TI KUNA TI DADDUMA

Agdaydayaw idi dagiti Israelita iti naranggas a dios ti gubat.

TI KUNA TI BIBLIA

Dagiti nasion nga inabak ti Israel ket napnuan iti kinaranggas ken narugit nga ar-aramid a kas iti pannakidenna iti asideg a kabagian ken animal ken panangidaton iti ubbing. Kalpasan nga inikkan ida ti Dios iti ginasut a tawen tapno agbalbaliwda, kinunana: “Babaen kadagitoy amin a banag, dagiti nasion a pappapanawek iti sanguananyo rinugitanda ti bagbagida.”—Levitico 18:21-25; Jeremias 7:31.

“Gapu iti kinadangkes dagitoy a nasion a ni Jehova a Diosmo pagtalawenna ida iti sanguanam.”—Deuteronomio 9:5.

MABALIN A NAPALIIWMO

Iti adu a gubat, ibagbaga dagiti lider ti relihion ti agsinnumbangir a grupo nga isuda ti supsuportaran ti Dios. “Kanayon nga adda paset ti relihion iti tunggal gubat,” kuna ti libro a The Causes of War.

TI KUNA TI BIBLIA

Naibilin kadagiti Kristiano a saanda a makilaban kadagiti kabusorda. Insurat ni apostol Pablo kadagiti padana a Kristiano: “No mabalin, agingga a makapagpannuray kadakayo, makikappiakayo iti amin a tattao. Dikay ibalesan ti bagbagiyo.”—Roma 12:18, 19.

Imbes nga ibaon ni Jesus dagiti pasurotna a makigubat, imbagana kadakuada: “Itultuloyyo nga ayaten dagiti kabusoryo ken ikararagan dagidiay mangidaddadanes kadakayo; tapno mapaneknekanyo ti bagbagiyo nga annak ni Amayo nga adda iti langlangit.” (Mateo 5:44, 45) Uray no makigubgubat ti nasion a paggigianan dagiti Kristiano, masapul nga agtalinaedda a neutral ta ‘saanda a paset ti lubong.’ (Juan 15:19) No imbilin ti Dios kadagiti agdaydayaw kenkuana iti amin a nasion nga ayatenda dagiti kabusorda ken agtalinaedda a naisina iti lubong, kasano koma nga adda suportaranna kadagiti gubat ita?

“Ti pagariak saan a paset daytoy a lubong. No koma ti pagariak paset daytoy a lubong, nakibakal koma dagiti agserserbi kaniak tapno saanak a mayawat kadagiti Judio. Ngem, iti kinaagpaysuanna, ti pagariak saan a manipud itoy a gubuayan.”—Juan 18:36.

TI KUNA TI DADDUMA

Saan a malapdan ti gubat. “Sigurado a saan nga agpatingga ti gubat,” kuna ti libro a War and Power in the 21st Century. “Saantayo a manamnama ti agnanayon a talna iti intero a lubong iti panawentayo.”

TI KUNA TI BIBLIA

Agpatingga dagiti gubat no awanen ti mayat a makigubat. Masapul ngarud nga agbalin a mannakikappia dagiti tattao ken mapukaw ti amin nga armas. Din agbayag, tungpalento dayta ti Pagarian ti Dios—maysa a pudno a gobierno nga agturturay manipud langit. Ipasigurado ti Biblia nga “ilinteg [ti Dios] ti bambanag maipapan kadagiti nabileg a nasion iti adayo. Ket kasapulanto a pitpitenda dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng. Saandanto a mangitag-ay iti kampilan, nasion maibusor iti nasion, saandanto met a sursuruenen ti pannakigubat.”—Mikias 4:3.

Isursuro ti Biblia nga iti panagturay ti Pagarian ti Dios, awanton dagiti gobierno ti tao nga aglalaban para iti bukodda nga interes, dagiti saan a patas a linteg a rason ti iyaalsa dagiti umili, wenno ti panangidumduma a mangrubrob iti pannakabingaybingay dagiti etniko a grupo. Iti kasta, awanton ti gubat. Inkari ti Dios: “Saandanto a mangaramid iti aniaman a panangdangran . . . agsipud ta ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.”—Isaias 11:9.

“Pagsardengenna dagiti gubat agingga iti ungto ti daga. Rungrungduenna ti bai ket putedputedenna ti pika; dagiti kareson ipuorna iti apuy.”—Salmo 46:9.