Iparparegta ti United Nations iti amin a tattao nga agtitinnulongda, raemenda dagiti kalintegan ti padada a tattao, ken protektaranda ti aglawlaw. Apay? Kuna ni Maher Nasser iti UN Chronicle a dagiti umili iti tunggal pagilian ket apektado iti “panagbalbaliw ti klima, organisado a sindikato ti krimen, kumarkaro a saan a patas a pannakatrato, di masolbar a di pagkikinnaawatan, panagbakuit ti adu a tattao, sangalubongan a terorismo, makaakar a saksakit, ken dadduma pay.”

Ngem nalablabes pay ngem iti dayta ti iparparegta ti dadduma, a kas iti masirib nga Italiano, mannaniw, ken politiko a ni Dante (1265-1321) ken ti sientista a ni Albert Einstein (1879-1955). Kayatda nga adda koma maymaysa a sangalubongan a gobierno. Mamati idi ni Dante a saan nga agpaut ti talna no agduduma ti gobierno iti lubong. Kinotarna ti imbaga ni Jesu-Kristo a “marpuog ti pagarian a saan nga agkaykaysa.”​—Lucas 11:17.

Di nagbayag kalpasan ti Gubat Sangalubongan II, a nakausaran ti dua a bomba atomika, insurat ni Albert Einstein iti General Assembly ti United Nations nga impaipablaakna iti diario: “Masapul nga aramiden a dagus ti United Nations ti amin a pamuspusan tapno natalged ti amin a nasion babaen ti pannakaipasdek ti maymaysa a pudpudno a sangalubongan a gobierno.”

Ngem dagiti ngata politiko a mangituray iti kasta a nabileg a gobierno maliklikanda ti korapsion, kinakapuy, ken panangirurumen? Wenno posible nga agbalinda met a dakes a kas kadagiti napalabasen nga agtuturay? Dagita a saludsod ti mangipalagip iti imbaga ti Briton a historiador a ni Lord Acton a no adda pannakabalin ti maysa a tao, makaaramid la ketdi iti dakes ken no dakdakkel ti pannakabalinna, dakdakes la ketdi ti maaramidanna.

Ngem tapno maaddaan ti amin a tattao iti pudpudno a talna ken panagtutunos, masapul nga agkaykaysatayo. Kasano? Posible kadi? Wen, sigun iti Biblia. Sigurado ken mapasamakto dayta. Kasano? Saan a babaen iti sangalubongan a gobierno nga iturayan dagiti dakes a politiko, no di ket babaen iti gobierno ti Dios. Nasaysayaatto payen ta usarenen ti Dios ti kalinteganna a mangituray iti amin a parsuana. Ania dayta a gobierno? “Pagarian ti Dios” ti awag ti Biblia iti dayta a gobierno.​—Lucas 4:43.

Ti Pagarian ti Dios ti pampanunoten ni Jesu-Kristo idi imbagana iti pagtuladan a kararagna: “Umay koma ti Pagariam. Maaramid koma ti pagayatam ditoy daga.” (Mateo 6:9, 10) Wen, siguraduen ti Pagarian ti Dios a maaramid ti pagayatan ti Dios ditoy daga, saan a ti pagayatan dagiti agbibisin iti pannakabalin wenno dagiti managimbubukodan a tattao.

Ti Pagarian ti Dios ket naawagan met kas “ti Pagarian ti langit.” (Mateo 5:3) Apay? Nupay iturayanna ti daga, saan a ditoy daga ti ayan dayta a turay no di ket idiay langit. Panunotem ti kaipapanan dayta. Daytoy a sangalubongan a gobierno ket saan nga agkasapulan wenno agkiddaw iti kuarta, kas iti buis. Makapabang-arto la ketdi dayta kadagiti iturayanna a tattao!

Kas ipakita ti sao a “pagarian,” ti Pagarian ti Dios ket iturayan ni Jesu-Kristo, ti Ari a pinili a mismo ti Dios. Kuna ti Biblia maipapan ken Jesus:

• “Maiparabawto iti abagana ti panagturay . . . Agsaknapto ti panagturayna ken saanto nga agpatingga ti kappia.”​—Isaias 9:6, 7.

•   ‘Naited kenkuana ti autoridad nga agturay, dayaw, ken pagarian, tapno agserbi koma kenkuana ti amin a tattao iti nadumaduma a nasion ken lengguahe. Ti panagturayna saanto nga agpatingga.’​—Daniel 7:14.

• “Ti pagarian ti lubong ket nagbalinen a Pagarian ti Apotayo [Diostayo] ken ti Kristona.”​—Apocalipsis 11:15.

Kas kaitungpalan ti pagtuladan a kararag ni Jesus, naan-anay nga ibanagto ti Pagarian ti Dios ti pagayatan ti Dios ditoy daga. Iti panangituray dayta, masursuronto ti amin a tao no kasano nga aywanan ti planeta a daga tapno sumayaat manen ti kasasaadna ken mapno iti sibibiag a bambanag.

Kangrunaanna, isuronto ti Pagarian ti Dios dagiti iturayanna. Amin ket masuruan kadagiti agpapada a pagalagadan. Awanto ti riri wenno panagsisina. “Saandanto a pulos mangdangran wenno mangdadael . . . ta sigurado a mapnonto ti daga iti pannakaammo maipapan ken Jehova kas iti pannakapunno ti baybay iti danum,” kuna ti Isaias 11:9.

Amin nga agnaed ditoy daga ket agkaykaysa ken agkakappianto, banag a saan a naaramidan ti United Nations. “Maragragsakandanto unay iti naruay a talna,” kuna ti Salmo 37:11. Awanton iti bokabulariotayo ti sasao a kas iti “krimen,” “polusion,” “kinapanglaw,” ken “gubat.” Ngem kaano? Wen, kaano nga iturayan ti Pagarian ti Dios daytoy daga? Kasano a mangrugi ti panangiturayna iti daga? Ken kasanoka a magunggonaan iti panangiturayna? Ammuentayo.