Ania ti Napasamaken iti Respeto iti Biag?
NO APAY A NAPATEG TI RESPETO ITI BIAG
No mangar-aramidka kadagiti banag a mangdadael iti salun-atmo wenno mamagpeggad iti dadduma, ipakpakitam a saanmo nga ipatpateg ti biagmo wenno ti biag ti dadduma.
-
Makapakanser ti panagsigarilio. Ngem saan la a dayta. Marigatan pay ti bagim a manglaban iti kanser gapu iti panagsigariliom. Agarup 90 a porsiento kadagiti natay gapu iti kanser iti bara ket maigapu iti panagsigarilio wenno pannakalang-ab iti asuk ti sigarilio ti sabsabali.
-
Kada tawen, adu ti matrom-trauma gapu kadagiti bigla a panagpaltopaltog iti adu a tattao. Kuna ti maysa a report ti Stanford University: “Ipakita ti research nga uray dagidiay saan a nadangran iti pisikal kadagiti [panagpaltopaltog kadagiti eskuelaan] ket nadangran latta iti mental ken emosional a mabalin a mangapektar iti biagda iti adu a tawen.”
-
Gapu kadagiti drayber a nakainum wenno naka-drugs, agpeggad ti biag ti dadduma nga adda iti kalsada wenno uray dagiti adda iti igid ti kalsada. No awan ti panangipateg ti maysa iti biag, mabalin a mairaman a madangran dagiti inosente a tattao.
TI MABALINMO NGA ARAMIDEN
Protektaram ti salun-atmo. Saan pay a naladaw tapno isardengmo dagiti bisio kas iti panagsigarilio, panag-vape, panagbartek, wenno panagusar kadagiti illegal a droga. Dagita a bisio ket mangdangran iti biagmo ken mangipakita iti saanmo a panangrespeto iti biag dagiti tattao a kalanglangenmo, agraman dagiti kapamiliam.
Sipapanunotka koma iti safety. Tapno maliklikam dagiti aksidente, pagtalinaedem a nasayaat ti kondision ti balaymo ken dagiti alikamen nga us-usarem. Naannadka koma nga agmaneho, ken pagtalinaedem a nasayaat ti kondision ti luganmo. Saanka koma a tumulok no pilitendaka a mangaramid kadagiti aktibidad a mabalin a pakadangram wenno pakatayam.
Naimbagka koma iti sabsabali. Resrespetuentayo ti biag no naimbagtayo kadagiti tattao aniaman ti puli, pagilian, wenno kasasaadda iti biag. Apay a napateg dayta? Ngamin, ti panangidumduma ken gura ti makagapu iti adu a kinaranggas ken panaggugubat ditoy lubong.
TI AR-ARAMIDENMI
Iparparegtami a Saksi ni Jehova ti balanse ken nasalun-at a panagbiag. Ti programami a panangisuro iti Biblia ket nakatulongen kadagiti tattao a mangisardeng kadagiti makaadikto ken makadangran a bisio.
Sursurotenmi a naimbag dagiti pagalagadan iti safety kadagiti proyektomi a panagibangon. Tapno maliklikan dagiti aksidente, masansanay dagiti boluntario nga agibangbangon kadagiti paggigimonganmi ken dadduma pay a pasilidad a maus-usar iti panangisuromi iti Biblia. Regular a mains-inspeksion dagiti pasilidadmi tapno masigurado a masursurotmi dagiti paglintegan iti safety iti lugarmi.
Tumultulongkami kadagiti naapektaran iti didigra. Idi 2022, agarup 200 a makapapatay a didigra iti intero a lubong ti timmulonganmi, ken dandani 12 a milion a doliar a donasion ti nagastos tapno matulongan dagiti nadidigra.
Idi umad-adu ti makapkaptan iti Ebola iti West Africa idi 2014 ken iti Democratic Republic of Congo idi 2018, sinuruanmi dagiti tattao kadagiti aramidenda tapno malapdan ti panagwaras dayta a makapapatay a sakit. Adda dagiti imbaonmi a makisarita kadagiti grupo ti tattao maipapan iti topiko a “Panagtulnog—Mangsalbar iti Biag.” Nagikabilkami kadagiti pagbugguan iti ima iti sango dagiti paggigimonganmi. Impaganetgetmi met a nagpateg ti panagbuggo iti ima ken imbagami ti dadduma pay nga aramidenda tapno malapdan ti panagwaras ti sakit.
Idiay Sierra Leone, kinomendaran ti maysa nga estasion ti radio dagiti Saksi ni Jehova gapu ta timmulongda kadagiti Saksi ken saan a Saksi iti lugarda tapno saanda a makaptan iti Ebola virus.
Pagbugguan iti ima iti Kingdom Hall bayat ti panagwaras ti Ebola idiay Liberia idi 2014
a Idi un-unana idiay Middle East, masapul a surotenda dayta a bilin tapno maipakitada a sipapanunotda iti kinatalged ti pamiliada ken ti dadduma.
