• Sangapulo laeng ti tawen ti anakmo—ket agpampannakkelen!

• Kayatna nga espesial ti panangtrato ti amin kenkuana.

‘Apay a kasta metten ti ugalina?’ napanunotmo. ‘Kayatko a maaddaan iti kompiansa iti bagina, ngem saanna koma a panunoten nga isun ti kalalaingan!’

Posible kadi a maisurom nga agbalin a napakumbaba ti anakmo a saan a bumaba ti panagkitana iti bagina?

Kadagiti kallabes a dekada, nairekomenda kadagiti nagannak a pagustuanda ti annakda; kanayon a padayawanda uray awan naaramidanda a masapul a mapadayawan; saanda ida a disiplinaen. Naipagarup a no espesial ti pannakatrato ti annak, dumakkelda nga addaan iti kompiansa iti bagida. Ngem ania ti resultana? Kuna ti libro a Generation Me: “Imbes a naragsak ken nasayaat ti pannakapadakkel dagiti ubbing, nagresulta ketdi dayta iti adu nga ubbing a bagida la ti pampanunotenda.”

Adu nga ubbing a sobra a mapadpadayawan ti dimmakkel a saanda nga ammo ti umawat iti pannakadismaya, pannakakorehir, ken panagkamali no dadduma. Gapu ta nairuamda a masurot ti kaykayatda, inton dumakkelda, marigatandanto a maaddaan iti agbayag a gayyem wenno kapareha. Kas resultana, adu kadakuada ti madandanagan ken madep-depress.

Maaddaan ti ubbing iti pudpudno a panangipateg iti bagida babaen kadagiti naaramidanda, saan ket a babaen iti kanayon a panangibaga nga espesialda. Saanda la koma a basta mamati iti abilidadda. Masapul nga agsursuroda, agsanay, ken pasayaatenda a naimbag dagiti paglainganda. (Proverbio 22:29) Masapul met nga asikasuenda ti kasapulan ti dadduma. (1 Corinto 10:24) Agkasapulan amin dagitoy iti kinapakumbaba.

Padayawan no maikari. Komendaram ti anakmo no nangato ti iskorna. No nababa ti gradona, saanmo a pabasolen ti titserna. Ngamin, saan a masursuro ti anakmo ti agpakumbaba. Imbes ketdi, tulongam tapno nasaysayaatto ti maaramidanna inton maminsan. Padayawam inton naimbag ti maaramidanna.

Disiplinaen no kasapulan. Saanna a kayat a sawen a kanayon a kritikarem tunggal agkamali. (Colosas 3:21) Ngem masapul a mailinteg dagiti nakaro a kamali. Kasta met laeng no adda madi nga ugalina, ta no saan, mairuamna dayta.

Kas pagarigan, nadlawmo nga agpampannakkel ti anakmo. No saan a mailinteg, agbalin a napangas ket adaywan ti dadduma. Isu nga ilawlawagmo a pagdaksan ti anakmo ti panagpangas, wenno panaglastog ket mabalin a pakaibabainannanto dayta. (Proverbio 27:2) Ilawlawagmo met a ti tao a napakumbaba saanna a masapul nga ipakaammo dagiti abilidadna. No ilintegmo ti anakmo gapu iti ayat, masursurona ti agpakumbaba a saan a bumaba ti kompiansana.—Prinsipio ti Biblia: Mateo 23:12.

Isaganam ti anakmo iti realidad ti biag. No kanayon a mapagustuan, mariknananto a masapul a masurot ti amin a kayatna. Isu a no kas pagarigan, adda kayatna a saanmo a kabaelan a gatangen, ilawlawagmo a masapul a saan a lumbes iti badyetmo ti gastuem. No masapul a kanselaren ti bakasion, mabalin nga ibagam a paset ti biag ti pannakadismaya ken ilawlawagmo no ania ti ar-aramidem no adda pakadismayaam. Imbes nga iliklikmo ti anakmo iti pakarigatan, isaganam ketdi kadagiti problema a maipasango kenkuana kas adulto.—Prinsipio ti Biblia: Proverbio 29:21.

Isurom nga agbalin a naparabur. Isurom iti anakmo a “naragragsak ti mangted ngem iti umawat.” (Aramid 20:35) Kasano? Agkaduakayo a mangilista kadagiti masapul a matulongan nga aggatang, agbiahe, wenno agtarimaan. Sa ikaduam ti anakmo no tulongam ti dadduma. Ipakitam iti anakmo a maragragsakanka ken kontentoka bayat a tultulongam ti sabsabali. No aramidem dayta, maisurom nga agpakumbaba ti anakmo iti kasayaatan a pamay-an—ti ehemplom.—Prinsipio ti Biblia: Lucas 6:38.