Kuna ni mister: “Idi nagkasarkami, agdumakami ken baketko iti opinion no ania ti makuna a panangipakita iti respeto. Saan a kaipapanan daytoy a husto ti maysa ket kamali ti maysa, agduma la a talaga ti opinionmi. Masansan a mariknak a nadaydayaw koma pay ti pannakitungtongna kaniak.”

Kuna ni misis: “Normal iti dimmakkelak a kultura ti napigsa a panagsao, napalalo nga ekspresion ti rupa, ken ibaballaet uray adda pay la agsasao. Saanmi nga ibilang a kinaawan respeto dayta. Ngem naiduma unay dayta iti dimmakkelan ni lakayko.”

Saan laeng koma a sagpaminsan nga ipakitam ti respeto iti asawam, no di ket kanayon koma. Kasano a maipakitam a resrespetuem ti asawam?

Ad-adda a kasapulan ti lalaki ti marespeto. Ibaga ti Biblia iti assawa a lallaki: “Ayaten koma ti tinunggal maysa kadakayo ti asawana a babai a kas ti panagayatna iti bagina.” Ngem innayonna: “Ti babai rebbeng nga addaan iti nauneg a panagraem iti asawana.” (Efeso 5:33) Agpada a kasapulan ti agassawa ti makarikna iti ayat ken respeto, ngem nangnangruna a naragsak ti asawa a lalaki no marespeto. “Kasapulan a marikna dagiti lallaki a kabaelanda a sanguen ti situasion, solbaren ti problema, ken aywanan ti pamiliada,” kinuna ti asawa nga agnagan Carlos. * No respetuen ti asawa a babai ni lakayna gapu kadagita, agpadada a magunggonaan. “No ipakpakitak a resrespetuek ni lakayko, ad-adda nga ipakitana ti ayatna kaniak,” kinuna ni Corrine.

Siempre, kasapulan met ti asawa a babai ti marespeto. Umiso la unay dayta ta saan a maipakita ti lalaki a talaga nga ay-ayatenna ni baketna no dina met resrespetuen. “Masapul a respetuek dagiti opinion ken singasing ni baketko,” kuna ni Daniel. “Masapul met a respetuek ti riknana. Uray no diak maawatan no apay a kasdiay ti riknana, dina kayat a sawen a diakon ikabilangan dayta.”

Agduduma ti opinion no ania ti makuna a panangrespeto. Ti napateg ket saan a no ania ti panagkunam a panangipakita iti respeto, no di ket no marikna met laeng dayta ti asawam. Daytoy ti nasursuro ti asawa a babai a nadakamat iti paset a “Ti Problema.” “Uray no iti panagkunak ket saan met a kinaawan respeto ti impakitak, ngem no marikna ti asawak a kastaak, siak ti masapul nga agbalbaliw.”

• Mangisuratka iti tallo a maapresiarmo iti asawam. Dagiti nagsasayaat nga ugalina a nakitam ti makatulong tapno maaddaanka iti respeto kenkuana.

• Iti uneg ti makalawas, paliiwem ti bagim (saan a ti asawam) kadagitoy nga aspeto.

Panagsasaom. Ipakita ti maysa a panagadal a “kadagiti naragsak ken nalagda a panagasawa, makaibaga dagiti agassawa iti lima a positibo a komento iti kada maysa a negatibo a komento no pagsarsaritaanda ti problema. Ngem kadagiti agassawa a dandanin agdiborsio, makaibagada laeng iti nakurkurang a maysa (0.8) a positibo a komento iti tunggal negatibo a komentoda.” *—Prinsipio ti Biblia: Proverbio 12:18.

Isaludsodmo iti bagim: ‘Nadayaw kadi ti pannakisaritak iti asawak? Mas masansan kadi a mangdillawak no ikompara iti panangibagak iti apresasionko? Ania ti tono ti bosesko no adda nadlawko a madi wenno reklamok?’ Umanamong kadi ti asawam kadagiti sungbatmo?—Prinsipio ti Biblia: Colosas 3:13.

Padasem daytoy: Ikagumaam ti mangibaga iti uray maysa la nga apresasion iti kada aldaw. Singasing: Subliam dagiti naapresiarmo nga ugali ti asawam nga insuratmo. Iyugalim nga ibaga iti asawam no ania dagiti magusgustuam kenkuana.—Prinsipio ti Biblia: 1 Corinto 8:1.

Tigtignaymo. Kuna ti asawa nga agnagan Alicia: “Adu nga oras ti busbusbosek nga agtrabaho iti balay isu a no ipakita ni lakayko a resrespetuenna ti panagbannogko, kas no agipakni wenno aginnaw, mariknak a sulit ti bannogko ken napateg ti papelko iti panagasawami.”

Isaludsodmo iti bagim: ‘Nalawag kadi nga ipakita ti panangtratok iti asawak a resrespetuek isuna? Ipapaayak kadi ti asawak iti umdas a tiempo ken atension?’ Umanamong kadi ti asawam kadagiti sungbatmo?

Padasem daytoy: Mangisuratka iti tallo a pamay-an a kayatmo a maipakitaanka iti respeto. Ipaaramidmo met dayta iti asawam. Sa agsinnukatkayo iti listaan tapno makita ti tunggal maysa ti parang-ayenna iti panangipakita iti respeto sigun kadagiti insuratyo. Agpokuska iti masapul a parang-ayem iti panangipakita iti respeto. No sika ti mangyun-una, sumurot la ketdi ti asawam.