

Impakpakauna ni Jesus nga iti maudi nga al-aldaw, awan ti talna ken kinatalged! Karaman iti pagilasinan “ti panungpalan ti sistema ti bambanag” dagiti gubat, agkurkurang a taraon, makapapatay a sakit, ken napipigsa a ginggined. (Mateo 24:3, 7; Lucas 21:10, 11; Apocalipsis 6:3-8) Imbaga pay ni Jesus: “Gapu iti iyaadu ti kinakillo, ti ayat ti ad-adu lumamiisto.”—Mateo 24:12.

Makita dayta a nalamiis nga ayat iti adu a pamay-an, kas impakpakauna ti sabali pay a mannurat ti Biblia. Mabasatayo iti 2 Timoteo 3:1-5, a kadagiti “maudi nga aldaw,” kaaduan a tattao ti managayat iti bagbagida, iti kuarta, ken ragragsak. Natangsit ken narungsotda. Dagiti pamilia ket awanan iti nainkasigudan nga ayat, ken nasukir dagiti annak kadagiti nagannakda. Adu dagiti agpampammarang a relihioso.

Paneknekan dagita a kasla bagyo a kasasaad nga addan iti maudi nga al-aldaw daytoy a lubong. Paneknekan met dagita nga asidegen ti natalna a panagturay ti Pagarian. Gapuna, inraman ni Jesus daytoy a pammatalged iti padtona maipapan iti maudi nga al-aldaw: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”—Mateo 24:14.

Dayta a naimbag a damag ti mangpakdaar kadagiti agar-aramid iti dakes ken mangted namnama kadagiti nalinteg, ken ipasiguradona a dandanin matungpal dagiti naikari a bendision. Kayatmo kadi a maammuan ti ad-adu pay maipapan kadagita a bendision? No wen, pangngaasim ta kitaem ti maudi a panid daytoy a magasin.