“Itultuloyyo ti . . . agpipinnakawan uray no adda pangibatayan ti maysa nga agreklamo maibusor iti sabali.”​—COLOSAS 3:13.

Agkamalitayo amin. Mabalin a masaktantayo ti sabsabali, wenno isuda ti makapasakit kadatayo. Aniaman ti situasion, kasapulantayo amin ti mangpakawan ken mapakawan. No mangpakawantayo, saanen nga agsakit ti nakemtayo iti nakapasakit kadatayo. Saantayo a ‘subadan iti dakes dagiti agaramid kadatayo iti dakes,’ ken saantayo a kanayon nga ipalagip dagiti pagkurangan wenno pagkapuyan ti maysa a tao. (Roma 12:17) Ngem kasano no nasaktantayo unay ken saantayo a malipatan ti napasamak? Masapul a siraraem a kasaritatayo dayta a tao iti pribado. Ti panggeptayo ket makikappia, saan a tapno paneknekantayo a datayo ti umiso.​—Roma 12:18.

“Agpakumbabakayo, nga ibilangyo a nangatngato ti sabsabali ngem dakayo.”​—FILIPOS 2:3.

Magustuan dagiti tattao ti makikadua kadatayo no napakumbaba ken narespetotayo. Ammoda a nasingpet ken nakonsiderartayo ken saantayo nga igagara a saktan ti riknada. Ngem no ibilangtayo ti bagitayo a nangatngato ngem iti sabsabali, wenno  kanayon nga ipapilittayo ti kaykayattayo, adu ti mapaguratayo. Liklikandatayo dagiti tattao, ken manmano ti gayyemtayo, no adda man.

“Saan a mangidumduma ti Dios, no di ket awatenna ti tao iti tunggal nasion nga agbuteng kenkuana ken agaramid iti umiso.”​—ARAMID 10:34, 35.

Saan nga ibilang ti Namarsua kadatayo a nangatngato ti dadduma a tattao ngem iti sabsabali gapu iti nasionalidad, lengguahe, kasasaad iti biag, wenno kolor ti kudilda. “Inaramidna ti tunggal nasion dagiti tattao manipud iti maysa a tao.” (Aramid 17:26) Kayatna a sawen, agkakabsat ti amin a tattao. No ipakitaantayo ti sabsabali iti dignidad ken kinaimbag, maparagsaktayo ida, agbalintayo nga ad-adda a naragsak, ken maay-ayotayo ti Namarsua kadatayo.

“Ikawesyo ti . . . kinaalumamay.”​—COLOSAS 3:12.

No naalumamaytayo, agbalin a komportable ti sabsabali kadatayo. Nawayada a makisarita kadatayo ken saanda a mabain a mangilinteg kadatayo ta ammoda nga agtalinaedtayo a kalmado. No adda makapungtot kadatayo, ti naalumamay a sungbattayo pagkalmaenna dayta a tao. “Ti naalumamay a sungbat pabaawenna ti pungtot, ngem ti nagubsang a sao rubrobanna ti unget,” kuna ti Proverbio 15:1.

“Naragragsak ti mangted ngem ti umawat.”​—ARAMID 20:35.

Adu a tattao ita ti naagum ken bagida laeng ti pampanunotenda. Ngem agbalintayo a pudpudno a naragsak no naparaburtayo. (Lucas 6:38) Naragragsak dagiti naparabur ta ad-adda nga ay-ayatenda dagiti tattao ngem dagiti material a banag. Dayta met la nga ayat ti mangtignay kadakuada nga agbalin a managyaman ken mangipakita iti apresasion no adda naparabur kadakuada. (Colosas 3:15) Isaludsodmo iti bagim, ‘Asino ti kaykayatko a kadua​—daydiay naimut ken saanna nga ammo ti agyaman wenno daydiay naparabur ken managyaman?’ Ti punto, ipakitam dagiti galad a kayatmo nga ipakita ti sabsabali.​—Mateo 7:12.