“Babaen ti maysa a tao, simrek ti basol iti lubong ken ti ipapatay babaen ti basol, isu a matay ti amin a tao ta nagbasolda amin.”​—ROMA 5:12.

Pinarsua ti Dios ti umuna a nagannaktayo a da Adan ken Eva nga addaan iti perpekto nga isip ken bagi. Inikkanna met ida iti paraiso a pagyananda ditoy daga, a maawagan iti hardin ti Eden. Imbagana a mabalinda a kanen ti bunga ti amin a kayo iti hardin, malaksid iti maysa. Nupay kasta, nangan da Adan ken Eva iti sumagmamano a bunga dayta a kayo ket basol dayta. (Genesis 2:15-17; 3:1-19) Idi nagsukirda, pinaruar ida ti Dios iti hardin ket rimmigat ti kasasaadda. Idi agangay, naaddaanda kadagiti annak ket narigat met laeng ti kasasaadda. Limmakay ken bimmaketda amin ken natayda. (Genesis 3:23; 5:5) Agsakit, lumakay ken bumaket, ken mataytayo gapu ta nagtaudtayo iti dayta nga umuna a pamilia.

“Ti intero a lubong ket adda iti pannakabalin daydiay managdakdakes.”​—1 JUAN 5:19.

Dayta a “managdakdakes” ket maawagan iti Satanas. Isu ket saan a makita nga espiritu a parsua a nagrebelde iti Dios. (Juan 8:44; Apocalipsis 12:9) Idi agangay, nakikadua ti dadduma pay nga espiritu a parsua ken Satanas. Maawaganda iti demonio. Us-usaren dagitoy a dakes nga espiritu ti pannakabalinda  a mangallilaw kadagiti tattao tapno agsukirda iti Namarsua. Im-impluensiaanda ti adu a tattao nga agaramid iti dakes. (Salmo 106:35-38; 1 Timoteo 4:1) Maragragsakan ni Satanas ken dagiti demonio no agrigat ken agsagaba dagiti tattao.

“Aniaman nga imulmula ti maysa a tao, daytanto met ti apitenna.”​—GALACIA 6:7.

Agsagabatayo amin iti nadumaduma a pamay-an gapu iti natawidtayo a basol ken iti impluensia ni Satanas iti lubong. Ngem no dadduma, tao met laeng ti makagapu iti bukodda a panagsagaba. Kasano? No agaramidda iti dakes wenno makaaramidda iti saan a nasayaat a desision, masansan a saan a nasayaat ti resultana. Iti sabali a bangir, no agaramidda iti nasayaat, nasayaat met ti resultana. Kas pagarigan, no ti asawa a lalaki ken ama ket napudno, nagaget nga agtrabaho, ken ay-ayatenna ti pamiliana, adu ti nasayaat a resultana ken agbalin a naragsak ti pamiliana. Ngem no mannugal, mammartek, ken nasadut, rumigat ti biagna ken ti pamiliana. Nainsiriban ngarud a dumngegtayo iti Namarsua kadatayo. Kayatna nga agapittayo iti adu a nasayaat a bambanag a pakairamanan ti ‘aglaplapusanan a talna.’​—Salmo 119:165.

“Iti maudi nga al-aldaw . . . , ay-ayatento laeng dagiti tattao ti bagbagida, managayat iti kuarta, . . . nasukir kadagiti nagannak, . . . awanan panagteppel, nauyong, kagurada ti kinaimbag.”​—2 TIMOTEO 3:1-5.

Adu ti kasta ti ugalina ita. Ti kababalinda ket kanayonan nga ebidensia nga agbibiagtayon “iti maudi nga al-aldaw” daytoy a lubong. Impakpakauna met ti Kasuratan nga iti kaaldawantayo, addanto dagiti gubat, bisin, napigsa a ginggined, ken sakit. (Mateo 24:3, 7, 8; Lucas 21:10, 11) Mangyeg dagitoy iti nakaro a panagsagaba ken ipapatay.