Di Umiso a Pannakaawat: Dagiti manangabuso ti ubing gagangay a ganggannaet, agmauyong a mangkumaw kadagiti ubbing ken puersaenda ida tapno abusuenda ida.

Iti kaaduan a kaso—manipud 85 agingga iti 90 porsiento ti pattapattaen dagiti dadduma—ti manangabuso ket am-ammo ken taltalken ti ubing. Imbes a mangpuersa, masansan a main-inot nga allukoyen dagiti manangabuso ti ubing a mangaramid kadagiti seksual nga aramid, a gundawayanda ti bassit a kapadasan ti ubing ken ti nakapuy nga abilidadna nga agrason. (Idiligyo iti 1 Corinto 13:11 ken Proverbio 22:15.) Dagitoy a manangabuso saan a dagiti managsolsolo, agmauyong a tattao a di mannakilangen. Adu ti relihiuso, mararaem, ken pagay-ayat ti komunidad. Sigun iti U.S. Federal Bureau of Investigation, “ti panangipagarup a saan a pedophile ti maysa a tao gapu laeng ta naimbag, mannakimisa, nagaget, naasi kadagiti ayup, ken dadduma pay, ket awan serbina.” Isingasing dagiti nabiit pay a panagsirarak a di met umiso ti mangipagarup nga amin a manangabuso ket lalaki wenno amin a biktima ket babai.

Di Umiso a Pannakaawat: Ar-arapaapen wenno agulbod dagiti ubbing maipapan iti seksual a panangabuso.

Iti sidong ti gagangay a kasasaad, awan ti kapadasan dagiti ubbing wenno moderno a pannakaammoda kadagiti seksual a banag tapno agimbentoda kadagiti nalawag a makuna a panangabuso, nupay dadduma a babassit nga ubbing mabalin a mariroda maipapan kadagiti detalye. Uray ti managduadua kadagiti managsirarak umanamong a kaaduan kadagiti maibaga a panangabuso ket pudno. Usigenyo ti libro a Sex Abuse Hysteria—Salem Witch Trials Revisited, a mangipamaysa kadagiti ulbod a pammabasol iti panangabuso. * Daytoy a libro aminenna: “Nasaknap ti pudno a panangabuso iti sekso kadagiti ubbing ket ti kaaduan a panangabuso iti sekso nga ibagbaga dagiti ubbing . . . ket mabalin a nainkalintegan (nalabit 95% wenno ad-adu pay).” Marigatan iti kasta unay dagiti ubbing a mangipulong iti panangabuso. No ilibakda ti panangabuso, kaaduanna ilibakda a napasamak dayta uray no pudno a napasamak.

Di Umiso a Pannakaawat: Makagargari dagiti ubbing ken masansan abusuenda ti bagbagida babaen iti tigtignayda.

Daytoy a kapanunotan ket tiritir a nangnangruna, yantangay, kayariganna, pabasolenna ti biktima iti panangabuso. Awan ti pudno a kapanunotan dagiti ubbing maipapan iti seksualidad. Awan ti ammoda no ania ti kaipapanan ti kasta nga aramid wenno kasano a balbaliwanna ida. Ngarud dida kabaelan ti umanamong iti dayta iti aniaman a napateg a pamay-an. Ti manangabuso, ken ti manangabuso laeng, ti mapabasol iti panangabuso.—Idiligyo iti Lucas 11:11, 12.

Di Umiso a Pannakaawat: No ipudno dagiti ubbing ti panangabuso, masapul nga isuro dagiti nagannak ida a saanda a sarsaritaen dayta ket ‘lipatenda dayta.’

Sino ti ad-adda a magunggonaan no agulimek ti ubing maipapan iti panangabuso? Saan kadi a ti nangabuso? Kinapudnona, impakita dagiti panagadal a ti panangilibak babaen iti pananglapped iti emosion mabalin a saan nga epektibo a pamay-an a panangtaming iti pakalaglagipan ti panangabuso. Kadagiti siam a pamay-an ti panangparmek nga inusar ti maysa a grupo dagiti nataengan a nakalasat iti incesto a naadal idiay Inglaterra, dagidiay nangilibak, nangliklik, wenno nanglapped iti isyu nagsagabada iti dakdakkel a pannakariribuk ken rigat iti nataengan a panagbiagda. No napadasanyo ti nakabutbuteng a panangraut, kayatyo kadi ti malapdan nga agsao maipapan iti dayta? Apay nga ibagayo dayta iti ubing? Ti panangipalubos iti ubing nga agtignay a gagangay iti kasta a nakaam-amak a pasamak, kas ti panagliday, panagpungtot, panagladingit, mangipaayto kenkuana ti gundaway a makaungar iti pannakaabuso.