MAMATIKA kadi a ti Biblia ket “impaltiing ti Dios”? Wenno puro kapanunotan laeng dagiti tattao ti linaonna?

Pagdedebatean pay laeng dayta uray dagidiay mangibagbaga a Kristianoda. Kas pagarigan, idi 2014, impakita ti maysa a surbey idiay United States a kaaduan a mangibagbaga a Kristianoda ti umanamong a “ti Biblia ket adda koneksionna iti Dios.” Ngem agarup 1 iti 5 a nasurbey ti nangibilang iti Biblia kas libro dagiti “parparbo nga estoria, nagkauna a sarsarita, historia, ken prinsipio nga aramid ti tao.” Gapu iti dayta nga isyu, masapul a mailawlawag ti talaga a kaipapanan ti sao nga “impaltiing” a nausar para iti Biblia.—2 Timoteo 3:16.

Ti Biblia ket buklen ti 66 a babassit a libro nga insurat ti agarup 40 a mannurat iti dandani 1,600 a tawen. Ngem no tattao ti nangisurat iti Biblia, kasano nga “impaltiing ti Dios” dayta? Ti simple a kaipapanan ti “impaltiing ti Dios” ket ti Dios ti Naggapuan dagiti impormasion kadagita a sursurat. Kuna ti Biblia: “Dagiti tattao nagsaoda manipud iti Dios bayat nga idaldalan ida ti nasantuan nga espiritu.” (2 Pedro 1:21) Iti sabali a pannao, inusar ti Dios ti nasantuan nga espirituna—ti mamagtignay a di makita a puersa—tapno maidanon ti mensahena kadagiti mannurat ti Biblia. Mayarig dayta iti maysa a negosiante a mangidikdiktar iti surat iti sekretariona. Saan a ti agsursurat ti autor, no di ket daydiay mangidikdiktar.

Dadduma a mannurat ti Biblia ti aktual a nakangngeg iti mensahe ti Dios babaen iti anghel. Adda met dagiti nakakita iti sirmata manipud iti Dios. Iti dadduma a gundaway, impakaammo ti Dios ti mensahena babaen iti tagtagainep. Adda dagiti tiempo a pinalubosan ti Dios dagiti mannurat a mangusar iti bukodda a sasao. Ngem adda met dagiti tiempo nga imbagana ti eksakto a sasao. Aniaman kadagita, saan a kapanunotan dagiti mannurat ti insuratda no di ket ti Dios.

Kasanotayo a masigurado a ti Dios ti naggapuan ti insurat dagiti mannurat ti Biblia? Kitaem ti tallo nga ebidensia.