Kasla saan a nainkalintegan no agrigat ti maysa a nasayaat a tao. Ta no kasta, awan ti serserbina ti panagbalin a nasayaat.

Adda dagiti mamati a no matay ti maysa a tao, mayanakto manen. Kunada a no nasayaatka, nasaysayaatto ti biagmo inton mayanakka manen, ngem no dakeska, narigatto ti kasasaadmo inton mayanakka manen. Sigun iti dayta a pammati, mabalin nga agsagaba ti nasayaat a tao no nakaaramid iti dakes iti “napalabas a biagna.” Ngem . . .

• Ania ti serbina ti kasta a panagsagaba no saanto met la a malagip ti maysa a tao a nayanak manen ti napalabas a biagna?

• Apay ngarud nga ikagkagumaantayo ti agtalinaed a nasalun-at ken likliklikantayo ti aksidente no nakadepende met laeng iti napalabas a biagtayo ti biagtayo ita?

  AMMUEM TI AD-ADU PAY

  Buyaem ti video nga Apay nga Ipalpalubos ti Dios ti Panagsagaba? iti jw.org/ilo.

Saan a pannusa ti Dios ti panagsagaba.

Masansan a kaaduan kadagita ket gapu ta adda ti maysa a tao iti di umiso a lugar iti di umiso a tiempo.

“Saan a kanayon a dagiti napartak ti mangabak iti lumba, wenno dagiti nabileg ti kanayon a mangabak iti gubat, wenno dagiti masirib ti kanayon nga addaan iti taraon, wenno dagiti nalaing ti kanayon a nabaknang, wenno dagiti addaan pannakaammo ti kanayon nga agballigi, ta dumteng kadakuada amin ti tiempo ken di ninamnama a pasamak.”—ECLESIASTES 9:11.

Agsagsagabatayo gapu iti natawidtayo a basol.

Masansan nga usaren dagiti tattao ti sao a “basol” a tumukoy iti dakes nga inaramid ti maysa. Ngem iti Biblia, nausar met dayta a mangiladawan iti kasasaad a tinawid ti amin a tao, nasayaatda man wenno dakes.

“Nayanakak nga addaan iti basol, managbasolakon sipud idi inyinawnak ni inak.”—SALMO 51:5, Footnote.

Dakes ti epekto ti basol kadagiti tattao.

Saanna laeng a dinadael ti relasiontayo iti Namarsua kadatayo, dinadaelna pay ti relasiontayo kadagiti dadduma a parsua ti Dios. Nagresulta dayta iti nakaro a panagsagaba ti tunggal tao ken ti intero a sangatauan.

“No kayatko nga aramiden ti umiso, ti dakes ti adda kaniak.”—ROMA 7:21.

“Agas-asug ken agpapaut-ot ti intero a sangaparsuaan.”—ROMA 8:22.